ORANJESTAD - Lider di MEP Evelyn Wever-Croes pa un tempo caba ta hasiendo investigacion riba violencia domestico aki na Aruba, en especial violencia contra hende muher. Den e cuadro aki nan a bishita diferente instancia, entre otro Fundacion Hende Muher den Dificultad, Bureau Slachtofferhulp, Procurador General, Cuerpo Policial caminda nan a papia cu sra. Trudy Hassel, y cu Bureau Slachtofferhulp. Tambe a reuni cu Bureau Vrouwenzaken.

“E problema di violencia domestico, especialmente violencia contra hende muher, ta hopi serio na Aruba. E problema mas grandi ta cu nos no sa den cuanto famia tin victimanan di maltrato di parti di nan pareha. Locual si nos sa ta cu recientemente a tuma lugar un caso hopi serio, cu a termina lagando e victima cu daño severo. Tin hende muhernan cu ta wordo maltrata pa nan casa pa hopi aña, y tanten cu nan mes no realisa cu e maltrato mester stop, nan no por haya yudansa. Ta wordo calcula cu mas o menos 10 mil hoben ta lanta den hogarnan cu e violencia aki, y asina e hobennan por haya e impresion eroneo cu violencia domestico ta algo normal. Esey ta preocupante. Ademas, na Aruba nos no ta hasiendo suficiente na concientisacion. A base di nos investigacion nos ta preparando un lista di diferente puntonan di accion cu nos lo implementa mesora cu nos ta den gobierno. Entre nan, e mas importante ta cu mester traha riba un infrastructura hopi cla caminda cu e tereanan ta wordo bon reparti entre tur e instancianan concerni. Y pa asina tur hende sa di antemano ki caminda nan tin di cana. Te awe ainda victimanan no sa exactamente unda pa yama, of kiko pa hasi. Mester forsa, y si por, obliga, instancianan pa raporta casonan di violencia domestico na un punto central, talves Bureau Slachtofferhulp. Tambe mester apunta un ‘vertrouwensarts’ pa atende cu e casonan aki. Di parti di gobierno mester invertí den e instancianan cu ta atende e casonan aki. Por ehempel Bureau Slachtofferhulp ta traha den circumstancianan hopi deplorable. Fundacion Hende Muher den Dificultad ainda ta depende di donacionnan pa cubri gastonan operacional, y mester expande su facilidad, pasobra e Fundacion aki ta esun indica pa brida ayudo na un victima di violencia domestico y su famia den casonan di urgencia, of di peliger. Y urgentemente mester traha na prevencion pa medio di concientisacion, especialmente bow di nos hobennan. Como comunidad nos mester para hunto y bisa NO na violencia domestico, especialmente violencia contra hende muher. Na Aruba ultimo añanan nos no a hasi suficiente riba e tereno aki, nos ta trata e tema aki ainda demasiado manera un tabu. A yega e momento pa riba tur nivel, den Parlamento y den Gobierno nos discuti riba e tema aki pa nos bin cu un solucion. Nos mester por garantisa tur victima di violencia domestico, cu nos tey pa yuda nan”, segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co