Perspectiva Independiente without background 001

Gabinete ME II: Prome Piedra di mini-veld pa Madiki Kavel

Mini veld Madiki Kavel
Un cooperacion entre Gobierno y FCCA ta dunando su frutonan na beneficio di hobennan di bario 

ORANJESTAD - Un cooperacion cu ta dunando contenido na un vision social cu tanto Gobierno como FCCA ta comparti, a logra pa por traha un plan pa mas recreacion y deporte den barionan. Esaki ta haci posibel cu den diferente bario, caminda cu FCCA ta activo y ta desaroya vivienda, ta cuminsa construi mini-veldnan deportivo cu yerba artificial.

Inauguracion oficial di e trabounan pa traha un veld den Madiki Kavel a tuma luga diamars atardi. Prome Minister Mike Eman, hunto cu su colega encarga cu infrastructura, Benny Sevinger, tabata presente pa e ocasion hunto cu representantenan di FCCA manera sr. Peter van Poppel y sr. Jose Paula.

Prome Minister Eman, “Nos tin un veld caba ta desaroyando na Bushiri, cu ta hopi avansa tambe, e siguiente barionan, segun e plan, ta Cura Cabai, Sero Patrishi, Mabon y diferente otro bario. Nos ta papiando tambe cu clubnan deportivo pa mira si hunto cu e clubnan por realisa mas di e mini-veldnan di futbol aki di yerba artificial,” Sr. Eman a splica.

Minister Sevinger a bisa di ta hopi contento cu, hunto cu FCCA y e bario mes, ta pone e prome piedra pa e mini-veld aki den Madiki Kavel. “Mi tin di bisa cu e proyectonan aki ta bini directamente di Minister President, cu ta cana tur diahuebs den e barionan, hunto cu Team BoBario, y ta mira e diferente necesidad y deseonan di e bicindario, particularmente den e caso aki, esunan relaciona cu infrastructura.” Sevinger ta splica cu una bes cu determina y analisa e necesidadnan, ta comunica esaki na e team cu ta traha riba e tipo di proyectonan aki. “Den e caso aki FCCA a yega na e conclusion cu aki na Madiki Kavel ta bon pa tin un veld pa haci deporte y recreacion.” Cu esaki ta duna hobennan di e bicindario un manera pa por recrea nan mes sanamente, pero tambe e veldnan aki por wordo uza pa adultonan cu tambe ta kier tene nan mes sano haciendo movecion.

Jose Paul, di FCCA, a splica cu e bario ta conta cu un total di mas o menos 170 cas. “FCCA ta sinti su mes responsabel pa realisa recreacion pa e bario. Asina nos a contribui den e sentido cu nos a pone e ‘street soccer field’ cu ta un combinacion di tres elemento. E facilidad pa por practica ‘street soccer’, pa mucha y mayornan por haci ehersicio y tambe tin un ‘playground’ mas patras di e veld pa esnan mas chikito.”

Helena Ignacio ta un di e promenan cu a bin biba den e bario di Madiki Kavel, a haya su cas na 1992 tambe tabata presenta pa e ocasion special aki pa su bario. E conoce e bario bon y a wak e bario desaroya e ultimo decadanan aki den un bario caminda cu tin hopi mucha y ta un bario trankil pa biba. Para hunto cu su nietonan cu ta sumamente entusiasma pa cuminsa hunga riba e veld, e ta enfatisa cu, “mi ta hopi contento cu e bario aki, pasobra e ta un bario hopi dushi. Tur e añanan cu mi a biba aki, mi a pasa bon, mi no tabata tin problema ni nada. Y awo, mi ta mas contento y oguyoso di loke nos a haya akinan.”Sra. Ignacio ta splica cu su nietonan, ora cu nan a tende cu ta bin un veld di futbl den nan bario riba e tereno, a cuminsa hunga tur dia riba e tereno ora cu a cuminsa haci’e limpi.

“Pero no ta pa nan so,” Sra. Ignacio ta  mustra den direccion di su nietonan cu un cara alegre, “pasobra ami tambe ta bin.”

Ta premira cu e veld aki ta keda cla den december ainda, mes un tempo cu tambe ta finalisa e trabounan na e mini-veld na Bushiri. Tur e veldnan aki ta inclui yerba artificial y iluminacion.
IMG 9288

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.