Perspectiva Independiente without background 001

Ki opcionnan tin pa formacion di un gabinete nobo?

170928 formacion di gobierno
E resultado di eleccion ta presenta un dilema pa e partidonan envolvi. Ken tin cu traha cu ken, y den ki forma? Tin diferente manera pa forma un gabinete pero ningun gabinete por wordo forma sin cu parlamento permiti su formacion.

Por ehempel, si un gabinete por conta riba sosten di un mayoria den parlamento, e ora ta papia di un meerderheidskabinet, un gabinete di mayoria. Si no tin un mayoria den parlamento, e ora ta papia di un minderheidskabinet, pues un gabinete di minoria. 

Un otro manera pa diferencia entre gabinete ta e metodo di formacion. Si e fraccionnan no ta inclui den e formacion y no ta compromete nan mes na un acuerdo di gobernacion (regeerakkoord) nos ta papia di un gabinete extraparlamentario. Tambe nos conoce un zakenkabinet cu ta consisti primaremente of completamente di ministernan cu ta bin di pafor di politica. Ultimo añanan Aruba a conoce solamente gabinete mayoritario (meerderheidskabinet). 

Demisionario
Na e momento aki Aruba tin un gabinete demisionario. Un gabinete ta bira demisionario na momento cu e pidi su retiro na gobernador. E status demisionario di un gabinete ta encera cu e gabinete solamente por trata 'asuntonan pendiente' y cu asuntonan 'controversial' mester wordo posponi pa e siguiente gabinete. Mas largo e formacion di un gabinete nobo tarda, mas dificil ta bira pa un gabinete demisionario keda pospone tur asunto 'controversial.' 

Meerderheidskabinet
Nos ta papia di un meerderheidskabinet ora cu e gabinete ta depende di un mayoria den parlamento. Esaki ta e caso ora cu e partido of coalicion tin un mayoria den e parlamento y yega na un acuerdo di gobernacion entre nan mes. Un meerderheidskabinet ta wordo considera stabiel den e sentido cu partidonan envolvi ya caba a palabra y yega na compromisonan pa cu posibel diferencianan di opinion y ta laga sa di tin confiansa den e gabinete prome cu e sinta. 

Minderheidskabinet
Un minderheidskabinet ta consisti di miembronan di partidonan cu hunto no tin un mayoria den parlamento. Mirando cu oposicion tin mas asiento den parlamento, y por blokia proposicionnan cu e gabinete bin cune, e por ta dificil pa un gabinete asina por funciona. Pa cada tema, e gabinete lo mester purba consigui un mayoria den parlamento. 

Por ehempel, si MEP forma un gobierno di menoria cu partido ReD (10 asiento). E ora, MEP lo mester busca sosten di por lo menos 1 miembro di parlamento pa asina por pasa ley. Kende e miembro aki ta, lo probablemente resulta diferente cu cada topico. Si partidonan den oposicion dicidi di semper vota contra en bloque, esaki lo haci'e practicamente imposibel pa busca e sosten necesario. 
Similarmente, si MEP forma un minderheidskabinet cu ReD, partidonan AVP cu POR lo por manda e gobierno cas prome cu e sinta, door di no aproba e gabinete. 

Den Reino, un minderheidskabinet no ta comun. Mastanto, un minderheidskabinet ta wordo crea despues cu un gobierno cay, y ta mantene 'ordo' durante e periodo di transicion prome cu un siguiente eleccion. 

Gedoogkabinet
Un gedoogkabinet ta similar na un minderheidskabinet. Aki e partidonan cu ta forma e gobierno tampoco tin un mayoria den parlamento. E diferencia ta cu un gedoogkabinet por conta riba sosten di un partido cu ta 'tolera' e gobierno. E partido aki ta sera un acuerdo cu e gobierno pa cu puntonan cu e kier mira den un gedoogakkoord. 

Por ehempel, si AVP forma un gobierno di minoria cu ReD (10), anto partido POR ta tolera esaki. En cambio pa nan sosten, POR lo por exigi pa e gobierno tene na cuenta of cumpli cu cierto punto di e programa di POR. 

Gabinete Parlamentario
Un Gabinete parlamentario ta un gabinete den cual e fraccionnan di e coalicion ta hopi envolvi den e formacion y tin influencia riba e contenido di e acuerdo di gobernacion. Pues no solamente e lijsttrekkers ta negocia, pero e fraccionnan tambe.

Si e 18 miembronan di fraccionnan AVP y MEP delibera hunto cu e lijsttrekkers y yega na un conveneo, esaki lo por wordo considera un gabinete parlamentario. Den e situacion aki, lo tin un gobierno fuerte cu tecnicamente lo conta riba hopi sosten den parlamento (18 asiento). Pero e formacion riba su mes lo por tarda masha hopi. 

Gabinete Extraparlamentario
Den un gabinete extraparlamentario, e fraccionnan ta wordo laga afo di e palabracionnan aki.  Den temponan cu e formacion di un gobierno ta mas importante cu opinionnan di partido, por kies pa e sistema aki. Basicamente e fraccionnan ta promete pa tolera e gobierno, tanten e bin. Por ehempel den tempo di crisis, of como e prome gobierno despues di un guerra of calamidad. Embes di un acuerdo di gobernacion, un gabinete parlamentario ta wordo forma a base di un programa di gobernacion. 

E diferencia entre un gabinete parlamentario y extraparlamentario ta sinta den e metodo di forma e gobernacion y tambe den e nivel di envolvimento entre e partidonan y e gabinete. 

Zakenkabinet
Un zakenkabinet ta un gabinete extraparlamentario cu (practicamente) ta consisti solamente di persona cu no ta envolvi den politica. Por ehempel, comerciante y ambtenaar. Den un zakenkabinet tambe por opta pa un combinacion di politico y no-politico / ex-politico y por nombra un minister presidente cu si ta afilia na un partido politico.  

Hulanda a conoce un Zakenkabinet (De Geer I) na 1926, caminda cu na momento cu e gabinete a sinta, 5 di e 11 ministernan (incluyendo minister presidente) tabata persona sin partido (partijloos). Durante e negocacion pa forma un zakenkabinet cu ta consisti di solamente ambtenaar, a dicidi ultimamente pa toch haci un mezcla entre politico y no-politico. 

Un otro ehempel di un zakenkabinet na Hulanda ta gabinete Colijn V (1939) pero esaki a cay despues di apenas 2 dia. E gabinete a wordo forma sin sosten di e partidonan den Tweede Kamer y consecuentemente un mayoria a vota pa manda e gobierno cas. Tin di bisa cu esaki tabata den temponan hopi dificil, apenas 2 luna prome cu comienso di II Guera MundiaI y menos di un aña prome cu Hulanda a capitula. 

Un ehempel mas recien ta gabinete Hodge (2012) na Corsou. E situacion politico na Corsou tabata precario despues di caida di gabinete Schotte. Despues di eleccion parlamentario na oktober 2012, a opta pa un zakenkabinet embes di bolbe forma un coalicion. E zakenkabinet a haya e encargo pa durante un periodo di 6 luna tuma medida pa mehora e situacion financiero di Corsou. Conforme e plan aki, gabinete Hodge a keda instala 19 di oktober 2012 y a entrega su retiro 27 di maart 2013. Gabinete Hodge a wordo sigui pa gabinete Asjes.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.