Perspectiva Independiente without background 001

Cristian Soto Garcia: Tur ta culpabel menos ami!

CristianSotoGarcia01
Sigiendo e eventonan despues di e tratamento di e ley di CAft, por conclui cu popularismo ta e practica cu ta domina entre esnan cu ta na poder of cu kier yega eynan. Un sin fin di show, purbando di gana punto riba e 'accion' di e partido oponente mientras cu nos tin un lista largo di problema cu mester solucion.

Laga nos cuminsa na evalua e nivel di discusion cu ta wordo hiba den nos Parlamento. Donkey, olifante, enano loco y pishi pupu ta algun di e nombernan cu ta sceiro como algo masha normal mes durante reunionan. Sin laga afor traidor, bende patria, bo mama/ruman/tanta y un cantidad di otro cos. Mi ta puntra mi mes si ta reunion di Parlamento ta tumando lugar of ta un curso gratis pa comunidad siña con pa bully otro. E parti mas fastioso ta, cu ta usando e metodo aki pa haña popularidad den nos comunidad, treciendo mas division cu union.

E ta facil pa un politico hunga politikeria door di punta dede riba un otro y bisa ken a hinca nos den debe, pero no ta para keto un rato y pensa: "Kico ami of nos a haci pa preveni esaki di pasa?".
Mi ta bay tuma nos ley di contabilidad como ehempel; Articulo 26 di e ley aki ta duna espacio pa un Minister ortoga na ken cu e haya ta bon un proyecto, unabes cu e ta bou di 100 mil florin. Esaki ta un porta pa corupcion. Es mas, e palabra onderhandse aanbesteding riba su mes ta un porta pa corpucion, como cu pueblo no tin bista pa wak na ken y den kico e placa ta bay. Esaki ta djis un di e hopi buraconan cu tin den nos leynan y e ironico di tur esaki ta, cu e ley aki ta na vigor desde 1989 y yun partido cu a sinta den Gobernacion a sa di trece un cambio den esaki.

Awe nos por scucha con hopi e importancia di transparencia ta pa nos Pais. Pero pa straño cu e por zona, 13 di december 2007, sr. Rudy Lampe a entrega un mocion den Parlamento cu sosten di votacion 20-0 na fabor, pa asina ehecuta e ley di transparencia riba financiamento y subsidio di partidonan politico prome cu elecion di 2009. Sponsoring politico ta un di e motibonan y casi por bisa e motibo mas grandi pa cual nos Pais awe ta financieramente mal para. No tin control di ken ta hincando placa den campaña di un politico y cu cua meta nan ta haci esaki. Mientrastanto, ata nos aki casi 8 aña despues, cu un ley asina importante hinca den lachi!

A yega ora pa trece cambionan necesario den nos leynan. E cambionan aki lo ta poco doloroso pa esnan na poder, pero e ta na bienester di nos Pais. Mane un gran amigo a bisami: Yun herida no ta cura sin un tiki dolor. Pa nos progresa mane Pais, nos mester di personanan cu ta dispuesto di wanta e dolor ey y no cu ta den poder cu e mentalidad: Tur ta culpabel menos ami!

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.