Perspectiva Independiente without background 001

Rene Herdé (AVP): Politica di crea impresion no ta wanta den lus di berdad

Herde40
Ora partidonan y politiconan no tin plannan realistico na interes di Pueblo, nan ta crea e impresion bunita di tin un plan y di sa kico mester haci. Ultimamente nos ta wak hopi di esey den politica na Aruba. Partidonan y politiconan cu no ta analisa un topico of studia un materia drechi, pero ta bay tras di loke nan ta tende y lesa riba Facebook. Politiconan cu solamente ta busca un solucion pa corto plazo ta crea e impresion di tin un solucion pa un problema, pero nan no ta bisa kico ta e consecuencia di nan "solucion" pa nos pais. Politiconan y partidonan cu ta core bay para banda di un grupo di hende awor pa duna sosten sin duna solucion, ta crea e impresion di ta na banda di e grupo, pero despues ta bira lomba ora otro interesnan surgi. Tur e formanan di hiba politica aki ta cay bou di e categoria di "POLITICA DI CREA IMPRESION". Den e lunanan cu ta bin prome cu eleccion na september 2017, pueblo lo wak mas di e politiconan y partidonan cu ta bay crea tur sorto di impresion bunita pa gana voto. Tin un forma simpel pa desenmascara e politiconan cu ta djies crea impresion sin tin solucion real pa niun situacion of niun plan pa sigui hiba nos pais dilanti! E forma simple aki ta di puntra y sigui puntra nan con nan ta pensa di realisa nan plannan y  kico ta e consecuencia di nan "proposicionnan". E realidad ta cu niun politica di crea impresion ta wanta e presion di berdad y echonan. 

EHEMPEL 
Ata aki algun ehempel di e "POLITICA DI CREA IMPRESION" cu nos a nota ultimo tempo na Aruba y con a desenmascara esaki.
MEP a crea e impresion cu penisonadonan tin cu paga pensioen di biehez. Hasta e lider di MEP cu ta un experto di belasting ta bisa esey. MEP ta crea e impresion robez aki pa por priminti cu nan tin un plan pa kita belasting riba pensioen di biehez. E realidad ta cu ya niun hende ta paga belasting riba nan pensioen di biehez (aov). Henter e suma di AOV ta liber di belasting. Ta ora hende haya otro entrada of pensioen di otro fondonan riba e pensioen di biehez, ta cuminsa paga belasting riba e suma adicional. Den e caso aki ya e berdad a kita e impresion robez cu MEP kier a crea.

MEP y PDR kier a crea e impresion cu ta nan a habri e refineria. Uno door di biaha hopi pa Venezuela y papia cu su amigonan y e otro door di entrega un mocion. E realidad ta cu ta door di trabou di hopi tempo y cu un grupo di experto Arubiano, a logra haya e compania CITGO pa sera un contracto pa habri e refineria bou di un concepto nobo. E realidad ya a elimina e impresion robez aki cu MEP y PDR a purba crea.

MEP pa hopi aña a crea e impresion cu e ta na fabor di trahadornan na Aruba, pero ora di aproba leynan laboral na fabor di trahadornan, MEP a vota contra! Awor MEP ta bisa trahadornan di SERLIMAR cu nan ta contra pa sera e dump na Prikibos pasobra e trahadornan ta preocupa pa kisas perde trabou. Pero MEP NO ta bisa e habitantenan di Prikibos, Simon Antonio y Barcadera, con ta bay elimina e problemanan cu e dump den su forma actual ta causa. E realidad ta cu AVP a cuminsa cu bisa cu ta bay sera e dump y bin cu un sistema moderno y limpi pa deshaci di e sushi. Tambe gobierno di AVP a sigura e trahadornan di SERLIMAR nan trabou. Aki atrobe e impresion cu MEP a purba crea serca e trahadornan no ta sincero, pasobra MEP no tin idea con pa atende cu e problema di sushi y soluciona e problemanan di e dump na Prikibos. Ta masha cla, e politica di crea impresion no ta wanta lus di solucionnan di berdad. E politica di crea impresion ta un fli bieuw cu no ta bula mas!

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.