Perspectiva Independiente without background 001

Transparencia den financiamento di partidonan politico Hulandes

(Tempo pa lesa: 2 - 4 minuut)
171005 euros
Relaciona cu e eleccion parlamentario di Hulanda na maart 2017, partidonan politico Hulandes mester a entrega relatonan mustrando placa cu nan a haya (sponsors) y nan debenan. Tambe mester a entrega un relato di e placa cu candidatonan individual a ricibi. Esaki ta un obligacion segun e ley di financiamento di partido politico Hulandes. E ta conta pa tur partido cu ta bay participa na un eleccion parlamentario, mientras cu partidonan cu representacion den Parlamento (Eerste/Tweede Kamer) mester haci esaki anualmente. E ley ta obliga partidonan y politiconan pa raporta e fuentenan di donacionnan di €4.500 bay ariba (durante un aña) y debenan di partidonan di €25.000 bay ariba. Donacionnan den forma cu no ta ‘cash’, por ehempel haya servicionan of uso di sala/material ‘regalo’, tambe ta wordo considera donacion.  

E ministerio encarga cu funcionamento di e ley aki (Ministerie van Binnenlandse Zaken en Koninkrijksrelaties) recientemente a duna informacion tocante e cumplimento cu e ley. Aki por wak e relatonan cu a wordo entrega prome cu e eleccion di maart 2017:
E meta di e ley aki ta pa duna transparencia den con partidonan ta yega na nan fondonan, pa preveni cu hende por ‘cumpra’ influencia politico, y pa preveni (e aparencia di) conflicto di interes.

Commissie toezicht financiën politieke partijen, cu ta e comision cu ta eherce e control riba cumplimeto cu e ley di financiamento di partido politico, a laga sa cu mayoria partido politico a cumpli, pero algun sea no a entrega relato, no a haci esaki corecto of no a inclui relatonan di e candidatonan individual. Despues cu e comision a sigui insisti serca e partidonan aki pa duna e informacion necesario/corecto, e partidonan a cumpli.

E comision ta di opinion cu fundacionnan cu tin como meta pa yuda financia campañanan politico tambe mester wordo obliga pa duna relatonan financiero. Minister Ronald Plasterk (BZK) ta di acuerdo cu esaki y a pidi un comision cu ta evaluando e ley di financiamento di partido politico pa tene esaki na cuenta.

Aruba
Aruba ta e unico pais den reino Hulandes cu no tin un ley di financiamento di partido politico. Pa basta tempo caba, mayoria partido na Aruba ta expresa di tin introduccion di un ley di financiamento di partido politico como prioridad. Te unda ArenaPoliti.co a haya sa, e prome intentonan pa introduci un ley di financiamento di partido politico na Aruba ta data for di añanan ‘90. Pues durante e ultimo decadanan ningun Gobierno/Parlamento a logra realisa esaki. Na december 2016 parlamentario Donny Rasmijn (AVP) a informa ArenaPoliti.co di su intento pa realisa esaki. Usando e ley di financiamento di partido politico di Sint Maarten como modelo, sr. Rasmijn tawata optimista cu un concepto lo wordo trata den Parlamento prome cu eleccion.

Evita fayo 
Mientrastanto e partidonan cu ta negociando pa forma un coalicion (MEP, POR, ReD) tur tin e plan pa bin cu un ley di financiamento di partido politico den nan programa. E hecho cu tur otro pais den reino tin un ley di financiamento di partido politico caba, ta duna Aruba e oportunidad pa evalua con e diferente leynan ta funcionando, kico mester haci miho, y implementa un ley solido pa Aruba. Naturalmente por busca inspiracion pafo di reino Hulandes tambe, y semper teniendo cuenta cu nos circunstancianan local bou cual e ley lo mester funciona debidamente.
Manera menciona, Hulanda ta evaluando nan version di e ley di financiamento di partido politico y a ripara e ‘fayo’ di no inclui fundacionnan cu ta sostene campañanan politico. Esaki sigur ta relevante pa Aruba, considerando e custumber cu varios candidato ta ricibi donacionnan via un fundacion. Asina lo tin mas posibel ‘fayonan’ cu Aruba por evita pa yega na un ley cu realmente lo cumpli cu e metanan di e ley. Ta keda practicamente imposibel pa logra un control perfecto riba fondonan di partidonan politico y e candidatonan, pero un ley solido sigur por haci un diferencia positivo.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.