Perspectiva Independiente without background 001

Igmar Reyes: E prijs di desigualdad

(Tempo pa lesa: 6 - 12 minuut)
Ultimamente, si tin un topico economico cu su fundeshi ta wordo sacudi, ta e topico riba desigualdad. Pa largo tempo teorianan y modelonan economico riba reparticion di entrada y rikesa tabata sali for di punto di bista cu capitalismo ta bon pa tur hende, desigualdad ta bon pa crecemento economico y desigualdad ta un refleho di merito. Sinembargo e idea aki awendia ta wordo reta. Den e relato aki – special pa fin di aña – lo elabora riba esaki. 

Un tiki desigualdad ta inevitable den cualkier economia cu ta basa riba mercado, pero desigualdad excesivo tin un impacto severo riba un sociedad. Crecemento di desigualdad y falta di oportunidad por stagna economia, reduci productividad, polariza un comunidad politicamente, corumpi politiconan y perhudica balornan fundamental manera meritocracia caminda cu status den comunidad ta wordo determina door di prestacion, motivacion y capacidadnan. Tambe reduccion di entrada y nivel di bida como consecuencia di desigualdad hopi biaha ta bay acompaña cu multiple manifestacion den bida di cuidadanonan manera exclusion di bon educacion y otro problemanan social. Den e relato aki lo focus riba kico a y ta wordo haci pa frena desigualdad. 

Dicon mester bringa desigualdad? Pa cuminsa, ta evidente cu paisnan cu menos desigualdad, conoce un crecemento economico mas halto y duradero. Esaki International Monetary Fund (IMF) a mustra den su rapport titula: “Reparticion, Desigualdad y Crecemento”. Reparticion por wordo midi por medio di entrada (inkomen) y rikesa (vermogen). Bou entrada ta compronde entre otro salario, pensioen, subsidio, entrada procedente di huur propiedad, entrada via dividendo di compania, interes gana di uno su cuenta di spaar y deposito. Bou rikesa ta compronde entre otro cuenta di spaar na banco, capital inverti den compania, stock exchange of bono di gobierno, doño di priopiedad / real estate y/of simplemente posee cosnan balioso.

Causante exacto di desigualdad ta un materia compleho, pero e por ta relata na tipo di trabou, tipo di estudio, herencia, accesso na educacion, tipo di economia, tecnologia, tipo di mercado, tipo di estado di bienestar cu seguridad social (manera pensioen general y subsidio), integridad di gobierno, sistema di impuesto y globalisacion.

Na 1963 John F. Kennedy a bisa den un speech cu “ora laman subi, tur boto lo flota”, indicando cu mehoracion di economia general lo beneficia tur participante den economia, pero na 2014 e economista Thomas Piketty den su estudio amplio a mustra lo contrario, esta cu ta yate luhoso so a wordo lanta. Cu otro palabra: ta un grupito so a beneficia ora economia a crece. Rikesa n’e top den comunidad semper a keda den man di un grupo minoria y a wordo acumula y canalisa pa paraisonan fiscal manera Hulanda, Suissa y Bermuda.

E perdedornan relativo no ta esnan cu menos entrada sino tur hende cu no ta un capitalista. Cada un discrepancia entre pober y rico no ta solamente relata na fayonan den mercado liber, sino pa falta di hereda placa inicialmente, pa falta di conocemento financiero of pa falta di spaar pa inverti. E top-economista Joseph Stiglitz ta constata cu niun data ta sostene e idealismo di “American Dream”, esta libertad ta inclui oportunidad igual, exito, prosperidad y mobilidad social. No ta desconoci cu ta hopi a logra exito for di un convenio fragil, pero e American dream no ta e norma.

Na 2014 Thomas Piketty a causa furor cu su buki titula: “Capital den Siglo 21”. Segun Piketty, capital mester crece (return on investment) den mesun rapidez cu crecemento economico di un pais. Reparti prosperidad den nos sistema di capitalismo no ta pasa automaticamente, maneho gubernamental ta crucial pa logra esaki. No tin forsa natural pushando contra concentracion di rikesa p’e clase elite. Solamente un Tercer Guerra Mundial (cual no ta deseabel pero historia ta siña nos cu desigualdad a baha substancialmente rond Guerranan Mundial), of un intervencion di gobierno riba mercado liber pa frena desigualdad por preveni rikesa yega den man di un grupo minoria. Pa frena desigualdad, Piketty ta recomenda pa bini cu un impuesto universal riba capital priva di 0,5%, percurando asina tambe cu rikesa no lo keda core di un pais pa otro mirando cu paisnan ta competi cu otro ofreciendo regimen fiscal mas faborabel pa atrae companianan internacional.

Desigualdad na Hulanda

Reparticion via entrada na Hulanda ta basta stabiel y igual, danki na sistema di impuesto y seguridad social (sociale zekerheidsstelsel). Pero den cuadro di rikesa, Hulanda ta den top den Europa pa ta paisnan mas desigual. Segun Centraal Bureau voor de Statistiek (CBS) di Hulanda, na 2015, 10% di esnan mas rico, tabata posee mas di 60% di tur capital financiero (cual ta un suma di €726 biyon), siendo 60% di esnan mas pober tabata posee ni 1%. E 10% di esnan mas pober na Hulanda tabatin hunto un debe di €65 biyon.

Remarcabel ta cu na Hulanda impuesto riba capital ta relativamente abou, siendo impuesto riba salario ta mas halto y t’e impuesto cu mas ta contribui na caha di estado. Segun ‘Follow the Money’ cual ta un plataforma profesional di periodistanan cu ta haci investigacion profundo riba topiconan financiero-economico, di 2001 pa 2013 e contribucion di negoshi na caha di gobierno a baha cu 17.6 procentpunt y di accionista (aandeelhouder) cu 2.3 procentpunt, sinembargo contribucion di impuesto por medio di salario a compensa esaki y a aumenta cu 20.6 procentpunt, pues e belastingdruk a move di negoshi y accionista pa e clase trahador. Segun Piketty, Hulanda ta un di e regimen politico cu obhetivamente ta faborese capital priva. Pues conscientemente decisionnan politico ta aporta na mas concentracion di rikesa p’e clase elite. No ta kita afo cu Hulanda tin un estado di bienestar (verzorgingsstaat) fuerte caminda esnan mas debil den comunidad ta haya ayudo financiero por medio di subsidio, “uitkering”, “toeslagen”, “arbeidskorting”, etc.

Na Hulanda e impuesto riba dividendo ta 15% y e gabinete Hulandes lo bay elimina esaki por completo na 2019 pa (supuestamente) asina keda fiscal atractivo como pais y atrae inversionista stranhero. Otro argumento usa pa gobernantenan ta cu e ahustacion aki lo crea mas empleo y lo duna oportunidad pa inverti. Pero den nos mundo di capitalismo y globalisacion, crea balor pa un mercado a wordo separa di crea empleo. Placa no ta keda den un pais, pero inversionnan ta wordo haci caminda e ganashi ta mas halto. Esaki ta hopi biaha den paisnan menos desaroya caminda e gastonan ta hopi mas abou, pues e ahustacion fiscal no necesariamente lo crea hopi mas empleo na Hulanda. Hasta si inversion keda den un pais desaroya, esey no kiermen cu inversion ta relata na crea mas empleo, sino mas bien den automatisacion diseña pa remplasa empleo cu por ehempel intiligencia artificial y “robots”. Gobierno Hulandes lo perde €1.4 biyon na entrada cu e ahustacion aki. E pregunta ta surgi: ken realmente ta beneficia di tur esaki?

171231 igmar reyes 01
Impuesto na Aruba

Na Aruba, no tin mesun hopi data manera Hulanda, pero por remarca cu na Aruba tambe e impuesto mas imponi ta riba salario. Nos conoce un sistema di impuesto basa riba “draagkracht” riba entrada y un sistema progresivo, es decir esun cu ta gana mas mester paga mas impuesto cu esun cu ta gana menos, esaki por varia entre 0% pa entrada menos cu Awg 20 mil pa aña te cu 58,95% pa top entrada riba Awg 300 mil pa aña. Nos por haci e pregunta con progresivo realmente nos sistema di impuesto riba salario/entrada ta? Con e belastingdruk efectivo ta, ora tuma entre otro ‘aftrekposten’ den consideracion. Pa definicion un persona cu entrada abou no lo beneficia tanto di esaki ya cu e no tin (hopi) ‘aftrekposten’, pues esun cu realmente ta beneficia y ta wordo compensa p’e hecho cu e ta paga mas impuesto y probecha di posibilidadnan fiscal, ta e persona cu entrada (mas) halto. Esaki ta ilustra cu nos sistema fiscal no ta asina progresivo manera nos ta pensa, sin laga afo e pensamento cu e aftrekposten mas grandi ta contribui na engrandece rikesa mas ainda.

Impuesto riba ganashi (winstbelasting) ta 25%, impuesto riba dividendo (dividendbelasting: esta placa cu un accionista ta haya ora compania haci ganashi) ta 10%; cual por wordo mira manera un “vooraftrek” riba impuesto di entrada (inkomstenbelasting) cu ta 25%. Remarcabel ta cu Aruba no conoce impuesto riba rikesa priva manera na Hulanda. Nos no conoce impuesto por medio di ‘vermogensrendementsheffing’ riba accion (aandelen), riba cuenta di spaar, cosnan balioso y balor di segundo cas. Aki nos conoce solamente successiebelasting/ schenkingsrecht (cual ta impuesto riba rikesa hereda) y grondbelasting pa onroerende goederen cual porcentahe a aumenta recientemente. E tipo di impuestonan aki nan peso ta insignificante pa por cambia reparticion di rikesa na un manera mas igual. Pero dicon Aruba no conoce un impuesto riba rikesa priva?

Na october 2017, IMF den su rapport biannual “Enfrenta Desigualdad” a menciona diferente tipo di impuesto riba rikesa cu paisnan por considera pa asina frena desigualdad y realisa crecemento economico sostenibel y duradero. Tambe IMF a constata cu den ultimo 30 aña impuesto riba top entrada (topincome rates) a baha di 62% pa 32% den paisnan avansa. Esaki no ta conta pa Aruba, es mas nos impuesto riba top entrada ta 58,95% cual ta un di e mas halto di mundo. Gobernantenan di paisnan avansa cu a baha tarifa riba top entrada a hustifica esaki como algo necesario pa laga economia crece. Sinembargo, IMF a prueba por medio di data empirico cu no tin argumento pa sostene e pensamento cu si cobra mas impuesto riba e top 1% di esnan cu entrada mas halto den paisnan avansa, cu esaki lo tin un impacto negativo riba crecemento economico.

Na Aruba, impuesto riba ganashi a baha gradualmente den ultimo decada di 38% na 2002 pa 25% na 2016. Igual na Hulanda, esaki ta wordo hustifica door di gobernantenan pa asina crea oportunidad pa inverti, crea mas cupo di trabou y/of haci Aruba mas atractivo pa inversionistanan local y internacional. Na 2003 ora a introduci impuesto riba dividendo di 10%, gobierno a scohe pa baha tarifa di impuesto riba ganashi pa asina compensa e inversionista. Ora di introduci BBO a bolbe baha impuesto riba ganashi di 28% pa 25% (pero tambe ariba salario). Talbes den su totalidad mester wak e reduccion di impuesto riba ganashi como un compensacion di gobierno pa companianan cu gasto halto na prima social y desde 2012 pensioen mandatario? Un cos ta sigur cu bahando impuesto mas ainda riba ganashi, na prome instante no t’e pobernan ta beneficia pero ta resulta mas liher den situacion unda companianan lo por paga mas dividendo na accionistanan.

Desigualdad na Aruba

No tin data recien riba reparticion di entrada of cifra exacto riba rikesa priva manera paisnan avansa, pero Aruba su Oficina Central di Estadistica (CBS) na 2006 a publica un articulo interesante riba entrada y gastonan. E resultadonan di e encuesta ta mustra cu si compara data di 2006 cu 1998, e grupo cu entrada mas abou a bay atras den salario cu 9,5% durante e 8 aña, siendo e grupo cu entrada mas halto a subi cu 16.6%. Por haci e pregunta si tin crecemento di productividad na Aruba pa hustifica aumento di top-salario?

Ora compara entrada cu poder di compra entre 2006 cu 1998, CBS a constata cu e grupo cu menos entrada a bay atras cu 28.5% na poder di compra. Apesar cu e encuesta no ta recien, toch e ta duna un indicacion clave cu esnan cu top entrada a bay dilanti y esunnnan cu entrada mas abou a bay atras. Pa evita cu e grupo fragil aki nan derecho laboral wordo malusa (pa falta di informacion) of mihor condicionnan laboral (pa falta di un CAO), aki rol di sindicatonan por bira mas crucial y lo por percura pa reduci discrepancia den entrada door di preveni trahadornan cu tiki cualificacion (low-skilled) cay den mal gara di trabounan mal paga. Sin laga afo miho control di gobierno riba ilegalnan trahando pa menos cu sueldo minimo cu ta forma un concurencia directo y inhusto p’e grupo aki.

Por conclui, cu capitalismo den siglo 21 ta wordo reta. E crecemento di rikesa y e diferencia di entrada entre esnan mas rico cu esunnan menos fortuna ta test nos sentido di husticia, mobilidad social y oportunidad igual. Capitalismo tabata tremendo den aumenta rikesa, pero a fracasa den distribui esaki. Tuma Hulanda como ehempel cu ta un pais rico, su ciudadanonan tine relativamente bon, pero desigualdad den capital priva ta enorme. Ni multi miyonario Rey Willem Alexander y Reina Maxima ta paga impuesto riba salario y entrada, siendo esun cu salario minimo na Hulanda ta paga 36,55%.

Reparti prosperidad den nos sistema di capitalismo no ta pasa automaticamente, pesey maneho gubernamental ta crucial. E articulo aki no ta boga pa kita rikesa di e clase elite sin mas, pero pa percura pa tur hende paga nan ‘fair share’, principalmente esnan (hopi) rico, frenando asina concentracion di rikesa den man di un grupo minoria. Si no haci nada, nos modelo di capitalismo y democracia lo wordo enfrenta cu auto-distruccion, e prijs halto di desigualdad. No ta kita afo cu capitalismo a contribui na desaroyo positivo den hopi pais, caminda hopi ciudadanonan (rond mundo) a wordo saca for di pobresa, a conoce hopi innovacion, miho calidad di bida, etc., pero prosperidad di esnan mas rico mester ta den balansa cu e tamaño di e economia.

Mirando e trend mundial nos tambe por inicia discusionnan sano riba desigualdad na 2018. Tin indicacion cu desigualdad a crece na Aruba y cu esnan na top den nos comunidad so a bay dilanti riba entrada. Tambe nos sistema di impuesto ta parce uno di ta beneficia primordialmente un grupo minoria. Di otro banda nos conose un bon sistema di seguridad social. Por ultimo, pa por keda stimula comercio y entrepreneurship (cu ta crucial pa nos economia) talbes mester considera baha impuesto riba ganashi mas ainda, pero di otro banda hisa impuesto riba dividendo cu lo toca accionista den su ambiente priva so. Tambe lo mester considera introduccion di un impuesto riba rikesa priva. E placa cu wordo cobra por wordo destina pa un fondo special pa educacion y training, un inversion den abilidadnan y conocemento di nos hendenan, cual na mi opinion ta yabi pa progreso di nos pais y un herment clave pa frena desigualdad y crea oportunidad.

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

mail@arenapoliti.co

 

Advertising:

ads@bps.media

x

 

Inscribi pa ricibi un resumen semanal di e articulonan mas impactante.