E dia tan espera ta jegando, dia unda e comunidad di Aruba lo bay urnanan electoral pa scoge su representantenan pa e siguiente cuater añanan. Si mi tin di mira bek e proceso di mi campaña, durante nos bishitanan cas pa cas of otro lugarnan, mi a topa cu personanan cu despues di a lesa mi folleto (y tin ora sin lese) ta bira wak mi y bisami: “Bo por ta bon studia…pero bo a haci e escogencia robes!”. Y cada bes mi ricibi e comentario aki mi ta puntra: “Kico ta ponebo pensa cu mi escogencia ta robes?”. 

Mayoria di biaha mi no ta haya un contesta concreto, sin embargo mi por sigura cada un di boso cu mi escogencia no ta robes. Dicon? Na e momento cu mi a tuma e desicion di forma parti di e plataforma politico aki, mi a uni pasobra mi ta para pa un Parlamento cu realmente ta sirbi su pueblo; un Parlamento representativo, transparente, integro.

Integridad y Politica ta dos palabra cu ta uni y forma un sentimento: Confianza. Integridad ta e capacidad di haci cosnan stret y transparente, unda cada acto, na cada momento ta riba e mesun liña cu honestidad, frankeza y husticia, esaki ta forma un gobierno cu un base pa un generacion nobo cu un estilo politico nobo. 

Den un estilo di política nobo no por laga e combinacion di integridad y transparencia afo. Integridad y transparencia politico ta importante pa dirigi nos pais, pasobra e ta duna balor y respet na e escogencia di nos representatenan.  Sin esakinan bo no por papia di un gobierno fuerte, un gobierno cu abo y ami  a deposita nos confianza den dje.

Pesey diabierna awor, ta e cambio cu abo kier mira, haci uzo di bo derecho di voto y vota consiente!

Expresionnan haci den e articulo aki no necesariamente ta refleha opinion di ArenaPoliti.co