Ademas di percura cu e producto turistico ta keda competitivo pa consolida su futuro como pilar economico, Gabinete Mike Eman ta sigui traha riba e renobacion di e isla completo como un estimulo pa e economia local y pa hisa e calidad di bida di e ciudadano.

Durante e anuncio haci dialuna di construccion di conexion entre Welcome Plaza y Caya Grandi, e mandatario a confirma cu 2015 ta un aña caminda atrobe diferente districto rond Aruba, ta bay conoce un mehoracion.

“Hopi di e trabounan aki tin di haci cu cambionan fisico, inversionnan den infrastructura, restauracion di edificio cambionan importante di vision, con bo ta interconecta e parti comercial, parti industrial, parti historico y parti civico di nos sociedad den un vision total cu ta sostene otro.,” asina Prome Minister Mike Eman a bisa.

E trabounan cu ta andando den centro di ciudad ta cubri adicionalmente e embeyecemento di Ranchostraat, Schelpstraat y Weststraat, entre otro y ta acopla nan na e centro di ciudad. Den futuro e trabounan aki ta sigui den direcion di Socotoro y Companashi. Mescos ta sosode simultaneamente na otro barionan.

E mandatario a duna di conoce cu proximo siman ta bay atende cu proceso di destaho publico pa, entre otro, e renobacion rond misa di Santa Cruz. “Henter area rond di misa di Santa Cruz y lo percura pa un infrastructura cu ta mehoracion di calidad di bida den un districto importante manera Santa Cruz,” tabata palabranan di Premier Eman. Banda di esey tin proyectonan riba mesa na Noord, Jaburibari, Simeon Antonio y Dakota.

Pariba di brug ta vislumbra cambionan grandi tambe cu ta inclui den e proyecto di Green Corridor. E avenidad di cuater via di Oranjestad pa San Nicolas ta bay drecha hunto cune Pos Chikito, Savaneta Yara y Zeewijk te San Nicolas y e area di Weg Seroe Preto. Tur lo conoce un renobacion di infrastructura pa cuadra cu e caminda nobo y importante aki.

“Asina poco poco y hunto cu un Hospital nobo, hunto cu desaroyo di waf di container nobo, hunto cu avenidad Watty Vos rond di centro di ciudad, nos ta cambiando e perspectiva economico di nos pais caminda mobilidad y prosperidad economico ta bira un oportunidad real y por papia di un desaroyo nobo cu ta yega na nos bario, na nos scolnan y na e calidad di bida den cada skina di nos pais,” asina Premier Eman a bisa gradiciendo su colega di Infrasturcutra, Benny Sevinger pa e responsabilidad grandi cu e ta carga den e vision aki.

Expresionnan haci den e articulo aki no necesariamente ta refleha opinion di ArenaPoliti.co