A recauda fondo pa eventonan den barionan 

ORANJESTAD - Den fin di siman a tuma luga e evento "Spinning Marathon" cual a wordo organisa door di fundacion "Sport for Youth". E evento a tuma luga den e parkinglot di Conseho di Minister, bou ambiente musical y apoyo di fanaticonan di deporte.

Minister di Integracion, Infrastructura y Ordenanza di Espacio Benny Sevinger tabata e Minister cu a representa su coleganan den e evento aki. Conoci como un persona activo fisicamente, el a representa su coleganan debidamente. El a expresa gradicimento na e fundacion "Sport for Youth" cu a invit'e pa participa den e evento aki cu tin un bunita meta pa incentiva movecion bou hobennan.

"Sport for Youth" ta un fundacion cu ta traha hunto cu Gobierno tratando di promove deporte bou di e hobennan, principalmente den barionan. "Esaki ta un iniciativa di nos Prome Minister den cuadro di e proyecto BoBario, unda parti di infrastructura, social y recreacion ta wordo combina." E mandatario a felicita e organisadornan, y tambe trahadonan di Ministerionan di Prome Minister Eman y di Ministerio di Minister Alex Schwengle. E placa recauda ta bay wordo uza pa eventonan cu ta wordo organisa den e barionan na bienestar di hobennan.

Cada ora tabatin un team diferente ta spin cu e meta pa mantene un ora bou guia di un instructor. "E tabata un ora agradabel. E ta un bon iniciativa cu por sigui cune tur diadomingo. E ta algo cu pueblo lo aprecia." Minister Sevinger a recorda su ex-colega Visser, kende a introduci e programa 'Ban Move', pa biba mas saludabel, y a cuminsa drecha varios area pa e hendenan por a cuminsa cana. "Por a constata cu movecion e tempo ey a cuminsa bira parti di e bida diario di e ciudadanonan. Si bo mira cuanto hende ta cana riba Linear Park tur dia, anto nos ta kere cu Aruba ta riba e bon caminda. Den pasado tabata delibera hopi riba obesidad y esaki ta hustamente programanan cu por combina e problema di salud aki," Minister Sevinger a duna di conoce.

Na final el a apela pueblo pa participa den proximo eventonan cu ta bay tin pa motibo cu e ta pa un bon causa.

E evento tabata bou coordinacion di Leo den Hartog, coordinador di Movecion den Barionan di Ministerio di Asuntonan General. E idea tras di e evento aki ta pa recauda fondo cual ta wordo uza pa crea mini-veldnan cu ta bay pone den e barionan y encurasha hobennan pa practica deporte mas tanto posibel.

E Spinning Marathon tabata e prome evento cu e Fundacion "Sport For Youth" a organisa y cual a encera cu seis ora trahadonan di Gobierno a spin y seis ora e empresa comercial su hendenan a spin. En total a logra haya ocho empresa pa participa den e spinning marathon.

Expresionnan haci den e articulo aki no necesariamente ta refleha opinion di ArenaPoliti.co