Den e ultimo añanan, e palabra “desaroyo sostenibel” a tuma un gran relevancia den e lenguahe politico, economico y social na nos pais.
Den terminonan simpel, un desaroyo sostenibel ta referi na un tipo di desaroyo cu ta uza recursonan disponibel den nos presente, sin tin mester di compromete su existencia den futuro.
Esaki ta algo cu ta zona hopi simpel den boca di nos prome Minister Mike Eman, sin embargo su implicacionnan ta enorme y sigientemente lo mi splica pakiko mi ta keda bisa cu e Gobierno di AVP aki no ta hibando un maneho sostenibel.

E crecemento demografico mundial a bira gigantesco y su ritmo ta parce di no lo tin manera pa stop, especialmente den e paisnan cu ta den via di desaroyo.
Di e mesun manera, e patronchinan di consumo di e poblacionnan aki ta keda bira mas hopi, demandando cada biaha un cantidad mas grandi di necesidad cu den ultimo instancia ta bini for di recursonan natural. Na e preshon aki riba recursonan natural, mester pone aserca e impacto cu esakinan ta causa riba e medio ambiente di e procesonan di agricultura y esnan industrial.
Tur loke cu tin un impacto riba e ser humano mester tin e medidanan husto pa asina enfrenta dicho impacto di e mihor manera posibel. Aki ta unda e concepto di desaroyo sostenibel mester pasa for di teoria na practica.

Sin embargo, aki na Aruba nos por ta testigo cu no tin ningun tipo di maneho sostenibel, manera cu Minister President kier pone tur hende kere. E politicanan ambiental di e Gobierno aki a faya principalmente pasobra nunca a tuma na cuenta e condicionnan economico, ecologico y social.
Ta purbando di cumpra wowo di pueblo cu un sin fin di proyecto cu ta costando nos pais mas di locual nos mes por paga. Y awor cu campaña ta den porta, a cuminsa bek cu strategianan caminda ta hunga cu cifras pa asina pone e pueblo kere cu ta tumando na cuenta e economia di nos como ciudadano.
Pa es motibo, mi ta convenci cu e problema di e Gobierno aki ta bay mas leu cu e egocentrismo di esnan na cabes. E problema di e mal gobernacion di partido AVP mester keda mira for di un perspectiva economico y social.

E rol di un Gobierno cu ta bisa di ta hibando un maneho sostenibel, lo mester ta di incentiva e creacion di mecanismonan cu lo por genera un incentivo economico pa e conservacion di nos medio ambiente (ecoturismo, certificacion pa produccion den sector primario y pago pa servicionan ambiental), como tambe di facilita e acceso na fuentenan di financiamento pa inversionnan den mehoracion di mecanismonan limpi di produccion di energia renobable.
Esaki ta e vision di partido MEP pa un maneho sostenibel. E berdadero sostenibilidad no ta basa riba hasi bunita mientras cu pueblo ta sufri. Un maneho sostenibel ta basa riba prioridad social, economico y ecologico.

Expresionnan haci den e articulo aki no necesariamente ta refleha opinion di ArenaPoliti.co