Awe atrobe, pa di tanto biaha den e ultimo añanan, e fraccion di MEP no a presenta pa un reunion importante cu a wordo yama oficialmente manera tur otro reunion. E fraccion di MEP tabata bon na altura di e reunion. E miembro di MEP Addy Thijsen tabata cana rond y combersa cu miembronan di AVP prome cu e reunion. Nan no por bisa cu nan no tabata sa of cu nan no tabata prepara. Nan a haya tur informacion mescos cu tur otro miembro. Nan a haya e mes un tempo pa prepara y nan a hasta saca potret pa mustra cu nan ta bishita instancianan pa haya informacion. Sinembargo ora e reunion di Comision Central a cuminsa awemainta 10'or, ta solamente e 13 miembronan di e fraccion di AVP tabata presente.

REUNION DI PROCEDURA
E reunion di awemainta tabata pa prepara pa e reunionnan publico cu ta bay tuma luga.  Tin diferente forma pa e miembronan haci nan preguntanan y haya informacion riba e leynan. E miembronan por haci nan pregunta verbalmente den e reunion di awemainta of ta entrega nan preguntanan scirbi. Pero ta den e reunion di Comision Central ta dicidi hunto con ta trata cada tema y cada reunion. E Comision Central a dicidi di laga tur reunion tuma luga sin manda mas pregunta nobo pa e ministernan y mantene e derecho di cada miembro di haci tur nan preguntanan durante di e reunion publico. Di e forma aki no ta tarda pa yama e reunionnan y cada minister lo mester ta prepara pa contesta tur e preguntanan di e 21 miembronan di parlamento den e reunion mes. Esaki ta completamente di acuerdo cu Reglamento di Orden di Parlamento. Comision Central semper ta scohe e forma cu ta trata tur tema, tur ley y tur reunion. Pero mirando e urgencia pa trata tur e leynan, entre otro e presupuesto supletorio, a scohe pa yama e reunionnan y haci tur pregunta den e dos bueltanan di cada reunion. Den e reunionnan cada miembro lo tin por lo menos mey ora pa hiba palabra y haci tur nan preguntanan. E fraccion di MEP lo tin pa cada ley en total tres ora y mey pa haci pregunta y remarca riba cada ley. E derecho aki di cada miembro hamas por wordo kita! E derechonan di cambia un ley y trata presupuesto mester keda intacto semper!

AUSENCIA
E ausencia di e fraccionnan completo di MEP y PDR a bira un problema serio pa funcionamento di henter parlamento. Pa tapa nan ausencia sistematico durante di reunionnan importante, e miembronan di e coalision di MEP/PDR, ta grita cu nan derechonan ta wordo viola. E berdad ta cu nan no ta presenta pa trabou, pero despues ta keha y manda carta pa tur instancia pa crea e impresion cu nan no ta haya informacion of cu nan derechonan ta wordo viola. E contrario ta berdad. Nan no ta traha!!!

Expresionnan haci den e articulo aki no necesariamente ta refleha opinion di ArenaPoliti.co