Dialuna awor despues di a cancela e tratamento varios biaha, Parlamento lo trata e presupuesto di Raad van Advies (RvA). E tratamento di Presupuesto di Raad van Advies ta uno den cual no tin mucho debate ya cu ta trata aki di un di e Colegio Halto di Estado banda di Controlaria General di cual mucho no tin di remarca. Pero e biaha aki nos no por keda sin trece dilanti nos preocupacion pa e falta di respet cu nos ta obervando di Gabinete Eman pa cu Raad van Advies como Colegio Halto di Conseho di nos Pais.

Gobierno ta pone CFT contra RvA
Nos ta preocupa pa mira con Gabinete Eman ta bin ta anda cu conseho di Raad van Advies. Ultimo nos a constata cu den e contesta riba e conseho di RvA pa Presupuesto 2017 di nos Pais, Gobierno ta pone CFT contra RvA pa mustra cu RvA ta robes. Cu otro palabra, ora cu RvA ta cuestiona Gobierno, Gobierno ta bira usa frase of conclucionnan di CFT pa asina por contra aresta e ponencia di RvA, sin cu Gobierno ta bira corregi nan eror of purba na splica dicon nan ta di un pesnamento contrario na locual RvA ta remarca den nan conseho. Na 4 ocacion den Presupuesto 2017, riba temanan manera sector collectivo, AZV, Plan di Balanced Budget y fianza pa estudio, Gobierno a usa locual CFT ta bisa contra RvA. E manera cu Gobierno ta scohe aki pa pone CFT contra RvA no ta profesional ni drechi pa trata cu organo halto na nos Pais manera RvA.

Raad van Advies mester subraya e fayo aki
Na bienestar di e democracia di nos Pais y e bon gobernacion cu nos Pueblo merece, na nos humilde opinion, RvA no por sigi laga e falta di respet for di banda di Gobierno sigi acomula sin cu ta informa Pueblo debidamente di esaki. RvA mester subraya e fayonan aki paso ta fayo cu ta atacha e ‘checks and balances’ di nos Pais y Pueblo mester sa di nan pa na nan turno por rechasa e fayonan cu ta stroba nos democracia y e control necesario cu mester tin pa sigura nos Pueblo un bon gobernacion di nos Pais.

Gobierno debe un disculpa
No ta di mas pa menciona cu Gobierno di AVP debe RvA un despensa publico pa tur e falta di respet y fayonan cometi. Pasobra si mira bon Parlamento ta haya leynan pa trata cu ta bin cu seyo irealistico di RvA, pero asina mes Gobierno ta djies pone un banda y dal bay haci y deshaci. Banda di esaki hasta tin minister cu publicamente a bay lastra miembro di RvA pa un conseho duna riba concepto di ley di All Inclusive. E fayonan aki ta inaceptal y Pueblo mester ta conciente di nan pa asina por rechasa nan.

11 december 2016

Expresionnan haci den e articulo aki no necesariamente ta refleha opinion di ArenaPoliti.co