Perspectiva Independiente without background 001

Elton Lioe-A-Tjam (ABO): E fondonan social tambe ta admiti awor nan culpabilidad den e desastre financiero?

Elton08
E no ta un secreto publico, cu hopi hende ta pensa cu ambtenaarnan no ta traha duro y algun di nan ta  hasta corupto. Ta berdad cu tin ambtenaarnan asina, pero e mayoria no. Tampoco nos tin cu lubida, cu hopi hende tambe ta culpa e ambtenaar pa e mal maneho di e mandatario. Sin cu e ambtenaar tin ‘arte of parte’ den esaki.

Diferente biaha, nos a recorda pueblo con gobierno ta retene ‘premies’ mensualmente di entre otro e ambtenaar, pero nunca e ta traspasa esakinan pa e fondonan di APFA y SVB. E fondonan na nan turno ta laga gobierno haci esaki pa añanan largo, sin reclama. Pa despues no solamente regala gobierno e placa sin consulta cu e doñonan di e placa, pero tambe bin admiti cu e fondonan no tin suficiente placa p’esey mester subi e ‘premies’.

Wel si esaki no tabata suficiente, awor gobierno tambe a baha e parti di ‘premies’ cu e mester paga como dunado di trabou na e fondonan di seguro social. Esaki solamente pa aparenta cu e la reduci su malgastamento di placa: ‘Vooral de verlaging in de kosten betreffende werkgeversbijdragen hebben hier een bijdrage van doorslaggevende aard geleverd’ (Jaarrekening Land Aruba 2014).

Pues despues cu gobierno a horta ‘premies’ cu ayudo di e fondonan APFA y SVB, a subi e edad di pensioen, awor e a baha su compromiso unilateral di paga ‘premies’. Tur esaki pa camufla e desastre financiero cu e a causa cu su proyectonan miyonario. E ambtenaar sa cu atrobe e la perde algun beneficio y derechonan adkiri cu e medida aki?

Straño cu net awor, despues cu a bira publico cu diferente directiva y hunta di e fondonan social a regala gobierno miyones, nan kier bin cu exigencianan y reglanan pa e miembronan nobo pa asina subi e calidad. Cu esaki, indirectamente e fondonan social ta bisa cu no tin hende di ‘peso’ den e diferente  hunta? Esaki por ta un ‘Mea Culpa’ cu nan tambe ta reconoce nan culpabilidad den e desastre financiero?

E lo ta bon, si e fondonan social y gobierno publica tur e nombernan kende tabata of ta den e diferente hunta di tur instancia gubernamental. Pasobra den tur hunta, ta gobierno ta esun cu ta recomenda y postula ‘nan hendenan’. Aki un biaha mas, bo ta mira con importante transparencia ta. E pueblo cu ta doño di tur compania estatal y di fondonan social, no sa mes kende ta den e diferente hunta. E instancianan aki tampoco ta duna informacion na nan doño (cu no ta gobierno).

Den nos opinion, esaki ta nada otro cu un ‘schijnbeweging’ pa asina sigui haci e diferente hunta mas elitario y menos transparente pa pueblo. Of crioyo bisa, esaki ta un otro forma pa wanta cierto tipo di hende for di e diferente hunta y asina mantene e control y e secresia total den man di e mesun ‘kliekje’ di hende. Cu e decision aki, tambe gobierno y e directivanan semper por sconde tras di e excuus di ‘e expertonan’ a bisa, dicidi of regala. Locual pueblo no tin cu lubida, cu den tur hunta di directiva of supervision, tin e mesun hendenan. Algun tin mas pechi bisti, cu tin biaha nan ta lubida cua pechi nan tin bisti. Tampoco pueblo tin cu lubida riba e decisionnan cu a wordo tuma den pasado pa diferente hunta ‘experto’ cu a laga pueblo cu miyones di debe y garantia. Algun di nan ta FCCA, WEB-hedging, APA y Air Aruba.

E desaroyo aki ta mustra cu gobierno ta sigui cu su esfuersonan pa concentra tur poder den algun man, pa asina e por sigui sconde informacion imparcial di pueblo. Un pueblo cu no tin suficiente informacion, no por tuma decisionnan rasonabel. E unico cu ta beneficia di menos informacion imparcial y menos transparencia, ta e politico tradicional.

Interesante pa scucha e opinion di e sindicatonan di ambtenaar riba e exigencianan nobo aki y si nan tin suficiente hende di ‘peso’ pa ocupa cualkier di e posicionnan nobo aki.

(www.aboaruba.org , info@aboaruba,org )

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.