{idkey=5632b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6434-gisele-mireille-sint-jago-upp-aruba-mester-tuma-mas-evacuadonan-di-st-maarten-asap%3FItemid%3D101][title=Gisele-Mireille+Sint+Jago+%28UPP%29%3A+Aruba+mester+tuma+mas+evacuadonan+di+St.+Maarten+asap%21][desc=]}
Reunion Sta Theresita Center 
Diasabra durante e reunion di e grupo: St. Maarteners in Aruba na Sta Theresita Center na San Nicolas, nos por a wak cu e comunidad di Aruba ta haci tur cos posibel pa yuda e victimanan di horcan Irma. Mi a conversa cu Sra. Xiomara Jansen cu a splica con grave e situacion ta y con e ayudo cu ta wordo brinda lo ta bay ta pa tur victimanan na St. Maarten, sin discriminacion. Durante e siman aki mester di voluntarionan pa sorteer, dobla y paketa paña na e ware house dilanti di Te Oro school. Please duna un man.

Circumstancianan inhumano 
Ora bo ta realisa bou cua circumstancianan e victimanan ta biba awor, bo curazon ta kibra. Ta circumstancianan inhumano. Un tata di un baby recien nac'i cu ta desespera y ta busca awa y co'y come pa e mama y nan baby. Of cu ora un victima logra haya algo di come y bebe pa su famia, e ta wordo atraca riba caya door di otro victimanan cu tambe ta busca co'y come y bebe. E ta hopi tristo y e situacion aki no por dura mas largo tampoco. Riba e rednan social nos por lesa cu e mayoria ta di opinion pa tur e victimanan wordo evacua.

Evacua y hiba pa Curaçao
Na nos isla hermana Curaçao ya caba e prome evacuadonan sin indicacion medico a yega. Un tremendo accion cu mi ta spera lo wordo sigui pa pais Aruba mas pronto posibel! A scohe pa laga esnan cu un paspoort Hulandes bin prome, cual ta comprendibel pa motibonan di imigracion, pero, na final lo mester brinda ayudo na tur tur victima igual. No por laga ningun hende atras. Articulo 1 di nos Grondwet ta bisa cu tur hende cu ta na Hulanda mester haya e mesun trato den e mesun situacion, un trato igual, sin discriminacion den cualkier forma. Esey ta conta pa henter Reino Hulandes. Orcan Irma no a discrimina y a afecta un y tur na St. Maarten y e otro Islanan. Asina tambe e ayudo brinda lo mester yega na un y tur irespecto si nan ta papia Hulandes, si nan tin pasooort Hulandes, si nan ta legal of illegal. No por yuda tur hende na e mesun momento, pero si mester yuda tur. Despues di e evacuacion lo mester busca moda pa soluciona e problemanan di esnan cu no tawata tin un estadia legal na e isla(nan).

Yuda bo prohimo
Na Aruba nos lo mester percura pa yuda mas hende posibel y laga nan bin biba na Aruba. No solamente esnan cu tin famia na St. Maarten, no solamente ora bo ta decendente di St. Maarten, nos tur mester yuda nos prohimo.
Como juffrouw di scol, mi ta spera cu pronto nos por yama bon bini na muchanan y studiantenan di St. Maarten pa nan por cuminsa biba bou circumstancianan normal y cuminsa procesa e trauma aki. Studiantenan den nan aña di examen tambe mester haya ayudo mas lihe posibel pa nan no cay atras y perde henter e aña aki.

Studiantenan di St. Maarten na Aruba.
Nos tin un grupo di 15 studiantenan di St. Maarten (12 registra na Studie financiering), cu ta studia na EPI. Nan tambe ta pasa den un situacion duro pa cu nan famia pero tambe nan ta den insiguridad pa cu nan finansas. Eynan tambe nos lo mester pone atencion. Ya caba algun di nan a cuminsa busca un trabou pa nan por yuda nan mes.

Habri porta di Aruba
E 'aftermath' di orcan Irma lo exigi e miho di nos tur como un pueblo. Nos lo mester ta un ehempel pa nos yiunan cu nos actuacion y no solamente cu palabra. Mi a registra mi mes online pa ta un 'foster family' pa e victimanan cu lo bini di St. Maarten, pasobra caminda 2 por come, 3 por come. Caminda 3 por come, 4 por come etc. Awor mi kier haci un suplica na Minister President Mike Eman pa tambe habri e portanan di pais Aruba pa tur victimanan di horcan Irma na St. Maarten mientras ta wardando pa e miho momento yega cu por manda equiponan y material pa St. Maarten. Let's make Aruba, One Helpful Island! ~
Gisele-Mireille Sint Jago. Candidata #5 lista 2 PPA/UPP.

Expresionnan haci den e articulo aki no necesariamente ta refleha opinion di ArenaPoliti.co