{idkey=9687b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6060-jacky-van-putten-por-problema-cu-deporte-na-aruba-ta-cu-tin-mucho-placa%3FItemid%3D101][title=Jacky+van+Putten+%28POR%29%3A+Problema+cu+deporte+na+Aruba+ta+cu+tin+mucho+placa][desc=]}
Na aña 1972 a lanta e departamento di deporte escolar  cu tabata bou encargo di sr. Dominicus Flemming (dfm) na bestuurskantoor despues cu a muda e departamento aki na Watertoren na Playa  unda Schoolsportcommissie bou encargo di sr. Flemming  cu sosten di sr. Rudy Leysner tabata reuni. Gobierno a nombra despues sr. Frans van Gastel (dfm) pa cuminsa un oficina di deporte (sportburo). Mi defunto tata Roy van Putten na 1979 a wordo nombra director y cuminsa ehecuta e maneho di deporte y a cambia e nomber di sportburo den IDEFRE cu su meta “ DEPORTE PA UN Y TUR” . E obhetibonan tabata pa bin cu actividadnan cu lo promove deporte den comunidad tanto local y internacional. Un di a tareanan principal di IDEFRE tabata promove deporte escolar unda deporte escolar tabata wordo maneha door di un comision voluntario. Na 1981 e la stop di existi debi cu miembronan di e comision a haya cu deporte escolar mester wordo profesionalisa mirando  cu deporte escolar a bay riba un nivel internacional cu weganan interescolar. Na 1997 e minister di deporte a duna sr. Jerry Gomes (dfm) e encargo pa realisa un fusion entre ASU y COA cu lastimamente mester a stop cu e intentonan aki pa motivo cu ASU y COA no por a haya otro te cu dia di awe.

Hopi empeño  a wordo haci pa haya e fondonan aproba riba e presupeusto pa IDEFRE por sigui promove y desaroya programmanan nacional y internacional.

Na 1982 gobierno bou encargo di diputado di deporte  sr. Remie Zaandam conhuntamente cu sr.Roy van Putten a bin cu un idea pa funda un lotto cu e proposito pa provee e fondonan necesario pa cu esaki.  Lotto a wordo crea y nos por a waak un inversion grandi den e maneho di deporte. A crea facilidadnan, a cera un combenio cu e.o. Springfield College pa yuda cu formacion di lidenan den diferente ramo di deporte y a manda trainernan local pa exterior manera e.o Andresito Krozendijk, Jerry Gomes (dfm), Doc Williams, Winston Ashby, Maria Luisa Croes, Rudy Leysner y Candido Tromp.  a inverti hopi placa den prepara hendenan, educadornan, instructornan, entrenadornan. Awe hopi tin un carera den deporte danki na e programanan aki.

Lotto a cuminsa crece y a cuminsa produci miyones pa inverti den deporte. Ata aki e problema a cuminsa, ken ta maneha un fondo asina lucrativo, ken ta bay dicidi unda kico ta bay.  Desde e tempo ey nos a cuminsa scucha escandalo tras di otro bou di tur gobierno. Placa tabata bay destinonan no apropia. Tur a keda na escandalo pasobra ningun hende a bay cera. Awe nada no a cambia, tin manera un man secreto riba e fondo aki na unda ley tey pero pa esnan cu no ta liga. Fondonan aki ta wordo maneha a base di “wie betaald bepaald”. Esnan cu ta cay den e “cartel “ta haya tur cos. Biahe, auto, compensacion, etc . Pero si bo no ta aden, tin tur regla cu bo mester cumpli cu ne pa haya subsidio.

E no ta un secreto, tur dia mi ta encontra deportistanan y mi a papia cu varios miembronan di federacionnan deportivo cu ta sclama. Cierto deporte cu tin un patrona ta haya sumanan grandi y otronan mester depende di rifa y BBQ.  Pa e ultimo 8 aña deporte a conoce su pio temporada. Tur cu a wordo logra a termina den eventonan deportivo y nada di maneho. Minister Schwengle ta honesto si, e ta reconoce cu pa 3 aña y mey e no a haci nada, pero prome cu e temporada di gobernacion termina e kier logra de todo. Placa a bira e caida di deporte. Un sin fin di proyectonan deportivo cu a keda bandona y cu uzo minimal. E condicionnan ta deplorabel te insigur. Asina mes politiconan kier traha mas facilidad pero no ta realisa cu esaki no lo crea mas deportista. Nos mester bay bek na e base, e maneho. Pone un hende eynan cu sa y cu no ta warda despues cu e baca hoga pa cuminsa papia deporte. Lo bay atende pa lanta entrante di 1 di januari 2018 un stichting di Sportsubsidie Auba, pero ken lo wordo apunta? friends and family atrobe, e mesun cartel di deporte di semper? Cuminsa door di habri tur e bukinan di Lotto, no lague na papia so sino demostra transparencia, demostra cu e no ta un  friends and family door di laga tur federacion cu ta interesa mira e cifranan y splica dicon un si y otro no. Ta lastima cu awor cu tin placa, Minister Schwengle mes a admiti, no tin maneho eficiente pa asina nos scolnan, nos hubentud por probecha di dje. Deporte no ta caminata, careda di caya so si no e ADER importante pa e salud di un pueblo. Ta bira tempo pa bin cu claridad den finansas deportivo, no por exigi di otro si bo mes no ta transparente. Ademas mester termina e persecucion politico si bo no ta parti di e cartel financiero di deporte aki na Aruba.

Expresionnan haci den e articulo aki no necesariamente ta refleha opinion di ArenaPoliti.co