Hulanda a menasa di interveni! 

Den Haag -- Un di e temanan mas pisa cu a wordo trata na Hulanda ta e tema di Integridad. Durante e debatenan riba e tema aki dos aspecto a resalta.

MINISTERIO PUBLICO
Hopi parlamentario a sali di e punto di bista cu Ministerio Publico tin un rol importante di hunga den esaki.
Den cualquier pais Ministerio Publico ta cuminsa investigacion di propio iniciativa si e tuma nota di indicacionan of acusacionnan di actonan cuestionable y iregular. Por ehempel e tantisimo veredictonan den cual huesnan a dicta den casonan di rectificacion contra e ministernan Paul Croes cu e asunto di permiso, Michelle Hooijboer cu e asunto di seguro y Otmar Oduber cu e asunto di ex Bushiri Hotel. Den cada un di e casonan aki hues a haya cu e ministernan a actua cuestionabel y no a duna suficiente cuenta di nan decisionnan. Den algun caso e palabra "corruptie" y "omkoping" a cai. Pero ningun di esakinan Ministerio Publico a investiga di propio iniciativa, pa siquiera kita duda di actonan coruptivo.
"Tambe tin e caso di keho penal entrega contra ministernan cu Ministerio Publico no ta investiga si esun cu hasi e keho mes no por prueba cu e minister a horta placa pa su mes, un prueba cu nos como parlamentario no por duna y pesey ta pidi Ministerio Publico pa siquiera hasi un vooronderzoek pa kita tur duda" segun lider di MEP Evelyn Wever-Croes a expres durante e reunionnan na Den Haag.

Debi cu esaki no ta tuma lugar na Aruba, ministernan ta sigi actua manera cu nan kier, sin duna cuenta, y asina dia pa dia ta crea mas duda den nan integridad.

HULANDA KIER INTERVENI
No ta por nada na fin di e reunion Hulanda a presenta un prosicion pa otro maatregel den forma di un Rijkswet pa bin cu un INTEGRITEITSKAMER den cual ta bin cu un comision similar na CFT pa supervisa integridad di nos gobernantenan. "Naturalmente nos di MEP ta contra esaki pasobra nos ta bolbe entrega autonomia! Nos ta conciente cu algo mester pasa, cu cos no por sigi asina y cu mester pone un stop na tur e corupcion riba nos isla. Pero nos no kier mira otro parti di nos lucha wordo entrega djis pa iresponsabilidad di Mike Eman y su ministernan. Na final nos a logra pospone e discusion di e Rijkswet aki pa sigiente IPKO cu lo ta na Sint Maarten na Januari. Pero mientras tanto, laga esaki ta un senjal y aviso pa Mike Eman y su ministernan cu nan mester comporta nan mes segun regla, ley y principionan di bon gobernacion sino Aruba ta bai haya un otro intervencion di Hulanda y perde mas di su autonomia" segun lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co