Perspectiva Independiente without background 001

Mike Eman: Ta sigui tuma paso den progreso di Aruba su economia, calidad di bida y como producto

Benny Mike01
E resultado positivo ta keda bes mas visibel


“Awe un siguiente paso den e progreso di nos pais a wordo tuma,” asina Prome Minister Mike Eman a cuminsa hiba palabra dialuna mainta ora el a compaña Minister di Infrastructura den anuncio di construccion di Plasa Rancho patras di e stacion actual di Arubus na L.G. Smith Boulevard.

E mandatario a recorda con ora a asumi mando di e pais, a haya un Aruba den un crisis economico, den deterioro no solamente di e producto turistico, pero tambe den barionan, scolnan y espacionan publico. E momento ey a opta pa inversion y asina atende tur reto.

Estimulo pa medio di inversion local a yuda saca Aruba di e crisis, crea cuponan di trabou y haci di producto Aruba uno mas atractivo, eliminando e deterioro for di centro di ciudad. E resultado ta un hecho si wak e cifranan cu Banco Central a anuncia siman pasa caminda e consumo local di turistanan a aumenta.

“Semper nos a bisa si nos mehora e calidad di producto nos ta haci dos cos pareu;  nos ta haci Aruba mas agradabel y miho calidad di bida pa e habitante, pero tambe un pais mas fuerte pa competi cu resto di Caribe cu un producto mas organisa,” asina Minister President Mike Eman a indica.

Otro prueba di e resultadonan positivo ta e comentario cu ta hayando for di diferente socio manera ta e sector hotelero, aereo y di crucero. Despues di cinco aña di inversion continuo, awe Aruba ta para cu un producto mas fuerte compara cu resto di Caribe. “E vision aki ta cumpli cu un meta grandi di nos Gobierno. No tabata kier mas division entre progreso di turismo y baymento atras di e poblacion,” segun Premier Eman.

E propio mandatario a papia algun dia atras cu lider di sindicato grandi di Aruba y a compronde cu e negociacion di CAO na hotelnan ta bayendo miho pasobra e cambionan cu a wordo introduci caminda ta mira rendimento di hotelnan ta creciendo pasobra e producto Aruba ta creciendo. Den nan perspectiva, cada bes nan mira cu hotel ta bay bon, ta trabou di e sindicatonan pa busca e beneficio pa e trahadonan.

Na esey el a referi bisando: “Esaki ta esencial den e vision di Aruba. Ora lama lanta, tur boto mester lanta. Ora hotelnan por pidi mas pa e pais aki pasobra ta bon organisa y ta respira un ambiente di calidad, no ta nan so ta crece, pero hunto cu nan cada empleado, cada chauffeur di taxi mester crece tambe.”

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.