Perspectiva Independiente without background 001

Rene Herdé: Parlamento di Aruba cu strategia pa sigura integridad

Herde12Punto di bista comun di delegacion di AVP, MEP y PDR

Un di e temanan cu semper ta duna motibo pa hopi discucion y acusacion ta e "integridad den gobernacion". Rond di mundo e ta un tema di discucion. Den tur cuatro e di e paisnan di Reino tambe. Tur cuatro pais tabata tin of tin motibonan pa mehora e integridad den gobernacion. Pesey e ta riba agenda di e reunionnan entre parlamentonan di Aruba, Corsow, Sint Maarten y Hulanda e siman aki.

CONSENSO
Pa prome biaha e tres partidonan den Parlamento di Aruba a yega na consenso riba e tema aki. Enbez di acusa otro di ken ta integro of no, a scohe pa presenta un programa of strategia di accionnan pa mehora integridad den gobernacion den futuro. Rene Herde': "Nos kier gobernacion integro awor y den futuro tambe, bou di tur gobierno di tur partido. Esey ta bon pa stabilidad di nos pais. Ta pesey nos ta enfatisa e necesidad di integridad, transparencia y bon gobernacion den tur sentido y na tur nivel di gobernacion. E consenso cu nos a yega na dje ta ensera un serie di tema cu nos lo mester elabora y finalmente ehecuta den forma di ley y reglanan cu nan sancionnan, pa sigura integridad na tur momento y na tur nivel di gobierno. Nos ta haya esaki importante pa stabilidad di nos pais y pa confiansa den nos institucionnan y dirigentenan awor y den futuro. Nos ta haci'e pasobra nos mes kier. No pasobra otro ta haya cu nos mester."

TEMANAN DI INTEGRIDAD
E delegacion di parlamento di Aruba cu ta consisti di tur tres partido, ta presenta un strategia of programa pa mehora integridad den gobierno. E programa tin e siguiente temanan pa atende. Introduccion di un ley pa regla financiamento di partidonan politico, cu e meta pa preveni placa sushi drenta politica di Aruba y pa preveni patronahe y favoritismo den gobernacion. E screening di candidatonan pa bira minister y miembronan di parlamento. E areglo cu tin awor aki entre otro lo mester bira ley. E introduccion di un "ombudsman" como un instrumento pa duna ciudadanonan mas forma y oportunidad pa busca nan derecho den relacion cu gobierno. E introduccion di un areglo pa hende cu ta bati alarma ora nan tuma nota di asuntonan incorecto of illegal. E areglo lo mester duna proteccion legal y posibelmente compensacion financiero pa proteha esnan cu "bati alarma". E introduccion di un "codico di conducta" pa ministernan y miembronan di parlamento. Esaki tin como meta pa preveni mas uso di nan posicion y sigura bon conducta di politiconan bou tur condicion. E areglo aki lo mester tin sancionnan fuerte pa minister y miembronan di parlamento cu viola e codico di conducta politico aki. Final,ente e programa ta ensera mehoracion di transparencia den trabou di gobierno y parlamento y den e relacion entre gobierno y parlamento, pa mehora funcionamento di tur dos. E tema aki lo wordo trata diamars atardi.

Rene Herde': "E tema di integridad no mester wordo mira como algo cu mester tin miedo didje of cu no mester papia didje. Ta net door di trata e tema aki den tur amplitud y den tur transpariencia, ta door di atende cualkier preocupacion "cara a cara", nos por preveni problemanan manera nos a conoce den pasado y manera ta sosode den paisnan rond di mundo. Aki mas cu tur ta conta cu ta miho pa preveni cu lamenta. Partido AVP a cuminsa cu e discucion riba integridad ya den añanan 90 cu publicacion di e rapport Calidad. Ta tempo pa traha riba dje atrobe." 

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.