Perspectiva Independiente without background 001

E relacion entre Religion y Politica

RudyLampe01
E diferencia di opinion entre un pastoor y grupo di 7 algun siman pasa a pone hopi di nos pensa riba e relacion entre religion y politica. Cu e tema aki den mente, ArenaPoliti.co a invita sr. Rudy Lampe pa scibi un columna riba e tema aki, cu e peticion pa trata e siguiente dos pregunta den e columna:
1. Tin espacio pa religion den politica?
2. Tin espacio pa politica den religion?

Como ex-parlamentario y ex-pastoor, ArenaPoliti.co a considera sr. Lampe un persona adecua pa elabora riba e tema. Sr. Lampe a acepta e invitacion y a scibi lo siguiente.


Religion y Politica scibi pa Rudy Lampe

“No por separa religion di politica”
E figura central di cristianismo ta Hesus di Nazaret. E poco cu nos sa di su historia ta bisa nos cu no por separa religion di politica. E tabata un zelota revolucionario, un hudiu nacionalista cu tabata lucha contra e ocupacion romano, kende na Galilea a forma un ehercito di discipulonan pa establece e reino di Dios riba tera, e profeta di pobernan cu a reta e autoridad sacerdotal di e Tempel di Herusalen, kende a organiza un accion di protesta den e Tempel di Herusalen contra e corupcion di e sumo sacerdote considera un aliado di e emperador romano y cu a ricibi e apoyo di e pueblo (loke nos ta recorda riba Diadomingo di Ramo), kende despues mester a hiba un bida clandestino busca pa e militarnan romano (loke nos ta recorda den Semana Santa te cu Diahuebs Santo), kende a wordo traiciona pa su mesun hendenan cu a mustra unda e tabata scondi y a keda aresta pa e ehercito romano (loke nos ta recorda Diahuebs Santo), kende a wordo tortura y sentencia na morto acusa di a comete e delito di 'opruiing', di a lanta e pueblo contra e gobierno romano y p'esey a haya e castigo di crucificacion, reserva solamente pa e rebeldenan contra e emperador romano (esei nos ta recorda riba Diaberna Santo). Hesus tabata e hudiu nacionalista radical cu a durf di reta e ocupacion romano y a perde e bataya y a keda derota riba cruz. Despues cristiannan a duna testimonio cu e a resucita e di tres dia y cu su causa no tabata perdi (loke nos ta recorda riba Pasco Grandi). Kiermen den e bida di Hesus di Nazaret ta imposibel pa separa religion di politica.

“Un cristian cu no ta lucha pa un mundo mas husto ta biba un fe sin obra”
Pa un cristian cu ta siguido di Hesus di Nazaret ta imposibel pa separa fe di politica. Un cristian cu no ta lucha pa un mundo mas husto ta biba un fe sin obra. Otro cos ta e separacion Iglesia-Estado (“scheiding Kerk en Staat”). Hopi hende ta confundi e dos aspectonan aki. Separacion Iglesia-Estado no ta mescos cu separacion fe-politica. Separacion Iglesia-Estado kiermen cu ningun iglesia por tin mas privilegio riba otro iglesianan of otro religion, pa e Estado tur iglesia y religion ta haya un trato igual. Esey ta e [nificacion] di separacion Iglesia-Estado, cu ta algo positivo y cu tabata un conquista husto for di siglo XIX. Kiermen mester separa Iglesia y Estado, pero ta imposibel pa separa fe cristian di politica.

“Un sacerdote na prome luga ta un cristian, kiermen ta su deber pa ta meti den politica”
Un sacerdote catolico ta un ciudadano igual cu tur otro ciudadano y tin mesun derechonan, kiermen e tin derecho activo y pasivo di voto. E mag di vota y mag di ta candidato riba un lista politico. Un sacerdote na prome luga ta un cristian, kiermen ta su deber pa ta meti den politica. Pero aki ta bon pa haci otro distincion. Un cos ta politica general, cu ta nifica tur accion cu tin di haber cu promove e bien comun (“algemeen welzijn”), otro cos ta e politica partidista, cu ta referi na un partido politico cu ta busca e poder via eleccion. Un sacerdote mester ta meti den politica general, pero ora e ta riba lista di un partido politico e ta representa su mes y no su iglesia. Pa e simpel motibo cu su fielnan tin e libertad pa vota pa cualkier partido di nan preferencia.


Keda pendiente pa mas columnista invita, elaborando riba diferente tema.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.