Un reunion publico den Parlamento mester ta un demostracion bibo di nos democracia parlamentario den cual parlamentarionan ta representa Pueblo y controla gobierno, mientras cu ministernan ta duna cuenta di nan maneho. E reunion publico di 2 di mei a termina sin cu gabinete Mike Eman a responsabilisa su mes debidamente na Parlamento, y sin cu Parlamento a cumpli cu su tarea. E reunion publico, den cual mester a trata e ‘status ministerial’ y confiansa parlamentario den minister Paul Croes, relaciona cu e acusacionnan di corupcion, a demostra (atrobe) con e fraccion mayoritario (AVP) deliberadamente ta frustra un tratamento serio y al caso di e asunto en cuestion. Parlamentarionan di fraccion AVP, presidente di Parlamento y ministernan tur ta hunga un rol den mina nos democracia parlamentario sistematicamente, reduciendo nos Parlamento pa un instrumento politico cu ta tolera y defende actuacion contra nos leynan y contra e esencia di nos democracia parlamentario.

Gubernamental vs. penal
Sospechonan di corupcion contra un politico no necesariamente kiermen cu e politico y su partido ta corupto. E forma con un partido ta trata y anda cu sospechonan serio di corupcion, ta bisa hopi di un partido.
Durante e reunion, minister Paul Croes no tawata presente pa duna cuenta na Parlamento. Diferente parlamentario di AVP a expresa cu no mester trata e situacion di sr. Paul Croes den Parlamento paso ta un investigacion andando y paso Parlamento no por ‘sinta riba stoel di juez.’ Sinembargo e peticionnan di oposicion no tawata pa trata e investigacion penal ‘inhoudelijk.’ E peticionnan tawata enfoka riba e aspecto gubernamental di e hecho cu actualmente minister Paul Croes, a pesar di acusacionnan serio relaciona cu su funcion como minister, no a tuma su retiro y a asumi un ‘status ministerial’ cu nos constitucion no ta ofrece como opcion. Ministernan Paul Croes y Mike Eman a limita nan splicacion di esaki na un declaracion sin informa Pueblo y Parlamento debidamente. Ademas ta relevante pa reuni riba e situacion den cuadro di integridad den gobernacion, cual ta inclui e forma di anda cu sospechonan contra un minister den funcion. Lo ta straño si parlamentarionan di AVP berdaderamente no ta compronde e distincion entre e aspecto gubernamental y tratamento di un caso penal.

Lo ta straño si parlamentarionan di AVP berdaderamente no ta compronde e distincion entre e aspecto gubernamental y tratamento di un caso penal.”

Punto di agenda adicional pa desvia atencion
Presidente di Parlamento Mervin Wyatt-Ras (AVP) a mustra di ta busca e limite legal pa loke ta e termino pa yama e reunion, cual tanto MEP y parlamentarionan Bikker (PDR/POR) y Lopez-Tromp (independiente/POR) a pidi na fin di maart pa yama den forma urgente. Sra. Wyatt-Ras a dicidi pa añadi un otro punto di agenda na e reunion aki, cual ta ‘combatimento di crimen organisa,’ cual peticion a wordo haci un siman pasa door di parlamentario Dèsirée de Sousa-Croes (AVP). E peticion di MEP pa trata e dos puntonan di agenda separa (tras di otro) y no pareu no a wordo honra door di presidente di Parlamento Wyatt-Ras.

Parlamentario Dèsirée de Sousa-Croes a splica su peticion pa trata crimen organisa, bisando cu “nos a pidiele paso a bin sali na cla un paar di siman pasa cu aparentemente hopi di e crimennan cometi ultimamente ta bin for di un [1] cabes, y esey ta un ambtenaar, y esey nos kier haya sa kico ta e berdad rond di esaki. Esey ta hopi hopi importante mes pa nos por haya sa di minister, nos tin hopi pregunta pa minister....” 


E punto principal di e punto di agenda adicional a resulta di ta un acusacion di AVP contra MEP, bisando cu MEP ta instrui un famia di lider di MEP pa orkestra atraco. Esey sra. Wyatt-Ras y fraccion AVP a insisti pa trata pareu cu un asunto gubernamental relaciona cu un minister den funcion. A spera cu a lo menos e fraccion di AVP lo a trata e tema di combatimento di crimen organiza den un forma serio, pero a opta pa usa e punto di agenda aki pa haci acusacionnan contra MEP y famia di sra. Evelyn Wever-Croes. Tambe a haci un cantidad di acusacion di e temporada di gabinete Nelson Oduber 3 y 4 (2001-2009). E acusacionnan a wordo haci asina sistematico cu parlamentario Chris Dammers (AVP) a termina su prome discurso bisando cu su coleganan Melvin Tromp, Rene Herdé y Marlon Sneek lo sigui cu e acusacionnan, mientras cu Melvin Tromp a termina su prome discurso bisando cu den di dos tanda MEP “ta haya un tiki mas” di e acusacionnan.

Ta comosifuera cu sr. Eman y parlamentarionan di AVP ta pensa cu, si nan acusa MEP di a haci algo malo den pasado, Pueblo lo ignora loke AVP ta haciendo durante e gobernacion actual.”

Contestacion incompleto
Ora prome minister Mike Eman mester a contesta preguntanan di e parlamentarionan, sr. Eman a laga varios pregunta sin contesta. Sr. Mike Eman tambe a sigui cu acusacionnan di pasado (2001-2009) y a desvia papiando di klinkers y varios otro tema. Ta comosifuera cu sr. Eman y parlamentarionan di AVP ta pensa cu, si nan acusa MEP di a haci algo malo den pasado, Pueblo lo ignora loke AVP ta haciendo durante e gobernacion actual. E enfoke riba famia di sra. Wever-Croes tawata un déjà vu di e forma structural cu sr. Mike Eman y AVP tawata acusa ‘ruman, tanchi, pachi’ y mas famia di sra. Wever-Croes durante campaña na 2013. Kisas ta un señal di loke ta na caminda pa e aña aki. Un otro tendencia cu a wordo aplica sistematicamente ta e practica di purba hustifica actonan no a base di si e ta corecto, pero a base di compara e acto cu actonan similar di otronan den pasado. Sr. Eman tambe a nenga di duna parlamentarionan documentonan relaciona cu e decision pa cu e ‘status ministerial’ di sr. Paul Croes.

Pafo di Parlamento
Parlamento di Aruba ta e organo gubernamental di mas halto di nos pais. Parlamentarionan tin e tarea di representa Pueblo, controla gobierno y tene e ministernan responsabel pa nan maneho y decisionnan gubernamental. Enbes di haci e trabou aki manera debe ser, varios parlamentario (y tambe minister) di AVP ta usa mayoria di nan tempo pa haci/contesta pregunta den Parlamento pa ataca oposicion. Si minister y parlamentarionan di AVP kier acusa miembro di oposicion y nan famia di corupcion, nan por haci esaki pafo di Parlamento, sea den un conferencia di prensa of un otro forma. Haciendo mal uso di e funcion di parlamentario pa frustra tratamento di un tema cu no ta cumbini bo partido, y alabes sconde tras di e imunidad cu parlamentarionan tin dentro di Parlamento, ta un insulto pa e funcion di parlamentario y e Pueblo cu mester wordo representa.

Haciendo mal uso di e funcion di parlamentario pa frustra tratamento di un tema cu no ta cumbini bo partido, y alabes sconde tras di e imunidad cu parlamentarionan tin dentro di Parlamento, ta un insulto pa e funcion di parlamentario y e Pueblo cu mester wordo representa.”

Democracia vs. dictadura parlamentario
Hopi hende ta reclama e gritamento, strobamento y pleitamento den nos Parlamento, cual tanto parlamentarionan di AVP y MEP ta haci. E ta un punto valido pa reclama y e aspecto aki mester mehora. Na mesun momento, no laga esaki pone’bo keda sin realisa con nos democracia parlamentario, e fundeshi di nos sistema democratico, ta wordo mina deliberadamente. Decisionnan cuestionabel di ministernan y presidente di Parlamento Wyatt-Ras por continua pasobra e mayoria den e organo mas halto di nos pais ta tolera esaki. E lider di fraccion di AVP, Marlon Sneek, a recorda parlamentarionan cu ‘ta mayoria ta manda den Parlamento’ y cu esey ta democracia, lubidando cu un parti esencial di nos sistema democratico ta cu mester tene cuenta cu (e deseo di) e minoria den nos pais tambe. Loke sr. Sneek ta referi na dje ta dictadura parlamentario.

Minister y parlamentarionan ta expone algun di e debilidadnan principal di nos sistema gubernamental y electoral. Ta di spera cu partidonan politico duna e asunto aki atencion y presenta posibel cambionan den nos sistema gubernamental y electoral pa percura pa miho gobernacion.

Un parti esencial di nos sistema democratico ta cu mester tene cuenta cu (e deseo di) e minoria den nos pais.”

Candidato nobo
Un pregunta cu ta surgi ta si e parlamentarionan di AVP cu no a hiba palabra durante e reunion ta aproba e actonan di nan coleganan pa frustra funcionamento debido di nos Parlamento, y si nan ta realisa cu nan silencio ta haci nan complice di e modus operandi di nan partido. Un otro pregunta cu ta surgi ta con candidatonan nobo di AVP ta hustifica e metodonan aki di e partido, y si nan lo percura pa un continuacion di esaki si nan bira parlamentario of minister.
Algun punto a base di cual por a trata e reunion diferente:

• Yama e reunion dentro di 1 siman di e anuncio di ministerio publico. Ta trata di acusacionnan serio den combinacion cu un decision pa pone sr. Paul Croes riba ‘non-actief’ pa cual ta na su luga cu e ministernan concerni duna cuenta na e representantenan di Pueblo den Parlamento, pa por lo menos percura pa tin e claridad necesario riba e aspectonan gubernamental.
• Minister Paul Croes lo mester ta presente den e reunion. Si sr. Paul Croes no kier duna cuenta na Parlamento, e lo mester a entrega su retiro y no keda minister. E funcion di minister tin su responsabilidadnan y un di esunnan mas importante ta e deber di duna cuenta na Parlamento. Den e caso cu parlamentarionan haci pregunta cu realmente ta stroba e investigacion penal, ministernan por splica cu no ta na su luga pa contesta e pregunta specifico den un reunion publico.
• No añadi puntonan di agenda cu ta frustra un tratamento al caso. Otro temanan por wordo trata despues. Hasta riba e mesun dia. Por trata e asunto al caso, termina e reunion, y habri e siguiente reunion. Nada straño den esaki. E hecho cu e Reglamento di Ordo di Parlamento no ta prohibi pa añadi puntonan di agenda, no kiermen cu ta etico y responsabel pa haci esaki. 
• Presidente di Parlamento mester honra peticionnan di parlamentario pa un punto di ordo sin retraso inecesario. 
• Ministernan mester duna Parlamento tur documento relevante pa nan por haci nan trabou. Por lo menos ‘ter inzage.’ E presidente di Parlamento y tur otro parlamentario mester exigi esaki. Parlamento tin e poder, y hasta e deber, pa haci esaki. 
• Parlamentario y ministernan mester keda al caso. Presidente di Parlamento por percura pa esaki segun Reglamento di Ordo. 
• Ministernan mester contesta tur pregunta. Parlamento no mester acepta cu ministernan sa keda sin duna contesta. Parlamento tin e poder constitucional pa exigi esaki (y hopi mas) considerando cu ningun minister por keda den funcion sin sosten di un mayoria den Parlamento. 

Previously:
Asiento 22 S01E01 ‘Prome nos purba drecha Reino Hulandes, ban drecha Aruba’
Asiento 22 S01E02 ‘Cambio di sistema pa eligi parlamentario’

Carlos Guiamo | Asiento 22
This email address is being protected from spambots. You need JavaScript enabled to view it.

Expresionnan haci den e articulo aki no necesariamente ta refleha opinion di ArenaPoliti.co