Na caminda pa un fundeshi solido pa Aruba. 

Plataforma E Forsa Nobo durante transcurso di e ulitmo lunanan a dedica su mes incansabelmente pa ta den contacto estrecho cu nos comunidad, Otmar Oduber ta splica. 

Saliendo for di e balornan di partido POR, cu ta e fundeshi solido for di cual e plataforma ta construi su vision, a yega na un programa colectivo. E programa ta toca un variacion di tema cu comunidad a identifica como prioridad. Otmar ta splica cu, pa medio di e programa aki POR ta  percura pa nos comunidad y e bienestar di nos pueblo haya su debido atencion. Diamars awo 10:00am lo lansa e programa oficialmente den un sesion informativo cu prensa. 

E team di  di POR ta consisti di un cantidad di profesional y expertonan riba un variedad amplio di tereno. Cada un a aporta extensamente y cu hopi dedicacion na comparti nan experiencia y experticio pa asina por presenta un programa solido, pragmatico y cu atencion pa varios tema cu ta trata cada un den nos comunidad.
E rondanan di consulta cu diverso organisacion y e comentarionan continuo cu e plataforma a haya for di nos ciudadanonan ta  esencia di e plan colectivo 'Vision 17/20: Hunto Nos Por'. E plataforma ta kere firmemente den e factor humano ora ta trata di goberna un pais y ta decidido di percura pa e aspecto aki continuamente keda inclui den e maneho di pais Aruba.
Di e forma aki partido POR un biaha mas ta mustra di ta pionero den traduci comunitarismo, e lazo estrecho cu pueblo, den un programa pragmatico, cu metanan factibel y un plan di ehecucion realisabel.

Pa Sr. Otmar Oduber, lider di partido POR, e programa Vision  17/20 ta e prome piedra cu ta pone riba e fundeshi solido di loke a plataforma ta para pe. Un plan basa riba balornan solido, cu ta di comunidad y pa comunidad. Un plan na unda e balor humano semper ta prevalece riba ideologia.

Expresionnan haci den e articulo aki no necesariamente ta refleha opinion di ArenaPoliti.co