Perspectiva Independiente without background 001

Cambio di sistema pa eligi parlamentario

A22 Parlamento01
Asiento22 | S01E02 
Columna cu ta encurasha participacion di ciudadano den asuntonan politico. 

Si bo no ta di acuerdo cu na Aruba nos tin (y tawata tin) un stempelparlement, probablemente bo lo ta di acuerdo si cu nos sistema electoral y cultura politico ta hopi vulnerabel pa crea un stempelparlement. E candidatonan di e partido(nan) cu ta forma gobierno cu tin mas hopi voto ta bira minister, y candidatonan cu menos voto ta haya e tarea pa controla e ministernan riba cual nan a depende pa haya nan posicion como parlamentario. Nan mester controla e mesun minister(nan), lider di partido, cu nan ta depende riba dje pa nan futuro (y salario) politico.

Esaki no kiermen cu tur parlamentario cu relativamente tiki voto no ta suficiente integro pa haci su trabou manera mester ta, a pesar di e ‘dependencia politico’ menciona. Pero pueblo merece un sistema cu ta miho den preveni un stempelparlement y miho den sigura cu e checks and balances ta funciona manera mester ta.

Banda di e aspecto aki, e sistema actual simplemente no ta laga pueblo cu un representacion satisfactorio den Parlamento. A base di e resultado di eleccion 2013, Aruba a haya un representacion den Parlamento den cual 1 asiento di PDR ta refleha casi mita di e cantidad di voto directo/individual cu e 13 asientonan di AVP ta refleha:

AVP: 13 asiento (33.103 voto total) -    6.325 voto ‘directo’ den Parlamento 
MEP:  7 asiento (17.653 voto total) -  12.537 voto ‘directo’ den Parlamento 
PDR:  1 asiento    (4.518 voto total)  -   3.047 voto ‘directo’ den Parlamento


Solucion…?
Tin dos idea relaciona cu e asunto aki cu ta wordo menciona pa hopi aña caba. Un ta pa laga e cantidad di voto individual cu candidatonan riba un lista ricibi determina ken ta bira parlamentario, y no e secuencia di number riba lista. Partido RED ta aplica e idea aki pa algun eleccion caba por medio di un ‘gentlemen’s agreement’ interno. UPP tin e proposicion aki poni den nan programa pa eleccion 2013. PDR a implementa e areglo aki por medio di un protocol (interno). Mas recien candidato di MEP Dangui Oduber a trece e mesun punto aki padilanti. 


Eleccion 2013
Kico lo ta diferente si e regla aki tawata conta pa e resultado di eleccion 2013?
Den fraccion di AVP lo tawata tin dos cambio. Sr. Norman Roos (178 voto) y sr. Jeffrey Kelly (97) no lo ta parlamentario, mientras cu sr. Alvin Howel (422 voto) y sr. Richard Dirks (218 voto) lo a bira parlamentario.
Den fraccion di MEP, sr. Ady Thijsen (475 voto) no lo a bira parlamentario. Sr. Edgard Vrolijk (586 voto) lo tawata e di shete parlamentario di MEP.
Parlamento sala01
Si e regla tawata na vigor pa eleccion 2013, keto bay lo tawata tin un desbalansa grandi entre e fraccion mayoritario (AVP) y gobierno (gabinete Mike Eman II). E efecto di e regla lo varia dependiendo di e resultado di un eleccion. Pero si e meta ta pa preveni cu candidatonan cu tiki voto bira parlamentario, e cambio aki no lo ta mucho efectivo. E regla aki lo cambia solamente e secuencia ‘interno’ di cada partido individualmente. E cambio aki no lo haci mucho pa combati e fenomeno di stempelparlement y no necesariamente lo preveni candidatonan cu relativamente tiki voto di bira parlamentario.
Pa duna un ehempel extremo, imagina’bo un lista cu un lider cu su so ta logra 24% porciento di tur voto (Betico Croes na 1985). Cu cinco asiento na voto riba nomber di un (1) candidato, ta practicamente garantisa cu e partido en cuestion lo tin candidatonan cu relativamente tiki voto den Parlamento. Hasta si e cantidad di voto determina e secuencia, y tambe si e candidato cu mas voto a bira parlamentario y no minister.

Tin argumentonan pa defende cu e cambio aki ta un paso den bon direccion, pero tambe tin argumento contra e cambio aki. Por ehempel, un secuencia basa riba ken a haya mas voto no necesariamente lo refleha e deseo di e votadonan corectamente. Un otro argumento contra ta cu, a base di secuencia di number, votadonan sa ki ta spera nan ora e partido haya su asientonan. Tambe tin e argumento cu partidonan mester tin e opcion pa pone candidatonan cu tin hopi conocemento pa ta un bon parlamentario, pero kisas no tin e carisma pa haya hopi voto, halto ariba nan lista.

Kisas e efecto mas impactante cu e cambio aki lo tin, ta cu partidonan lo tin menos problema ora di determina ki posicion cada candidato ta haya riba nan lista, y kisas mas rivalidad interno entre coleganan di partido durante campaña.
Enbes di obliga partidonan pa eligi parlamentario a base di cantidad di voto, un alternativa ta pa laga cada partido declara (na momento di entrega lista) si nan lo implementa sea e regla di secuencia di number of secuencia di cantidad di voto. Asina votadonan sa con cada partido lo haci uso di nan voto, y e votado por dicidi si esaki lo afecta su decision si of no.


Eligi Parlamento y Gobierno separa
Pa realisa e efectonan necesario pa preveni un stempelparlement y preveni cu candidato cu relativamente tiki voto drenta Parlamento, cambionan mas drastico ta necesario. Un opcion ta pa introduci un sistema presidencial den cual pueblo ta eligi su presidente y su Parlamento den eleccionnan separa. Esaki tambe ta un idea cu pa hopi aña ta wordo menciona den pueblo. Mas recien lider di MEP Evelyn Wever-Croes a laga sa cu MEP ta considerando e opcion aki. UPP, RED y kisas mas partido tambe ta considerando e cambio aki.

E ta un cambio drastico cu lo tin basta efecto riba preveni un stempelparlement, pero probablemente no suficiente. Tambe e no lo preveni cu candidatonan cu tiki voto ta bira parlamentario. Si nos keda eligi nos parlamentarionan na e mesun manera, e problema lo keda existi. Hasta si bo eligi bo parlamento y gobierno den eleccionnan separa. Keto bay lo tin candidatonan cu tiki voto drentando parlamento pa motibo cu otro candidato(nan) riba e mesun lista a logra mas cu un asiento den voto. Tambe e dinamica interno di e partidonan lo keda haci e sistema vulnerabel pa crea un stempelparlement. E sistema actual di reparticion di restzetels tambe ta un factor cu por stroba nos di yega na un representacion manera mester ta. 


Districto
Un opcion cu lo tin un efecto hopi directo, dirigi riba ambos meta, ta si nos dividi Aruba den districto, determina un cantidad di asiento pa cada districto basa riba poblacion, y laga pueblo vota riba candidatonan (no partido) den nan propio districto. Por ehempel, por lo menos 10 districto, cada uno cu un cantidad di asiento (parlamentario) a base di e poblacion (probablemente 2 of 3 asiento den cada ‘stemdistrict’), y e total di asiento no necesariamente mester keda na 21. Candidatonan no mester ta afilia na un partido politico necesariamente (candidato independiente). Pa preveni cu hopi candidato cu tiki sosten participa, por pone un rekisito di un cantidad di firma, similar na loke ta conta awo pa partidonan sin asiento den Parlamento.

Esaki ta un manera hopi directo pa pueblo eligi su parlamentarionan, sin e ‘trickle-down effect’ di voto cu ta haci cu candidatonan por ‘lift mee’ pa bira parlamentario. Cu e sistema di districto aki, pueblo por eligi un Parlamento cu un legitimidad democratico fuerte, cu parlamentarionan cu un posicion mas independiente di e politica (y control) interno di partidonan.
Banda di esaki pueblo por eligi su gobierno/presidente den un eleccion nacional (no a base di districto). E diferente eleccionnan aki no mester tuma luga simultaniamente.

Asina tin mas alternativa. Tur cu nan pros and cons, y cu solucion pa cada problema. Mientras cu nos por siña di e bon y e malo di diferente modelo di otro pais, ta importante pa keda creativo y crea un sistema cu ta traha specificamente pa Aruba, teniendo cuenta cu nos poblacion, meta y cultura politico. Ademas lo mester determina hopi aspecto relaciona cu checks and balances y e relacion entre Gobierno y Parlamento.

Ta positivo cu e tema aki ta hayando mas atencion den e arena politico. Awo falta pa yega na propuestanan concreto. Asiento 22 lo dedica mas atencion na e tema aki.

To be continued.

Previously: 
Asiento 22 S01E01 | ‘Prome nos purba drecha Reino Hulandes, ban drecha Aruba’

Relevante:
E 'Top 21' di Eleccion 2013, y e desbalansa entre Parlamento y Gobierno


Carlos Guiamo | Asiento 22
This email address is being protected from spambots. You need JavaScript enabled to view it.


Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.