{idkey=2584b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6259-kar-lie-ng-ppa-e-ser-humano-ta-central%3FItemid%3D101][title=Kar-Lie+Ng+%28PPA%29%3A+%E2%80%9CE+ser+humano+ta+central%E2%80%9D+][desc=]}
Lider di PPA Kar-Lie Ng, No.2 riba e lista combina: 

Como Lider di Partido PPA y candidato number 2 riba e lista combina cu UPP, sra. Kar-Lie Ng ta haya hopi pregunta ultimo dianan. Preguntanan cu ta surgi di un pueblo cu ta preocupa y ta desea claridad. Un di e preguntanan ta: “Kico bo kiermen cu e ser humano ta central?” Tur partido ta bisa esey! 

E lider ta splica cu PPA ta un partido social democrata. Esaki ta encera cu tur maneho ta basa riba e ser humano. Kico esaki kiermen? PPA ta un partido cu semper a boga pa subi e inversion den enseñansa aki na Aruba. PPA ta kere cu si bo inverti den e persona, den e ser humano, lo bo por conta sigur cu e progreso di bo pais, mirando cu niun hende ta keda’tras. Tur hende tin oportunidad igual pa bay dilanti. Scol lo ta accesibel pa tur mucha. Universidadnan local lo tin estudionan y mas area di experticio, cu lo brinda nos futuro generacion un Futuro Briyante! 

E vision di partido PPA/UPP ta pa haci esaki di un manera bon structura caminda tin un cuido  accesibel y confiabel pa tur mucha. Mientras cu e mayor ta trankil na trabao, su yiu(nan) ta haya e extra enfoke y guia den e materianan cu e mester ayudo aden. Di e forma aki ta cuminsa duna atencion y contribucion pa baha e problemanan social cu tin den comunidad. Si tin chens igual pa tur hoben haya trabao, criminalidad lo baha, pasobra e hoben ta haya algo productivo pa haci, e ta entretene su mes y ta sinti’e util, dunando su aporte y contribucion na su pais.

Cu implementacion structura di e ideanan aki y e vision general cu partido PPA/UPP tin pa Aruba, nos por cuminsa traha pa atende cu e situacion di pobresa, caba cu desempleo, combati criminalidad. Logrando esaki, un y tur por biba un bida mas trankil y mas largo.

Con PPA/UPP lo inverti den e ser humano?

E vision y mision di nos partido ta pa inverti den enseñanza y den deporte; crea cuponan di trabao; balansa costo di bida por medio di control; haci’e atractivo pa e hobennan den exterior cu a caba nan estudio bini bek y haya e mesun oportunidadnan cu nan tin den exterior, pero awo na cas mes! Atrae e hobennan cu no a caba nan estudio y cu ainda ta den exterior, pa nan bolbe Aruba y nan wordo entrena den un ofishi cu por yudanan participa activamente na e mercado laboral di Aruba.


Nos ta aserca bo pa bo voto! Cu bo sosten, Aruba lo tin un miho futuro caminda nos tur por biba trankil!

Expresionnan haci den e articulo aki no necesariamente ta refleha opinion di ArenaPoliti.co