Perspectiva Independiente without background 001

Evelyn Wever-Croes: ‘Integridad’ y ‘screening’ di gobernantenan lo wordo trata durante IPKO

Evelyn05aDos biaha pa anja Parlamentonan di Reino ta reuni, y na principio di januari 2015 esaki lo tuma lugar na Aruba. E delegacionnan di Curacao, Sint Maarten y Hulanda lo ta yegando ya desde diadomingo 4 di januari. Durante e reunionnan ta trata varios tema di interes comun, y pa sondea unda e diferente paisnan por yuda otro riba tereno di salud, energia y ensenjansa.

Un tema cu pa nos di partido MEP ta hopi importante ta e tema di integridad den gobernacion. Manera ta conosi nos ta sumamente preocupa pa e falta di integridad di nos gobernantenan actual, y nos tin 3 anja caba ta insisti pa trata e tema aki den reunionnan di IPKO. E anja aki, durante e reunion na Curacao na januari y na Hulanda na juni, e tema aki a pone especialmente e fraccion di AVP rabia masha hopi mes, y en bes di papia di e problema, nan a lanta cortina di huma y tira culpa riba MEP, siendo cu no ta MEP ta goberna. Pero nos di MEP ta determina cu mester caba cu tanto corrupcion den gobernacion di Aruba.

E corrupcion bou gobierno di AVP ta causante di e MEGA DEBE, pasobra ta debi na e pago di fabornan cu e diferente ministernan mester hasi na esnan cu a financia nan campanja, nan mester a endeuda nos pais di e forma aki.

Awe atrobe nos ta wordo confronta cu e caso masha dudoso di e seguro di studiantenan, den cual tin sospecho cu un minister kier a privilegia su casa. Luna pasa tabata e caso di Bushiri den cual hues a dicta cu e caso di Bushiri ta asina dudoso hinca den otro y cu a duna permiso pa tur hende yama Minister Otmar Oduber CORUPTO. Hues a brinda e minister e oportunidad pa defende su mes, pero te dia di awe e minister no a hasi esey.

Asina nos por mira cuanto caso di corrupcion Mike Eman y su gabinete a hasi nan mes sospechoso di dje den apenas 5 anja. Ta tempo pa Aruba introdusi leynan pa pone un paro na esaki. Nos fraccion tin 3 anja ta bringa pa diferente ley wordo introdusi, entre otro, esun di financiamento di partidonan político, esun di screening di gobernantenan, introduccion di un Ombudsman caminda cuidadanonan por entrega keho, condigo di conducta pa asina evita cualquier duda cu gobernantenan ta privilegiando nan amigo y famianan, manera nos a mira ta sucede asina tanto den ultimo 5 anja. Demas paisnan den Reino tin practicamente tur e leynan aki caba ‘in place’, ta Aruba so falta.

Nos ta satisfecho cu e temanan aki ta wordo trata atrobe, pasobra ta parse cu den Reino tur pais ta haya esaki un punto importante, pero na Aruba so nan ta evita pa e leynan aki wordo introdusi, pa asina nan por sigi cu practicanan dudoso, segun líder di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.