{idkey=4517b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5966-gerlien-croes-avp-formacion-di-nos-pueblo-e-fundeshi-pa-un-desaroyo-duradero%3FItemid%3D101][title=Gerlien+Croes+%28AVP%29%3A+Formacion+di+nos+pueblo%2C+e+fundeshi+pa+un+desaroyo+duradero][desc=]}
Bo futuro cu Gerlien #1 

ORANJESTAD - Durante e ultimo decadanan globalisacion a pone mundo experencia diferente sorto di desaroyo, tin di nan mas positivo cu otro. E velocidad di e desaroyonan aki dia pa dia ta dunando e ser humano poco tempo pa asimila tur e cambionan nan cu tin. Mescos cu henter mundo nos dushi isla tambe a conoce desaroyonan como cu e ta algo imparable cu ta wordo fortifica dor demanda di nos mes mundo cu nos ta biba aden. 

Pa sostene e desaroyonan aki e formacion di cada ser humano ta primordial. E proceso den cual e persona ta forma su propio identidad, autonomia y por reconoce su habilidadnan y posibilidadnan ta di sumo importancia pa e ser humano. Ta cu e habilidadnan y caracteristicanan aki e ser humano por tuma desicionnan cu un efecto duradero den un forma consciente y consistente. 

E formacion di cada un di nos ciudadanonan, indiferente di su edad, ta un derecho y un deber di nos tur bibando hunto den nos comunidad. E ta forma parti di educacion cu nos tur tin derecho riba dje y tambe tin e deber di yuda aporta na dje. E norma y balornan cu nos ta comunica tanto verbalmente como non-verbalmente, na cada persona cu nos ta yega den contacto cu ne, ta yuda aporta grandemente na e caminda cu nos ta scohe pa recore durante nos desaroyo personal. Teniendo esaki den consideracion, ta primordial pa reenforsa e norma y balornan aki no solamente na scol y den nos hogarnan pero tambe den cualkier situacion diario caminda e ciudadanonan ta wordo edifica pa medio di educacion informal. 

Invertiendo den e formacion di nos pueblo henter, nos ta destila lo mihor di cada un di nos bibando riba nos dushi isla, stimulando no solamente habilidadnan pa bida pero simultaneamente creando un sistema inclusivo pa comunidad henter. E sistema inclusivo aki ta e base cu ami y nos partido lo desea di crea pa por genera oportunidadnan pa un y tur por sigui desaroya nan mes teniendo cuenta cu necesidadnan specifico di nos cada un. Di e forma aki e inversion den formacion aki lo tin un rendimento mayor, elevando asina nos calidad di bida, enfocando riba talento di nos cada un fortaleciendo asina e fundeshi di un desaroyo duradero riba nos isla.

Expresionnan haci den e articulo aki no necesariamente ta refleha opinion di ArenaPoliti.co