Perspectiva Independiente without background 001

Bek den pasado.… atrobe.

Parlamento sala old
Na final di e di 6 dia di tratamento di presupuesto di pais Aruba pa aña 2016, Parlamento a aproba e presupuesto. Tur parlamentario den oposicion (MEP, PDR) a vota contra e presupuesto. Di fraccion AVP, parlamentarionan Marisol Lopez-Tromp y Mervin Wyatt-Ras a vota contra, mientras cu e resto di fraccion AVP a vota na fabor, asina aprobando e presupuesto cu e minimo di 11 voto pro y 10 contra.

E parlamentarionan tambe a presenta 28 mocion y 1 amienda. Entre e mocionnan tawata tin 2 mocion di desconfiansa. E mocionnan di MEP tawata dirigi riba retira confiansa den minister Arthur Dowers y minister Benny Sevinger.
Parlamentarionan di MEP y sr. Bikker (PDR) a sostene e mocion di desconfiansa contra minister Dowers, mientras cu tur parlamentario di AVP a vota contra e mocion.
Pa loke ta trata e mocion di desconfiansa contra minister Sevinger, parlamentarionan di MEP, sr. Bikker (PDR) y sra. Lopez-Tromp (AVP) a sostene e mocion, mientras cu e otro 12 parlamentarionan di AVP a vota contra.


S.O.S.
Manera pueblo a custuma di dje caba, atrobe varios parlamentario y minister a recuri na ofende y insulta otro, grita/papia duro ora otro hende ta na palabra, y desvia for di loke mester wordo trata.
Varios minister tambe a desvia hopi for di preguntanan cu nan mester a contesta, y na hopi ocasion a recuri na papia di gobernacion bou di maneho di ex-prome minister Nelson Oduber durante añanan 2001 pa 2009. Den cierto caso, e maneho di un gobierno anterior sigur ta relevante pa splica un maneho cu a bin despues. Pero loke varios minister a haci ta parse hopi mas cu ta usa ehempelnan di pasado como excusa, of como atakenan irelevante pa e reunion.

NelUn ehempel ta ora minister Otmar Oduber a wordo puntra pa publica su carta di retiro den cua e lo a menciona 9 punto di critica riba Gabinete Mike Eman II. Parti di su contesta a ensera papia di tempo cu sr. Nelson Oduber tawata tin un conflicto cu sr. Betico Croes, y un carta di e tempo ey (sr. Nelson Oduber via Facebook a expresa cu e carta no ta existi).

Ironicamente e unico ex-minister di e gabinetenan di 2001 pa 2009 cu ta den sala di Parlamento ta presidente di Parlamento Marisol Lopez-Tromp (ex-MEP, AVP). Diferente minister a reclama Gabinete Oduber III y IV, incluyendo aspectonan cu a cay bou di maneho di nan colega actual, sra. Lopez-Tromp. Mester remarca cu prome minister Mike Eman si a ‘schuif’ e culpa di un reclamo riba e maneho cu a cay bou di ex-minister Lopez-Tromp riba ex-prome minister Nelson Oduber, bisando cu e ministerio bou maneho di sra. Lopez-Tromp no a haya suficiente placa, y segun sr. Eman esey ta culpa di sr. Nelson Oduber.

Sinembargo tambe tawata tin momentonan mas serio y al caso. For di cada fraccion a sali preguntanan valido. E diferencia entre parlamentarionan di mesun signatura por varia hopi. Lastimamente no ta mustra cu e parlamentarionan cu si ta purba di haci nan trabou manera mester ta, kier comparti e responsabilidad di su fraccion pa eleva e nivel di su coleganan. Bou di e ministernan tambe por a nota un diferencia den seriedad.

Den tur esey, parlamentario Andin Bikker a keda ‘out of the line of fire’. Di un banda esey no ta dificil, considerando cu e no por wordo ataca riba un pasado di su persona of su partido den gobernacion. Di otro banda toch por nota cu sr. Bikker conscientemente no ta participa den desviamento, y ta keda al caso.


Hisa nivel
Mas y mas hende den pueblo ta reclama e modus operandi di parlamentarionan y ministernan durante reunionnan publico. Y banda di e insultonan, e fenomeno di constantemente ataca un gabinete cu a sali for di gobernacion mas cu 6 aña pasa ta birando ridiculo. Cu excepcion di sra. Lopez-Tromp, e ex-ministernan no tey den Parlamento pa defende nan mes. Y cu e imunidad cu ta conta den Parlamento, parlamentario y ministernan por ‘get away’ cu bisa practicamente kico cu ta.

Cada parlamentario y cada minister tin cu para responsabel pa su conducta durante un reunion, mientras cu e presidente di Parlamento segun Reglement van Orde tambe tin e poder y deber di tene esnan na palabra al caso. Na final di tur cos, ta e pueblo votado tin e ultimo palabra, y mas poder cu hopi di nos ta realisa. Pueblo tin un rol principal den pone un democracia funciona manera mester ta. Den un democracia, hopi biaha un pais ta haya e gobierno (y parlamento) cu e merece.*

*“Toute nation a le gouvernement qu'elle mérite.” — Joseph de Maistre
(Every nation gets the government it deserves.)

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.