Comision ta evalua cambionan den sistema parlamentario Hulandes

(Tempo pa lesa: 3 - 5 minuut)
JohanRemkes01Na januari 2017 un comision Hulandes, Staatscommissie parlementair stelsel, a wordo forma pa investiga si mester trece cambio den e democracia parlamentario di Hulanda. Mientrastanto e comision a presenta un rapport riba e prome fase di nan investigacion, cual ta un ‘probleemverkenning’. E comision a analisa puntonan fuerte y debil di e democracia parlamentario Hulandes y a yega na seis punto riba cual nan lo enfoca durante nan investigacion. Presidente di e comision, sr. Johan Remkes, a presenta e prome resultadonan durante un conferencia di prensa na Den Haag (18 di oktober 2017).

Resumen di e seis puntonan di enfoke 

Representacion

E preguntanan principal cu lo wordo investiga pa loke ta trata representacion ta si e pueblo Hulandes ta sinti cu nan ta bon representa den e parlamentonan (Eerste Kamer y Tweede kamer) y si nan por confia cu nan interesnan ta wordo sirbi.

E rol di partidonan politico

Segun e comision, partidonan politico ta esnan cu ta ‘conecta’ e pueblo cu politica, pero nan ta perdiendo influencia. Nan rol den trece temanan dilanti den comunidad a disminui, lagando un bashi. Di esnan cu derecho di voto, 2,3% ta miembro di un partido politico y for di e grupo aki mayoria candidato ta wordo selecta. E comision ta considera esaki un porcentahe abou.

Formacion di gabinete y sistema electoral

E comision ta remarca cu e pueblo votado ta eligi parlamentario, pero no un gabinete. Sugerencianan conoci manera un eleccion pa eligi un minister-president of un formador, cu ta duna votado mas influencia riba formacion di un gabinete, lo wordo (re-)evalua.
E comision tambe ta di opinion cu formacion di gabinete ta tuma mucho tempo y no ta suficiente transparente.
171018 probleemverkenning staatscommissie parlementair stelsel
Proteccion di democracia
Presidente di e comision, Johan Remkes, a menciona specificamente e influencia di intrumentonan digital cu por influencia eleccion. Esaki ta algo cu ta wordo investiga na diferente pais despues di indicacionnan cu eleccionnan a wordo influencia pa medio di social media, big data y micro targeting. E comision lo investiga si por proteha e democracia Hulandes contra e influencianan aki y tambe otro desaroyonan (no digital) cu por pone un democracia den peliger.

Poder di gobierno nacional

Mientras cu mas decision cu tawata cay bou di gobierno (y parlamentonan) nacional awo ta tarea di gobierno riba nivel di provincia y municipio, pueblo keto bay ta enfoca hopi mas riba politica nacional. E influencia di Union Europeo tambe a trece un ‘shift’ di cierto decision for di gobierno nacional pa Union Europeo. E decisionnan aki ta afecta e ciudadano. E comision lo investiga con e parlamentonan Hulandes ta anda cu e situacionnan aki.

Sistema bicameral, referendum y juez constitucional

E hecho cu Hulanda tin un sistema bicameral (dos parlamento) por complica e proceso di legislacion. Por ehempel, e gabinete na mando no semper por conta riba un mayoria den ambos parlamento (Eerste Kamer y Tweede Kamer).
Eerste Kamer ta asumi un rol di controla si leynan ta cuadra cu constitucion, algo cu juez no por haci den e sistema Hulandes. E comision lo evalua di duna juez e posibilidad aki.
Un otro mecanismo corectivo riba e proceso legislativo ta e posibilidad di referendum corectivo. Durante e conferencia di prensa sr. Remkes a laga sa cu tin bastante sosten den comunidad Hulandes pa referendum y e comision lo investiga e posibilidadnan.

Mientrastanto e plan di gobernacion di gabinete Rutte III ta menciona eliminacion di e ley di referendum consultativo cu ta na vigor actualmente. Ironicamente, si gabinete Rutte III purba elimina e ley aki, pueblo lo por inicia un referendum consultativo contra eliminacion di e ley di referendum consultativo.


Staatscommissie parlementair stelsel a haya te fin di 2018 pa presenta nan rapport final.


No ta prome biaha
No ta prome biaha cu ta haci investigacion y intento pa trece cambio den e democracia parlamentario Hulandes. E hecho cu otro intentonan no tawata exitoso ta indica cu trece cambionan substancial den un democracia y sistema electoral no ta facil. Na mesun momento e cantidad di intentonan ta duna indicacion cu continuamente no tur hende ta satisfecho cu e sistema actual.

Aruba 
Ta interesante pa Aruba sigui e desaroyonan democratico y constitucional paden y pafo di reino Hulandes. Por ehempel, Sint Maarten ta e unico pais den reino Hulandes cu un corte constitucional, cual ta algo cu por percura pa mas checks and balances den un pais. E hecho cu Hulanda a y ta evalua cambionan den un sistema cu Aruba (y ex-Antiyas) pa gran parti a copy/paste tambe ta un motibo pa pone atencion. Pero e idea no mester ta pa copy/paste cambionan cu Hulanda of otro pais ta implementa sin mas. Ta importante pa tene cuenta cu tur aspecto cu ta haci Aruba diferente y ta haci cu algo cu ta bon pa (por ehempel) Hulanda no necesariamente ta bon pa Aruba. Factornan manera e tamaño di nos poblacion, cultura y desaroyonan politico, y e deseonan di e pueblo di Aruba, por diferencia e rekisitonan pa nos democracia.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.