Oranjestad - "Mercado laboral local ta prome", ta palabranan cu nos por lesa den un publicacion recien di Minister Paul Croes, pero mane e dicho ta bisa: "Accion ta bal mas cu palabra!".

Cu e intento pa elimina articulo 1613x, lo crea un porta hancho pa mas abuso tuma luga, creando instabilidad y insiguridad den nos mercado laboral. Cu un monster di “cheap labor” creciente y un Departamento di Labor cu no ta funciona, ta momento pa focus con pa proteha e trahado local y no busca manera pa corta nan garganta.


LEY Y COMERCIO
Articulo 1613x di nos Burgelijke wetboek ta unico den su forma. E articulo aki ta stipula e condicionnan stricto ora ta papia di un contract pa tempo defini. E articulo aki ta proteha e trahado di wordo uza y ya ora e no ta na beneficio di e comerciante mas, por mande cas numa.

Mientras cu for di entre otro ATIA ta papia cu door di elimina e articulo aki lo yuda starting up business, mester tene na cuenta cu ken cu ta cu bay den negoshi sa cu e ta core risico. Tuma e responsabilidad di un trahado ta un di nan y no por ta asina cu nos ta bay pensa con pa crea menos risico pa e comerciante riba custia di e trahado. Tuma un trahado den dienst ta un responsabilidad y ta algo cu e comerciante mester calcula di antemano pa e por sa si e producto y/of servicio cu e ta ofrece por genera suficiente entrada pa cubri tur gasto mas su ganashi.

No por bay descarta e posibilidad cu capitalistanan lo bira creativo y lo zorg pa elimina negoshinan existente y habri un nobo pa por probecha di e situacion. Sin laga afo cu e pretexto di mester baha gasto lo pone cu lo corta den hopi contractnan exsistente pa duna mas forsa na e “cheap labor”. Comerciantenan lo no tin e peso mas di worry cu beneficionan adicional pa e trahador ya cu e lo djis bira un wega di “hire & fire”.


EFECTONAN NEGATIVO DIRECTO
Puntra cualkier dama riba nos isla y lo bo keda sorprendi cuanto di nan a of ta experencia intimidacion sexual na porta di trabou. Mesun cos ta conta pa hendenan cu ta ser discrimina door di entre otro nan rasa, color of preferencia sexual. Locual cu tambe lo bin acerca ta e posibilidad cu lo cuminsa forsa trahadonan pa traha overtime sin pago y/of corta den nan ora di break. Trahadonan cu ya caba ta pasando den un di e situacionan aki ta experencia represalia na un manera of otro si nan busca nan derecho. Si e cosnan aki ta pasando cu trahadonan cu ta den e asina yama “vaste dienst”, kico bo ta kere e efecto lo bay bira ora cu nan ta den un ciclo di "proeftijd" largo? Trahadonan lo mester bay guli y manda abou tur tipo di cos of keda sin trabou.


POSIBEL SOLUCIONNAN
E idea di elimina articulo 1613x di nos Burgelijke Wetboek ta pa supuestamente stimula e productividad den e sector laboral y pa brinda mas oportunidad pa esnan cu ta sin trabou haya un trabou pa un tempo defini/corto. Pero si di berdad kier proteha mercado laboral local, tin otro opcionnan mas practicto cu por cana.

1. Duna un descuento den belasting pa companianan cu ta inverti den e educacion di nan trahadonan. Esaki lo stimula e comerciante pa inverti den su trahadonan, cual na su turno lo haci un trahador sinti su mes balora y lo hisa e productividad.

2. Duna un incentivo di Gobierno. Por crea un plataforma caminda un biaha pa aña companianan por nomina un of mas trahado cu a destaca na trabou pa asina haya un incentivo. Esaki por bin den forma di un toelage, un descuento den inkomstenbelasting of asta por ehempel un vakantie paga. Esaki un biaha mas lo stimula hende pa duna e mihor di nan parti, creando un efecto positivo pa e compania y economia en general.

3. Bin cu un regeling manera esun di 80/20 na Corsou. Si di berdad kier proteha e mercado local, por implementa un ley similar na esun di Corsou, caminda lo duna miho oportunidad na e local y asina combati e fenomeno di “cheap labor”.

4. Introduci un extra belasting pa companianan cu tin trahadornan stranhero. Door di pone un gasto extra pa tin un trahador stranhero, lo pone e compania evalua si e lo kier sigui haci esaki of kier uza forsa laboral local.


CONCLUSION
Gobierno mester crea oportunidadnan igual pa tur ciudadano. Eliminacion di e ley aki lo zorg pa esun cu ta sin un trabou actualmente, pero cu kier progresa lo mester bay depende di e boluntad di e dunado di trabou pa tum’e den vaste dienst. Si e dunado di trabou dicidi di keda extende e contract, e persona lo keda den un temporada largo cu insiguridad pa su futuro y no lo tin e oportunidad pa hopi tempo di por cera por ehempel un hipoteca pa traha e cas di su soño.

E scenarionan aki sigur lo hunga un rol grandi den e felicidad di hopi ciudadano. Lo crea un comunidad cu hopi hende deprimi y insigur. Lo aumenta abusonan di poder y duna mas forsa na e cultura di miedo alarmante cu nos tin. Capitalismo lo take over completo, eliminando e clase medio, haciendo e rico mas rico y e pober mas pober.

Por ultimo, mi ta di pensamento cu prome cu pensa di elimina un articulo asina importante, lo ta bon pa e Minister en cuestion presenta un rapport di kico e efectonan riba e area social lo ta. Tambe ta di spera cu tur 21 Parlamentario pone seriedad riba e tema y cu Parlamento mane e defensor di pueblo, exigi un rapport di e Minister y alabes traha nan mesun rapport, pa por compara esaki.