Apenas dos dia despues cu e lider di MEP a wordo apunta pa bira e representante di parlamento di Aruba den e comision di "integridad" di parlamentonan di Reino, e mes un delegacion di parlamento mester a dicidi di retir'e for di e posicion aki. E motibo ta cu for di momento cu e lider di MEP a haya e funcion, ela cuminsa haci politica partidista cun'e. Den e funcion e lo mester a traha hunto cu miembronan di otro parlamentonan di e cuatro paisnan di Reino, pa haci inventarisacion di maneho necesario pa stimula integridad den gobernacion na tur nivel y den tur e cuatro paisnan di Reino. Envez di cuminsa concentra riba esaki, e lider di MEP a cuminsa ataca hende y crea e impresion cu e ta e persona mas integro den politica na Aruba. Loke a haci cu a bira imposibel pa mantene e lider di MEP den e funcion ey, tabata e articulo cu a sali den prensa diabierna den cua ta crea e impresion cu e reunion esiman aki di parlamentarionan di Reino, lo a conclui cu gobernador di Aruba tabata tin motibo pa interveni aña pasa den gobernacion di Aruba. Pa resto di e delegacion di Aruba esaki tabata dimas y prome cu e reunion a cuminsa diabierna mainta a dicidi cu ta remplasa e lider di MEP den e funcion di representante di Aruba den e comision di "integridad". E articulo ta un mentira completo, pasobra no a ni discuti e tema aki den e reunion e siman aki.

INTEGRIDAD
Den combersacion cu presidente di e comision di Asuntonan di Reino di Parlamento di Aruba, Rene Herde', ela splica mas di e motibo pa a retira sra. Wever-Croes for di e funcion cu ela haya dos dia prome. Rene Herde': "E funcion di representante di parlamento den tur comision ta pa traha den nomber di tur fraccion den Parlamento. No pa traha pa bo mes of pa bo partido so. Sra. Wever-Croes a haci net lo contrario: ela bay haci politica cun'e. Mi a pidi un otro miembro di e comision cu tin e funcion den e comision di integridad, pa duna sra. Wever-Croes e oportunidad pa tuma e funcion, pa duna mas participacion na MEP. Aunke nan mes no kier participa. Apesar di e echo cu tin un envestigacion andando contra di e sra. aki pa e cuenta di banco den e caso di e compania ERIS CRIUS, ami kier a envolve e mas den asuntonan importante asina. Pero ela defrauda henter e delegacion cu loke ela haci. Pa colmo den e articulo cu a sali den prensa, ta gaña cu e reunion di parlamentarionan di e siman aki lo a saca e conclusion cu gobernador lo tabata tin motibo pa interveni, siendo cu no a ni papia di esey den e reunion. Mi a informa presidentenan di e parlamento y comisionnan di e otro paisnan di esaki awemainta. Nan a desaproba esaki y la lagu'e na delegacion di Aruba pa atende. Locual cu mi a haci tambe mes ora. Mi conclusion di e incidente aki ta cu atrobe e lider di MEP ta mustra cu e no ta di confia. Nos por tin diferencia di opinion pero nos mester por confia otro den tur trabou. Con bo kier papia di integridad si e elemento basico di confiansa mes no tey. Nos a dicidi mes ora cu nos no por premia falsedad y oportunismo manera ela demostra. Pesey nos a par'e mes ora!"