Durante un entrevista Parlamentario sr.Guillfred Besaril a elabora un poco riba deporte. Parlamentario Besaril a declara lo siguiente:

"Mi kier a hasi uso di e oportunidad pa duna e pueblo di Corsow un pabien grandi en conexion cu nan logronan riba nivel deportivo. Corsow a sorprende mundo di Futbol asignando e astro, sr. Patrick Kluivert na cabez di nan seleccion nacional. Cu a paso aki e ta mas cu obvio cu Pais Corsow ta haciendo su best pa eleva e deporte y awor tin un estrella di e caliber di sr. Kluivert como entrenador pa demostra cu nan ta serio den nan intencion. Ora cu nos a kere cu esaki lo ta É noticia di luna, a resulta cu mas bon noticia a sigui yega for di nos hermana Isla. E biaha aki a toca turno na e deporte di baseball. Pais Corsow a caba di sera un convenio cu e organisacion Mericano "Internacional Baseball Partners LLC (IBP)", den cual lo construi un compleho profesional di baseball cu e meta pa desaroya e talentonan hoben den e region, pa despues nan por tin un mihor oportunidad serca organisacionan di MLB.

Tur e noticianan aki ta laga nos cu un incognita: "Y Aruba Mes, Kiko nos kier logra como Pais den deporte?" Laga nos ta sincero cu otro, si tin un deporte cu a saca cara di Aruba den gran forma recientemente, esey lo ta baseball! Na 2013, full e pueblo di Aruba a sinti orguyo grandi pa mira y tende e nomber un yiu di tera resona durante e Serie Mundial di Baseball MLB. Considerando cu na Aruba tin hopi talento cu por firma pa equiponan di Grandes Ligas, pero cu na final no ta logra, ta pone nos yega na e pregunta antes menciona: Kiko nos kier logra? Ki lugar deporte tin den nos comunidad y kiko ta e maneho cu nos Pais lo kier hiba?

Mayoria biaha bo ta tende e critica cu na nivel social, Aruba no ta bayendo bon. E realidad ta cu actividadnan extra curricular manera, musica, obra di man y deporte no ta hunga e rol central cu nan ta suppose di ta hunga den nos comunidad. E actividadnan aki ta elementonan cu ta yuda e desaroyo di nos hobenan. Ademas ta tene nan for di e caminda malo. Ta di lamenta cu no tin un masterplan, un vision pa cu e desaroyo di deportivo en general aki na Aruba. Unda Aruba kier ta aki 5, 10 of 15 aña den por ehempel Futbol? Con nos por yuda nos hoben atletanan yega Grandes Ligas of por lo menos logra un scholarship den otro ramonan di deporte? Preguntanan importante cu merece atencion.
Apesar di tur e preguntanan, mi ta termina ta felicita Pais Corsow un biaha mas pa nan logronan y ta keda cu e speransa cu e desaroyo na e hermana Isla stimula un postura mas pro-activo serca esnan responsabel pa cu deporte na Aruba", Parlamentario Besaril a termina

Expresionnan haci den e articulo aki no necesariamente ta refleha opinion di ArenaPoliti.co