Ta tuma curahe politico y sinceridad pa cu nos pueblo pa bisa esaki pero PPA ta di opinion cu mirando nos crisis financiero, mirando nos crisis economico, mirando nos crisis social, mirando nos debe nacional, mirando e consecuencianan di hedging, mirando con nos ganashi di Loto ta bai grandemente Canada y masha  poco ta keda Aruba, mirando e pression barbaro cu tur esaki a causa riba nos pueblo di Aruba……esnan responsabel y participante den e crisis enorme aki no por ta participante den e soluccion !! 

Un pueblo cu scoge pa vota pa esnan responsabel y participante na e crisis enorme aki  no ta pidiendo soluccion pero ta permiti e chaos, e crisis pa continua esaki ta e berdad amargo cu nos pueblo lo mester confronta den e lunanan nos dilanti direccion pa eleccion 2017 un eleccion lo marca historia pero tambe e futuro cu nos ta crea pa nos sociedad. 

PPA entodo caso tin e firme intencion di presenta un lista na comunidad arubano cu lo consisti di ciudadano/politico bon prepara pa ta participante na gobernacion y forma parti di representacion di nos pueblo. Un grupo di ciudadano ‘patriotico di curazon’ cu lo worde presenta cu e meta di forma un alternativa serio pa nos comunidad di Aruba. PPA funda pa sr. Juan E. Yrausquin q.e.p.d.  NO ta participante na e crisis financiero/economico/social cu nos pais ta partipante aden. For di oposicion pafor di parlamento nos a sigui duna nos opinion basa un solo criterio esey ta ‘con nos ta sirbi bienestar general di nos pais stima Aruba’ …con nos por contribui na presenta un ‘alternativa cu lo contene un soluccion’ pa un cantidad enorme di problematica cu ta pidi soluccion.

Combinacion Forza Politico Nobo cu Democracia Real ??

Ultimo dianan e locual tin atencion di pueblo y majoria partido politico ta e posibel ‘matrimonio’ entre Forza Politico Nobo di sr. Otmar Oduber ‘mind you’ un partido ainda nos existente cu  Democracia Real di sr. Andin Bikker cu mientras tanto tin basta anja den oposicion den parlamento pero ta conoci cu un bon parti di su periodo nan  a sostene gobierno di AVP !!

E esfuerzo di sr. Otmar Oduber y su Forza Nobo y sr. Andin Bikker di Democracia Real e.p. PPA ta hanja un esfuerzo asina tin un cierto logica su tras. Hopi di esnan cu ta critica esaki ta lubida cu nan mes a worde funda basa riba varios organisacion of durante curso di tempo a forma cu otro partido pa garantisa nan mes un ‘participacion real’ den gobernacion di Aruba.

Aki PPA kier referi cu MEP a worde funda pa politico cu a sali   di  UNA, PIA, PPA y AVP ….y esey a contribui na nan salida cu siete asiento !! Di otro banda AVP cu nunca por a pasa cinco asiento mester a uni cu partido RUBA pa nan a jega hunto na siete pa despues bira un forza politico cu a conduci na locual nan ta awe !!  Cu otro palabra un esfuerzo di sr. Otmar Oduber  cu su Forza Politico Nobo y sr. Andin Bikker cu su Democracia Real tin cierto logica politico aden.

PERO…………???

E locual ta cuestionabel  y esaki seriamente ta e hecho  con ‘lihe’ esaki a worde presenta na pueblo…..! Na prome lugar Aruba ta den un crisis hopi serio y profundo y sr. Otmar Oduber ta directamente co-responsabel pa e crisis y chaos aki !! Sr. Andin Bikker cu tabata hiba un oposicion den parlamento mas cu tur mester ta consciente di e participacion y responsabilidad di sr. Otmar Oduber den esaki.  Sr. Andin Bikker su credibilidad politico a worde mejora un poco basa justamente riba su oposicion  diferente for di MEP den parlamento di Aruba. Pa awor algun dia despues cu sr. Otmar Oduber a kaba di bandona AVP SIN ainda splica su motibo real pakiko e ta bandona un partido cu el a sirbi pa 27 anja bin anuncia un posibel matrimonio politico ta hopi cuestionabel !! Ta tarea principal di e.o. sr. Andin Bikker pa como oposicion den parlamento cuestiona sr. Otmar Oduber diariamente y pressiona pa e berdad sali pa pueblo por sa esaki profundamente. Ta bisto cu sr Otmar Oduber no a conta pueblo e profundidad di e motibo profundo  y  Min Pres Eman tampoco no ta mishi cu esaki. E berdad….busca e berdad…ta e tarea principal di un oposicion na tur momento !! Pa den un tempo ‘record time’ srs Otmar Oduber y Andin Bikker ja por a participa na pueblo nan intencion di purba forma un lista combina….mester pone un pueblo consciente…un pueblo cu sentido comun…..un pueblo cu amor patria  pensa profundamente ……:  Na prome lugar si esnan participante na e crisis, e chaos  por ta soluccion di esaki ? Na di dos lugar con esnan cu tabata como otro te cu algun dia pasa  por ta cla pa sinta den banki di e ‘matrimonio politico’. Esaki ta unda e esfuerzo politico aki cu normalmente mester worde mira como un ‘zet politico logico’  ta worde seriamente cuestiona. Aki ta unda  ‘credibilidad y integridad’ politico di principalmente sr. Andin Bikker y Democracia Real ta worde seriamente atacha den un pueblo consciente di su crisis/chaos bao di cual e ta sufri.  Pasobra un ‘matrimonio politico’ cu un participante major na e crisis…na e chaos ….ta pone Democracia Real of bao di cualkier nomber cu nan scoge pa e ‘forza politico Nobo (??) bira co-responsabel pa esaki y lo mester defende esaki grandemente.

PPA NO TA KERE DEN TUMA ESNAN RESPONSABEL PA E CRISIS DEN NOS SENO !!

PPA como organisacion politico a worde funda 67 anja pasa pa estadista q.e.p.d. sr. Juan E. Yrausquin. Nos ta perdedor di e ultimo eleccionan. Nos no a disparse for di e panorama politico apesar cu varios media di comunicacion a hasi nan esfuerzo pa ‘boycotea’ nos articulonan pa pueblo no por lesa y tende opinion di PPA al respecto.  Pero den tur e  dificultad aki PPA a sigui persisti hibando oposicion di pafor di parlamento y nos lo duna nos opinion al respect tur topico cu nos ta sinti esaki ta necesario. PPA  ta e partido ‘social democrata’  cu mas anja di nos Isla y nos no  ta mara na ningun partido politico. PPA ta neutral y independiente !! Nos ta un partido cu tin den nos concepto e miho ‘vision’ pa desaroyo di pais Aruba durante  tur tempo. No ta por nada cu varios signatura di gobernacion a tuma ‘vision y projecto’ for di programa cu PPA a presenta …esey ta un realidad cu durante cualkier descussion nos por proba anto …documenta. PPA lo ta participante na e proximo eleccion na 2017 y PPA lo presenta un lista di candidato renova  den cual lo tin candidatonan cu lo por occupa e funcion di ejecutivo (ministro) y lo tin candidato cu lo por duna un ‘representacion digno’ na nos comunidad di Aruba. PPA lo no tuma den nos seno esnan cu nos ta considera como ‘ participante y co-responsabel’ na e crisis/chaos causa pa grandemente e dos gobernacion di partido AVP encabeza pa Mike Eman.

En corto …si bo ta parti di e problema, e crisis, e chaos …si abo tin pueblo ta sufriendo…..pa motibo di mal gobernacion y posibel corrupcion…………..bo no por ta parti di e soluccion !! Esey ta un posicion cu nos ta spera cu un pueblo consciente y cu sentido comun lo aprecia y lo sostene.  

PPA lo bin bek cu nos opinion riba desaroyo politico  !!


Aruba, 1 december 2016  
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co