{idkey=9757b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5904-elton-lioe-a-tjam-abo-hopi-declaracionnan-bunita-pa-laga-pueblo-lubida-y-tuma-pueblo-haci-atrobe%3FItemid%3D101][title=Elton+Lioe-A-Tjam+%28ABO%29%3A+Hopi+declaracionnan+bunita%2C+pa+laga+pueblo+lubida+y+tuma+pueblo+haci+atrobe%21][desc=]}
Parce cu ainda e politico tradicional ta kere cu tur hende na Aruba ta sufri di amnesia, ta ciego, por wordo tuma haci atrobe of ta simplemente dom. Un falta di respet total pa pueblo y su inteligencia. Nos lo bay ilustra e falta di respet y e arogancia politico aki, uzando solamente dos declaracion, cu a wordo haci e siman aki.

Declaracion:

Parlamentario sr. Jeffrey Kelly: ‘Mi ta convenci cu gobierno lo bay paga SVB e miyones cu e debe SVB’ (Telenoticia, 4 juli 2017).

Observacion:

Si gobierno tabata pasa tur e primanan (tambe esunnan di APFA) cu e ta kita mensual di e trahado pa SVB, nunca e fondo lo a haya su mes den problema financiero. Pa nos no lubida cu gobierno a hinca man brutalmente fin di aña pasa den SVB, ora e kier a drecha su imagen financiero pa asina trata di laga CAft kere cu e ta cumpliendo cu palabracion. Un par di luna despues cu e director di SVB a coopera pa gobierno viola e fondo, SVB mester a declara publicamente cu si algo no pasa lihe, e fondo no lo por cumpli cu su obligacionnan financiero. Banda di esaki, ora cu gobierno a wordo forsa pa CAft (lesa Hulanda) pa paga APFA loke e tabata debe e fondo aki, gobierno a bay haci un show despues cu e a scapa APFA cu 170 miyon. Algo un tiki straño y ridiculo, como esaki tabata placa cu gobierno a kita di e trahado, pero cu nunca e la pasa esaki pa e fondo. Pues e parlamentario tin rason: un dia gobierno lo organisa un otro show di misericordioso, ora e ta wordo forsa pa pasa e placa cu e ta kita tur luna for di e trahado pa e fondo.

Declaracion:

Parlamentario sra. Lorna Varlack: ‘Nos a scucha nos hendenan conta con trafico ta pega; un di e puntonan esencial cu nan ta papia di dje. Watty Vos Boulevard ta bay alivia trafico y eleva e calidad di bida y ta brinda e ciudadano mas tempo pa pasa cu su famia’ (24 ora.com, 3 juli 2017).

Observacion:

Durante e show ‘Rotonde Cumana’, e minister di Infrastructura a declara cu e proyecto aki tin casi 40 aña den planificacion. Pues si e la tuma gobierno tanto tempo pa ‘a scucha nos hendenan’, anto gobierno ta confirma cu e ta hopi sordo of cu intencionalmente e la pospone e proyecto aki pa casi 40 aña, te ora cu e ‘finder’s fee’ bira suficiente grandi.

E actual director di DOW a anuncia dia 15 mei 1996, cu e proyecto ‘Watty Vos Boulevard’ (e tempo ey yama Ringweg-3) lo a costa entre 40 pa 50 miyon florin y lo por bin cla na aña 2001 (Diario). Pero awe, esaki lo costa 815 miyon florin. Pues un caminda cu mester a costa entre 5 y 7 miyon florin pa kilometer na 1996, na 2017 e minister di Infrastructura, cu ayudo di parlamento, ta laga pueblo paga 116 miyon florin pa kilometer. Hasta si aplica un coreccion pa inflacion, ainda 116 miyon florin pa kilometer no ta NORMAL.

Pues straño y casi imposibel pa scucha un miembro di parlamento trata di bende pueblo con un debe adicional asina grandi riba su lomba, por ‘eleva e calidad di bida y ta brinda e ciudadano mas tempo pa pasa cu su famia’. Kisas e miembro aki no ta compronde cu husto e debe publico creciente y e medidanan cu gobierno ta tumando añanan largo contra pueblo pa asina e por sigui fiesta, ta e causa principal cu hopi hende mester tin 3-4 trabou pa sobrevivi, y p’esey e no tin ‘mas tempo pa pasa cu su famia’.

Tambe tabata tristo pa mira con e biaha aki, gobierno a invita e director di LVV pa splica pueblo con cierto matanan lo wordo traspasa pa LVV durante construccion, pa despues wordo planta bek ora e caminda keda cla. Parce cu esaki ta un otro manera pa tira santo den wowo di pueblo pa no admiti cu atrobe hopi naturalesa a wordo destrui sin cu tin un studio di medio ambiente (MER). Tambe den su ansha pa cobra e ‘finder’s fee’ den e proyecto ‘Black Corridor’ di 750 miyon florin, e gobierno ‘Green’ a ‘lubida’ riba un studio MER. Ban mira ki excuus gobierno lo tin e biaha aki pa hala tur procedura na banda y ban wak kico nos parlamentarionan balente lo haci. Ban wak si cu gobierno lo bolbe bay paga un suma balente atrobe na e compania priva ‘Americas Sustainable Development Foundation (ASDF)’, di un ‘ambientalista’, pa haci un ‘Ecological Impact Assessment (EcIA)’ despues den pura pa hustifica e destruccion masal riba naturalesa, manera a sosode despues cu e mangelnan na ‘Spaans Lagoen’ a wordo rosa pa e brug mahos.

Esaki ta djis solamente 2 declaracion. Pero tin hopi mas, tambe di ‘AVP-light’. Hopi declaracionnan bunita, pa laga pueblo lubida y tuma pueblo haci atrobe!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co