Perspectiva Independiente without background 001

Partido Hulandes cu proposicion impactante pa islanan den reino Hulandes

170314 sylvana simons ArenaPoliti.co a repasa un cantidad grandi di programa electoral di partidonan Hulandes, buscando proposicionnan nobo cu ta impactante pa Aruba y e otro islanan Caribense den reino Hulandes. Por lo general por bisa cu e atencion pa e islanan ta pober. Mayoria partido ta sea hopi breve cu nan plannan pa e islanan, of no ta menciona e islanan den nan programa.

Artikel 1
Un partido cu a resalta pa loke nan ta propone pa e islanan ta e partido nobo Artikel 1. Artikel 1 ta wordo lidera pa Sylvana Simons (foto ariba) y e lista di candidato ta inclui e Curasoleño, psikiatra transcultural y presidente di Overlegorgaan Caribische Nederlanders (OCaN), Glenn Helberg (foto abou). E nomber di e partido ta referi na articulo 1 di constitucion Hulandes cual ta trata di igualdad y ta prohibi discriminacion a base di e.o. religion, rasa, sexo y color politico. Igualdad ta e tema principal di e partido aki y nan ta extende e concepto aki en coneccion cu e relacionnan entre paisnan den reino Hulandes tambe.
Nan punto di bista pa loke ta trata e relacion den reino Hulandes entre Hulanda y e islanan ta mustra di ta bin for di un perspectiva di (ciudadano di) e islanan mes, den contraste cu wak e situacion solamente for di perspectiva Hulandes.

Artikel 1 ta considera e relacion entre Hulanda y e islanan mucho colonial. Segun e partido, habitantenan di e islanan no ta haya un trato igual cu esnan na Hulanda. Artikel 1 tambe ta menciona e deficit democratico cu tin den reino Hulandes. Nan ta mustra riba e punto cu e islanan te ainda tin menos di bisa den reino Hulandes, incluyendo riba cierto decision for di Hulanda cu ta afecta e islanan.

Representacion di islanan den Tweede Kamer
Como un solucion pa e deficit democratico, Artikel 1 ta propone pa ‘reserva’ algun asiento den Tweede Kamer (Parlamento Hulandes) pa e islanan. Pues ciudadanonan di Aruba, Boneiro, Corsou, Saba, Sint Eustatius y Sint Maarten lo por vota exclusivamente pa eligi algun parlamentario pa Tweede Kamer, dunando e islanan representacion directo den Parlamento Hulandes. 

Un idea similar cu no a bay mesun leu ta di e partido Hulandes ChristenUnie, cual den pasado a propone pa reserva un (1) asiento den Tweede Kamer pa e islanan BES (Boneiro, Sint Eustatius y Saba) considerando cu e islanan aki desde 2010 ta forma parti di Hulanda como ‘openbaar lichaam.’ E programa di ChristenUnie pa eleccion venidero no ta inclui e idea aki. E idea pa reserva algun asiento pa e islanan, incluyendo Aruba, Corsou y Sint Maarten, ta algo cu ArenaPoliti.co no a nota serca ningun otro partido politico Hulandes. E idea riba su mes no ta algo completamente nobo.
170314 glenn helberg Pakico mester di representacion den Tweede Kamer
Hopi lo pensa cu e islanan autonomo den reino Hulandes (Aruba, Corsou y Sint Maarten) no mester di representacion den Tweede Kamer. Nos mester tene na cuenta cu Gobierno di reino Hulandes (pues incluyendo e islanan) defacto ta Gobierno di Hulanda. Gobierno di Hulanda ta wordo eligi a base di e resultado di eleccion parlamentario di Hulanda. Gobierno Hulandes mester conta cu sosten di Tweede Kamer y mester responsabilisa su mes na Tweede Kamer y e ciudadanonan na Hulanda. Pues Gobierno Hulandes, como Gobierno di reino, por tuma decisionnan cu ta afecta e islanan sin mester responsabilisa su mes na parlamentonan di e islanan, mientras cu e ciudadanonan di Aruba, Corsou y Sint Maarten no tin ningun influencia riba Tweede Kamer y e Gobierno Hulandes. Pa loke ta trata e aspecto aki, ciudadanonan di Hulanda tin mas di bisa den reino Hulandes cu ciudadanonan di e islanan autonomo den reino Hulandes. Simplemente bisa, den reino Hulandes no tin igualdad entre ciudadanonan di Hulanda y ciudadanonan di e islanan.
Mester remarca cu e islanan BES tin derecho di voto pa eleccion di Tweede Kamer, pero a pesar di esaki tambe tin descrepancianan pa loke ta trata igualdad.  

Geschillenregeling
Varios partido Hulandes tin e proposicion di bin cu un geschillenregeling den nan programa. Esaki ta algo cu Aruba, Corsou y Sint Maarten ta boga p’e pa basta aña caba. E geschillenregeling lo mester ta un forma pa regla conflictonan legal entre e paisnan den reino Hulandes. E ta algo necesario y e lo yuda cu e desigualdad cu tin den reino Hulandes, pero e no lo resolve e deficit democratico pasobra e ta laga e falta di representacion di ciudadanonan di e islanan intacto.

Expectativa pa Artikel 1
Segun encuestanan e expectativa pa partido Artikel 1 ta cu nan no lo logra haya asiento. Mester remarka cu ciudadano Hulandes cu decendencia di otro pais ta relativamente menos representa den encuestanan. Pues partidonan cu ta mustra di tin relativamente mas sosten di e grupo aki, cual ta e caso pa Artikel 1, por ta miho para cu encuestanan ta indica. 
Eleccion di Tweede Kamer ta tuma luga diaranzon 15 di maart 2017. 

Update: Partido Artikel 1 no a logra haya asiento den e eleccion di 15 di maart 2017. 

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.