Gabinete ME II: Compaña pa Prome Minister Mike Eman, Minister Sevinger a anuncia trabounan grandi cu ta tumando lugar den Caya Grandi
Gobierno di Gabinete Mike Eman I y II no solamente a traha y ta trahando riba desaroyo di Oranjestad, pero e area rond di e centro. Den un conferencia di prensa dialuna mainta, Prome Minister Mike Eman y Minister di Infrastructura Benny Sevinger, tabata hunto na e remise, (e garashi unda e tramnan ta staciona), cu ta forma parti importante di e plan desaroya door di e Gobierno. E ta e conexion entre Waf y centro di Oranjestad cu ta wordo frequenta hopi mes pa e turistanan cu ta yega Aruba via crucero.
Gobernacion di Gabinete Mike Eman I y II, considera e arkitecto di e Aruba moderno, a traha un plan grandi pa renobacion y revitalisacion di Centro di Oranjestad y areanan den bisindario.
Despues di renobacion di centro, a cuminsa riba e cayanan na banda cualnan proximamente e Ministernan lo bishita pa mira con esaki ta kedando.
Mientras cu ta trahando riba e cayanan entre misa di Playa y L.G. Smith Blvd, a cuminsa realisa e trabounan necesario tambe na entrada di waf, cu ta e Welcome Plaza y areanan rond y e conexion di salida di waf cu ta wordo conecta cu Caya Grandi. E conferencia a tuma luga den e area net pariba di e Remise cu lo bira Plaza Rancho. Durante e conferencia di prensa Minister Sevinger a splica cu Plaza Rancho ta e conexion entre Welcome Plaza y Schelpstraat pa bay den Caya Grandi.
A bini dilanti cu entre e areanan aki tur e caminda pa peatonnan uza ta wordo renoba mientras cu lo tin algun cambio mas. Ta habri un caminda for di Paardenbaaistraat cu ta yega te na e ex-parkeerplaats unda ta bay construi un Parkeer Garage cu ta duna espacio tambe pa sali riba Avenida Alo Tromp. Tambe a bini dilanti cu lo traha dos kiosko pa move esnan actual pa e otro banda di e parada di Arubus. "E parkeer garage ta duna espacio pa esnan cu ta bishita Caya Grandi y trahadonan di Caya Grandi cu por subi e tram eynan mes cu ta hiba nan te den centro." Minister Sevinger alabes a anuncia cu diabierna awor lo bira conoci cua ta e contratista cu a gana e proyecto di Plaza Rancho.
Gabinete Mike Eman II no enfoka unicamente riba construccion, pero tambe embeyecemento di e area banda y rond di e remise comokiera cu ta e prome impresion cu e turista ta haya ora cu e subi e tram. "Ta bay planta hopi mata y yerba pa duna un bista berde di e trayecto."
E anuncio di e trabounan aki a wordo haci dialuna, pasobra denter di poco ta sigui bay un tiki mas leu cu e trabounan di embeyecemento y ta yega na turno e area di Rancho.
"Nos ta bezig na hopi parti di Aruba. Ainda nos ta trahando riba e barionan y poco-poco nos ta sigui anuncia e diferente proyectonan," Minister Sevinger a finalisa bisando.
Expresionnan haci den e articulo aki no necesariamente ta refleha opinion di ArenaPoliti.co