{idkey=5315b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6214-eromil-bakmeyer-por-diabetes-y-prevencion-parti-ii%3FItemid%3D101][title=Eromil+Bakmeyer+%28POR%29%3A+Diabetes+y+Prevencion-Parti+II][desc=]}

Den un articulo anterior tocante Diabetes y Prevencion Sr. Bakmeyer a splica tocante e problema grandi di diabetes y dialyse cu Aruba tin na e momento aki. Un problema grandi, cu si nos no combati fuertemente, por sigui crece y afecta nos salubridad publico, nos calidad di bida y nos costonan di AZV aun mas negativamente cu e ta hasi ja caba. Con nos por combati e problema aki?

MANERANAN PA PREVENI DIABETES 
Sr. Bakmeyer ta splica cu tin diferente manera pa preveni cu bo lo haña diabetes tipo 2, cual ta esun mas comun entre adultonan. Den mayoria caso, diabetes tipo 2 ta wordo causa door di factornan cu tin di haber cu nos estilo di bida, cual facilmente por wordo preveni. Esakinan ta inclui un dieta cu no ta balansa, falta di actividad fisico, falta di suficiente descanso (soño), humamento y alcohol. Door di cambia bo estilo di bida, bo por preveni cu bo lo haña diabetes tipo 2.

Ciencia ta indica cu diabetes tipo 2 ta wordo causa door di cantidadnan excesivo di insulina den bo curpa pa motibo cu e receptornan di insulina no ta funciona bon of door cu e calidad di e insulina no ta bon. Strategianan manera mantene un dieta cu ta abao den carbohidrato y hasi ehercicio por reduci e nivel di insulina y ta efectivo pa preveni diabetes tipo 2.

Fuera di esaki tin factornan cu ta exponebo na un risico mas halto di haña diabetes tipo 2. Esakinan ta aumento di peso na e parti mei mei di bo curpa (‘central obesity’), nivel halto di colesterol/trigliceride  y presion halto. Baha peso, hinca mas actividad fisico den bo dia, stop di huma y bebe menos alcohol por baha bo risico di haña diabetes tipo 2, aparte di cu esakinan lo judabo drecha bo salud en general tambe.

UN DIETA BALANSA 
Introduci y mantene un dieta balansa den bo bida ta e parti mas importante den e cambio cu bo mester hasi. Mas importante cu ehercicio, segun Sr. Bakmeyer. Si bo tin un dieta balansa, pero bo ta hasi tiki ehercicio, bo por baha mas peso cu si bo no tin un dieta balansa y ta hasi hopi ehercicio. Claro cu haciendo tur dos, un dieta balansa y ehercicio, bo lo tin e resultado mas faborabel pa bo salud.

Un dieta efectivo ta esun cu no ta contene hopi carbohidrato, cu no ta contene cuminda cu sucu aden, y cu no ta contene granonan refina, manera pan blanco y aros blanco. Purba na tin un dieta cu ta inclui hopi berdura y cu ta inclui fuentenan saludabel di vet, manera nootnan sin salo (walnuts, almonds, hazelnuts), azeta di olijfie, avocado, pisca vet, carni y ‘full fat dairy’.

EHERCICIO 
Mientras manetene un dieta balansa ta esential pa un bon salud, ehercicio tambe ta importante, pasobra e ta baha nivel di sucu den bo sanger. Tambe e por juda baha bo nivel di colesterol y presion halto. Un tiki actividad fisico mas den bo dia mes por juda caba, especialmente si esakinan bira un habito. Canamento ta un bon ehempel di un ehercicio cu ta facil y barata pa hasi.

SI BO KIER, BO POR 
Na Aruba nos ta custuma cu un estilo di bida cu ta ensera come riba caya y no saludabel y tambe cu poco actividad fisico. Pero Sr. Bakmeyer ta convenci cu si nos kier drecha esaki, nos POR. Paso e alternativa no ta atractivo: sobre peso y obesidad, diabetes y malesanan chronico, mal calidad di bida, gastonan halto di salubridad publico. Nos tur ta paga pa e consecuencianan.

Sr. Bakmeyer y e team di POR ta kere firmemente cu prevencion ta e solucion pa e mayoria di nos problemanan di salud actual na Aruba y nos kier traha hunto cu e comunidad, cu profesionalnan den e ramo medico, cu profesionalnan den e ramo di dieta y ehercicio, cu schoolnan y cu organisacionan riba tereno di salud, pa por trece informacion, opcionan saludabel, pagabel y implementabel den bida di cada persona cu ta biba na Aruba. Nos plan ta cla, hunto nos POR! Vota number 13 riba lista di POR , Eromil Bakmeyer, y bo no POR bai robez cu bo escogencia pa un mihor salud y futuro!

Expresionnan haci den e articulo aki no necesariamente ta refleha opinion di ArenaPoliti.co