{idkey=8083b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6524-otmar-oduber-por-cu-cua-cara-prome-minister-eman-por-pidi-confiansa-di-pueblo%3FItemid%3D101][title=Otmar+Oduber+%28POR%29%3A+Cu+cua+cara+Prome+Minister+Eman+por+pidi+confiansa+di+pueblo][desc=]}
Mientras su minister ta sera na KIA pa corupcion y labamento di placa  

Na bispo di eleccion 2017 como lider di partido POR mi kier a manda palabranan di agradecimento na  cada persona cu di un of otro manera ta sostene ami of cualkier colega di partido POR. Danki na tur ciudadano cu a duna nos e oportunidad pa drenta boso hogar y transmiti e informacion di nos programa di gobernacion.

Por tuma nota cu E Forsa Nobo, partido POR a cuminsa haya e forsa di e respaldo di nos comunidad di Aruba. Oposicion tambe a tuma nota di esaki y consecuentemente a procede na fabrika noticianan falso y haci atakenan personal sin base durante henter e periodo di campaña. Nan a opta comete e actonan aki contra cada persona cu di un of otro forma a expresa cu nan ta apoyo na partido POR. E acto di ofrecimento di trabou of cumpramento di voto ta un hecho castigabel cual Prome Minister a comete y aplica pa por a logra baha algun bandera di POR, como acto di intimidacion. Bo ta puntra bo mes; Con gabinete cu tin un Minister deteni pa corupcion, traficacion di hende y pa labamento di placa tin curashi di yega cas di hende y pidi nan pa nan voto. Ki integridad bo por desplega, si como lider di e Pais aki bo ta permiti y tolera miembronan di bo gabinete sigui eherce nan funcion manera cu nada un pasa. Cu cua autoridad moral lo bo por dirigi e Pais aki, si foi mas cu un aña pasa caba bo tawata sa cu actonan contra ley lo ta tumando lugar. Na tur personanan cu tin cas cu bandera y/of borchi di POR cu a wordo intimida, mi ta gradici pa e yamadanan di sosten cu nos a ricibi apesar di e presion di e partido AVP. E personanan humilde y leal aki cu deseo pa cambio a sigura nos cu nan lo vota pa POR pasobra nan no ta wordo cumpra y nan voto ta sagrado. Comunidad ta keda vocifera cu nan kier mira cambio. Un Pueblo Orguyoso y Respeta cual ta loke nos partido ta para pe ta conta cu sosten di e personanan cu no a laga nan mes wordo cumpra of bendi pa voto. Un Pueblo Orguyoso y Respeta no ta cay den e trampanan aki. Dia 22 ta bo oportunidad pa demostra esaki depositando bo voto den un persona y partido cu bo ta sigur cu lo por hiba Aruba dilanti riba e caminda di stabilidad, integridad y progreso.

Expresionnan haci den e articulo aki no necesariamente ta refleha opinion di ArenaPoliti.co