E Yabi di Exito pa Gabinete Wever-Croes I

(Tempo pa lesa: 4 - 7 minuut)
A22 yabi
Columna 
Asiento 22 | S01E06 

E proceso di formacion entre partidonan MEP, POR y RED a haci cu gabinete Wever-Croes I ta inicia cu varios strike. Pero wega no a caba. Lesa pakico e coalion ta cuminsa cu un deficit di credibilidad, y kico ta e yabi di exito principal pa gabinete Wever-Croes I. 

Ocho siman despues di eleccion Aruba a haya su gobierno nobo. A tarda? Sigur. ‘Pero no compara cu Hulanda,’ algun a argumenta. Un comparacion cu un formacion cu a tuma extremadamente largo no ta haci e tempo di formacion na Aruba menos malo. Mescos cu un comparacion cu otro pais caminda dos siman ta wordo considera mucho largo, no ta haci ocho siman menos bon.

Parti di e motibo cu e negociacion a tarda na Aruba ta nos sistema electoral. E sistema aki tambe ta e motibo cu no ta corecto pa bisa cu Pueblo a escoge e gobierno cu nos tin. Diferente politico ta ‘interpreta’ e resultado di eleccion manera ta cumbini nan. A base di e resultado di eleccion, e partido mas grandi ta den oposicion. Un partido cu a perde hopi voto. E gabinete nobo ta inclui ministernan cu a perde hopi voto. E vote-getter no a asumi su posicion pa representa Pueblo den Parlamento. Tin un mayoria ficticio den Parlamento. Tur esaki ta posibel pa motibo di ‘fayonan’ den nos sistema electoral. Un sistema cu ta riba agenda pa wordo scrutina, actualisa y modernisa, cual ta un bon punto den e plan di gobernacion di gabinete Wever-Croes I. Loke nos no mester haci, ta interpreta e resultado manera ta cumbini nos y bisa cu Pueblo a escoge e gabinete actual. Ta e politiconan di MEP, POR y RED, a base di e espacio cu e resultado di eleccion a duna nan, a escoge pa e gabinete cu nos tin.
Loke nos no mester haci, ta interpreta e resultado manera ta cumbini nos y bisa cu Pueblo a escoge e gabinete actual.”

Credibilidad 
Kico bo ta haya ora tres partido bisa cu e siguiente gabinete mester tin shete minister? Un gabinete di 8,5 minister. Atrobe, nos sistema electoral ta un motibo cu ta haci shete minister a base di e resultado dificil (no imposibel). Y nos tur por y ta haci fout y keda sin premira tur cos. Pa colmo, baha na shete minister na Aruba no ta necesario. Pero loke no mester pasa ta cu e responsabilidad di no cumpli cu e promesa ta wordo hala riba Pueblo, insinuando cu e manera cu Pueblo a vota ta hustifica incumplimento di promesa. Un otro asunto cuestionabel ta con RED a bandona nan punto cu ministernan mester ta vakministers’  y no politico, y a nombra sr. Rudy Lampe, candidato #2 riba lista pa eleccion 2017, como minister. 

Tambe tin e asunto di secuencia pa ken ta bira parlamentario. POR y RED a cumpli cu nan acuerdo riba esaki, MEP no. E concepto di ley pa haci e secuencia a base di cantidad di voto obligatorio, entrega pa sr. Dangui Oduber y sra. Evelyn Wever-Croes, ainda mester wordo trata den Parlamento y no ta ley actualmente. Pero si un partido mester di ley pa cumpli cu nan propio promesa na e Pueblo votado, nan no ta refleha integridad ni credibilidad. Tin diferente argumento na fabor di aplica e secuencia di number riba lista. Mas importante ta pa e Pueblo votado sa di antemano con un partido lo anda cu su voto, y cu e partido ta cumpli, asina respetando su votadonan. 

Un otro asunto cu merece mas argumento y splicacion, ta riba kico MEP y RED ta basa nan confianza den sr. Otmar Oduber despues di a consider’e corupto y no integro. MEP a hasta pidi ministerio publico pa investiga sr. Otmar Oduber. Awo, pa colmo sr. Oduber a haya e cartera bou di cual MEP y RED a bisa cu tawata tin hopi corupcion (infrastructura). E punto no ta pa acusa sr. Otmar Oduber, pero cu mas argumento y splicacion di MEP y RED ta na su luga. E union aki no mester ta inaceptabel, pero sin un splicacion debido ta keda un pregunta cuanto credibilidad acusacionnan di MEP y RED tin si e acusacionnan ta ‘caduca’ asina cu mester di esun cu nan a acusa pa forma un gobierno.
Gabinete Wever-Croes a inicia cu varios strike, pero wega no a caba.”

Segundo inning
Gabinete Wever-Croes a inicia cu varios strike, pero wega no a caba. Tin un programa di gobernacion cu, a pesar di e awa den biña, ta contene plannan beneficioso pa nos pais. E gabinete ta inclui ministernan capacita y cu e potencial pa haci hopi cos positivo pa nos pais. E coalicion ta cuminsa cu un deficit den credibilidad, pero awo por demostra loke nan por significa pa Aruba y recobra/gana credibilidad. Hopi no a vota pa MEP ni POR ni RED. Kisas hopi cu a vota pa un di nan no a desea e coalicion aki. Pero esaki nos sistema electoral a produci y nos tin cu pensa den bienestar di Aruba y no un bienestar partidista. Cu esaki den mente, ta na su luga pa duna gabinete Wever-Croes I e espacio necesario pa cumpli cu nan tarea. 

Yabi
Realisa desaroyonan positivo pa Aruba y demostra integridad mester ta parti di cualkier maneho exitoso di un pais. Pero tin algo cu mester enfoca riba dj’e en particularmente: sinceridad. Den bon y den malo.
Nos tin periodonan di gobernacion nos tras den cual manipulacion, show y engaño tawata business as usual. Cu placa di Pueblo tawata haci propaganda politico, sea den forma directo of camufla. Transparencia a laga di desea. Duna informacion na prensa tawata selectivo. Conflictonan di interes tawata visibel. Desviacion pa stroba claridad tawata usual. Patronahe politico a wordo aplica. Opinion publico a wordo afecta grandemente pa motibo di tur esaki. E strategianan aki por ta hopi efectivo pero e efectividad semper lo baha cu tempo. Al contrario, e efectividad di sinceridad ta keda aumenta. E ta percura pa credibilidad y ta crea confianza. 
Sinti Demostra e cambio.”

E proceso di formacion di gabinete Wever-Croes I tawata tin espacio pa mas sinceridad. En esencia, responsabilidad pa incumplimento y conflicto cu propio palabra den hopi caso no a wordo tuma pero a wordo desvia, redirigi of ignora. Fanaticonan di MEP, POR y RED, of esnan cu kier ‘cualkier gobierno cu no ta AVP’ kisas lo ‘kijk door de vingers’ pa cualkier falta di sinceridad. Pero sostenedornan cu no ta sigui e partidonan aki ‘no matter what’ y esnan cu no ta sostene e partidonan aki y ta pone bon atencion por considera diferente aspecto di e formacion como hipocrita, cual no ta crea confianza den gobernacion. Al contrario, e ta reenforsa e falta di confianza y criticanan comun riba politico en general. 

Awo gabinete Wever-Croes tin e oportunidad di surpasa e deficit di credibilidad. Den temponan bon, temponan malo, logronan exitoso of situacionnan cuestionabel; sinceridad ta un yabi cu lo habri hopi porta y yuda’bo yega unda bo mester ta. Sinti Demostra e cambio.


ArenaPoliti.co ta desea gabinete Wever-Croes I exito. Tambe nos ta desea tur parlamentario exito den nan tarea di representa Pueblo y controla gabinete Wever-Croes I, y exito na tur partido pafo di Parlamento, media y especialmente e Pueblo votado, cu tur tin rol importante den nos democracia. 


Previously:
Asiento 22 S01E05 ‘7 motibo pa laga Pueblo eligi su Gabinete’
Asiento 22 S01E04 ‘Atrobe un Mayoria Ficticio’
Asiento 22 S01E03 ‘AVP deliberadamente ta frustra nos Democracia Parlamentario’ 
Asiento 22 S01E02 ‘Cambio di sistema pa eligi parlamentario’
Asiento 22 S01E01 ‘Prome nos purba drecha Reino Hulandes, ban drecha Aruba’

Carlos Guiamo | Asiento 22 
This email address is being protected from spambots. You need JavaScript enabled to view it.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.