"Tur 21 miembro di parlamento di Aruba tin cu haci mas cu presenta na trabou y atende reunion. Nan responsabilidad no ta keda limita nan loke nan bisa y haci, of na loke nan haci como fraccion. Nan ta responsabel tambe pa e funcionamento di henter parlamento. Nan no ta un empleado  cu tin cu haya orden y instruccion di su hefe pa actua y traha. E miembronan di parlamento ta E parlamento di Aruba. Tur 21 tin cu duna contenido y direccion na parlamento. Cada uno tin un voz den tur desicion, directamente of indirectamente. Pesey nan ta co-reponsabel pa tur cos cu parlamento haci. Un empleado di un organisacion of compania por influencia y trece cambio den su compania. Un miembro di parlamento tin e responsabilidad y obligacion pa haci esey den parlamento. Miembronan di parlamento tin e instrumentonan pa haci esaki tambe." Esey ta e punto di bista cu Rene Herde, miembro di parlamento pa fraccion di AVP a trece dilanti durante di e reunion publico pa aproba e presupuesto di Parlamento di Aruba e siman aki. E motibo cu ela expresa e punto di bista aki, ta pasobra e miembronan di e partido MEP ta haci comosifuera nan no tin niun responsabilidad pa carga den parlamento. E fraccion di MEP ta den tur comision di parlamento, tin e mes un derechonan cu tur otro miembro di parlamento y ta exigi den tur cos e mes un trato. Pero nan ta core pa nan responsabilidad pa funcionamento di parlamento y ta mustra dede den tur otro direccion. E siman aki e actitud aki a culmina den nan desaprobacion di e presupuesto di parlamento pa 2015. Rene Herde': "Nan a desaproba e presupuesto cu ta duna autorisacion pa paga tur nan gastonan di telefon, oficina, viahe, etc. Pero nan ta exigi tur esaki si. Nan a desaproba e presupuesto cu ta paga nan salario y beneficionan, pero nan ta prome pa exigi esaki tur luna. Berdad ta cu e miembronan di MEP casi no ta atende reunionnan. Sigur no e reunionnan di e comisionnan fiho. Si nan atende ta uno of dos y semper nan ta laat. Pero si no tene cuenta cu nan, nan ta prome pa bisa cu nan ta wordo discrimina y no ta tene cuenta cu nan. Cu parlamento no ta funciona bon. Esey no por! Sea bo ta miembro di parlamento y co-responsabel mescos cu tur otro miembro di tur otro partido, of bo no ta. Pero cuenta di exigi sin duna di bo parti, ta un mentalidad cu no por accepta di niun miembro di parlamento. Niun miembro di parlameto por core pa nan responsabilidad manera MEP ta purba haci. Bo no por kier ta miembro, pero no carga e responsabilidad cu ta bon cu e funcion." 

Expresionnan haci den e articulo aki no necesariamente ta refleha opinion di ArenaPoliti.co