Perspectiva Independiente without background 001

Loke bo mester sa di: Provinciale Statenverkiezingen

StembiljetHulanda
Mientras cu diaranson 18 di maart pueblo di Aruba lo ta celebrando nos dia di Himno y Bandera, na Hulanda mas di 12 miyon hende lo por sali y eherce nan derecho di voto pa e asina yama Provinciale Statenverkiezingen*. Segun Prome Minister Mark Rutte e Provinciale Statenverkiezing 2015 lo por wordo mira como un referendum ariba e maneho di e Gobierno Hulandes di VVD-PvdA.

*Na e ultimo Provinciale Statenverkiezing na 2011 un total di 7 miyon persona a vota. Esaki a resulta den un victoria pa VVD (19.57%) sigui pa PvdA (17,32%), CDA (14,12%), PVV (12,44%), SP (10.16%), D66 (8,37%), GROENLINKS (6,3%) etc.

Kiko ta Provinciale Staten?
Hopi hende na Hulanda (y na Aruba) no ta na altura di e mandato di e Provinciale Staten. E Provinciale Staten ta e gobierno regional y ta fungi como coneccion entre e Gobierno di Reino1 y e gobierno na nivel municipal (por ehempel Rotterdam). E tarea principal di e provinciale staten ta pa controla e maneho ehecuta pa e 'college di gedeputeerde staten', cua ta responsabel pa e maneho diario di e provincia. Hulanda ta conta 12 provincia, y den cada provincia por vota pa representante nobo. Pues esnan cu ta biba na Den Haag, Leiden y Rotterdam lo vota pa eligi miembronan di e Provinciale Staten di Zuid-Holland. Esnan na Amsterdam lo vota pa Provinciale Staten di Noord-Holland.

provincieshulanda1

Importancia politico di Provinciale Staten
E Provinciale Staten ta responsabel pa e maneho di economia, cultura y planificacion di teritorio na nivel regional. Pero esaki no ta tur. E miembronan di Provinciale Staten tambe ta scohe e representantenan den Eerste Kamer di Hulanda. Na Hulanda, e tarea di e Eerste Kamer ta similar na esun di e Gobernador di Aruba. Pues ora cu Tweede Kamer (Parlamento) pasa un ley, ta Eerste Kamer ta controla si e ley ta compatibel cu e constitucion y despues ta ratifica esaki.

Un bon ehempel di e importancia poltico di Eerste Kamer ta e crisis na fin di 2014. Na december 2014, tres senador di PvdA a nenga di aproba un ley di un minister di VVD. Tabata trata di un cambio di ley cu lo fortalese e posicion di companianan di seguro y limita e derecho di un pashent pa kies su mesun dokter. Despues di dos dia di deliberacion y promesa di minister Schippers, e senadornan aki toch a dicidi di aproba e ley. Asina ta cu un crisis causa pa miembronan di Eerste Kamer a hera tumba gobierno di Hulanda.

Pa partidonan politico ta importante pa tin representacion den Eerste Kamer, y pa un gabinete na mando ta importante pa tin un mayoria den Eerste Kamer tambe. Esaki ta practicamente garantisa cu e leynan cu pasa door di Tweede Kamer no ta wordo stroba den Eerste Kamer.


Diaranson 18 di maart
Segun e ultimo sondeo di Ipsos, e retiro di dos prominente di VVD, entre nan minister Opstelten, no tabata tin mucho consecuencia pa e preferencia electoral di pueblo Hulandes. Sin duda, partidonan VVD y PVDA lo bay sali riba caya e dianan venidero pa asina convence mas hopi hende posibel pa sali bai vota. 

Maske cu e Provinciale Statenverkiezing ta un eleccion cu hopi no ta mucho interesa aden, e derecho di voto ta algo sagrado y ArenaPoliti.co ta apela na tur Arubiano residencia na Hulanda pa eherce nan derecho di voto riba 18 di Maart. Niun idea pa ken bo kier vota? Kisas esaki por yuda: stemwijzer.nl

1Gobierno di Reino ta consisti di e Ministerraad di Hulanda + e ministernan plenipotenciaro di Aruba, Curacao y Sint Maarten (+ Rey).

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.