Perspectiva Independiente without background 001

Cristian Soto Garcia: 'ARUPARKING: Pa ken e beneficio real ta?'

CristianSotoGarcia01
Oranjestad - Un bon cuminsamento nifica un bon final. Cu un ley pa parkeo mester a wordo introduci, no tin duda. E vision aki no ta nobo y a start bou di iniciativa di Gabinete Oduber IV (hera mas prome cu esey) y e dia lo mester a yega pa e bira un realidad. Cu introducion di un ley pa parkeer, bo ta zorg pa un centro di ciudad miho organisa, mas representabel y un miho fluho di trafico cual na su turno nifica cu entre otro busnan lo por duna miho servicio. Pero! Despues di a sinta analisa e modelo cu a wordo uza pa implementa esaki y con e ley a ser ehecuta, mi ta yega na e pregunta: Na beneficio di ken Aruparking ta?

BURACO DEN LEY
Ley di parkeo tin algun articulo incompleto of onduidelijk. E prome ta articulo 1 inciso 2, cual ta duna autoridad pa e Ministernan concerni dicidi cua vehiculo no ta cay bou di e ley aki. Locual ta notabel, ta cu no ta mara e desicion aki na un Landsbesluit cu mester wordo publica den un Landscourant, pa asina henter Aruba por sa, cua vehiculo esakinan ta. Pa hibabo un tiki mas leu, por a asta laga esaki den man di e compania cu tin e vergunning y stipula con esaki mester wordo categorisa (ancra den ley). E articulo aki, mane cu e ta, ta permiti cu Ministernan por "fix" ken cu nan kier y e pio di tur cos ta, cu ta un grupo chikito so lo sa.

Un otro punto cu ta resalta, ta articulo 3 inciso 3 cual ta otorga e Ministernan concerni e autoridad pa pasa over tur loke ta regarda e construccion, mantencion, maneho y mantenemento di parkeermeters y infrastructura cu tin di haber cu e ley aki. Aki ta creando un espacio, por medio di e compania N.V. pa otorga trabounan na personanan of compania di un grupo selecta. Si esaki lo a keda den man di Land Aruba, almenos e probabilidad lo keda cu un destaho publico lo por a wordo haci y/of lo por a wak cuanto placa a bay pa haci esaki.

UZO DI COMPANIA N.V.
E uzo di un compania N.V. ta un di e tacticanan mas creativo cu por a wordo pensa y ta aki ta unda e porco su rabo ta crul. Un compania N.V. no ta mara legalmente na presenta su cifranan na Pueblo ni tampoco mester divulga informacionan cu lo por demostra cu ta benificiando un grupito selecta. Preguntanan cu ta bin na mente: Di ken ta huur e edificio y cuanto esaki ta costa pa luna? Cuanto placa ta bayendo na salario? Cuanto costa cada sticker y di cua compania ta buscando esaki? Di cua compania a cumpra e mueblenan, baisnan, takelwagen etc y cuanto esakinan a costa? Cua compania ta encarga cu e mercadeo y cuanto esaki ta costa? En fin, un caha completo di pregunta cu pueblo lo keda sin haya contesta riba nan pa motibo cu simplemente un compania N.V. no ta obliga di publica nada na Pueblo y tampoco a regla esaki den e ley di parkeo. Dus por conclui cu esaki ta un porta hancho hancho habri pa corupcion, sea directo of indirecto.

Un solucion practico lo por tabata, di a ancra e consessie (vergunning) cu ta wordo stipula den articulo 3 inciso 3 di e ley di parkeo, na un Landsbesluit houdende algemene maatregelen y for di den e Landsbesluit aki stipula tur e 'reglanan di wega', percurando pa e consessiehouder ta transparente cu e pueblo di Aruba na TUR momento y den TUR aspecto.

PESO RIBA TRAHADO
Pa por yega na un fondo garantisa, a dicidi di pone e peso riba e trahadornan cu ta labora den e zona di parkeo. E peso aki ta wordo den su mayoria rechasa tanto dor di trahadonan den sector priva como esunnan publico y cu nan rason. No por ta asina cu bo ta bay atras den salario 900 florin den un aña, na caminda cu mayoria trahado den centro tin un entrada abou y simplemente no ta husto cu ta purba di obliga nan di carga e peso di un proyecto cu no a wordo bon studia prome cu e la wordo ehecuta. E rechaso cu tin di parti esnan cu ta traha den e zona di parkeo, ta pone cu un djis lo perde saco sin haya chens mes di hinca e cangreu.

AUTORIDAD
E ley aki conoci mane Landsverordening Parkeerzones ta stipula den articulo 12 inciso 1 ken tin autoridad pa ehecuta e sancionan discribi den e ley. E articulo ta duna autoridad na polisnan uniforma. E mes un autoridad aki ta skirbi tambe den articulo 20 inciso 1 di e Landsverordening wegverkeer. Na banda di esaki, e ley ta duna autoridad na un 'parkeerwachter' cu ta ser asigna pa medio di un Landsbesluit. Articulo 12 inciso 1 ta bisa claramente tambe, cu e Landsbesluit cu ta asigna e persona como parkeerwachter MESTER wordo publica den e Landcourant di Aruba. Esaki nifica cu asta si un persona ta den un posicion di un dicho Landsbesluit pero esaki no a wordo publica den e Landscourant, e persona simplemente no tin autoridad y lo ta eherciendo un trabou cu ta contra locual e ley di parkeo ta bisa.

Den e situacion actual, te cu e ultimo Landscourant publica 9 di September 2015, no tin niun Landsbesluit publica cu ta asigna por ehempel 'Juanito' mane un parkeerwachter. Esaki nifica, cu solamente Polis tin autoridad te cu awo, pa mishi cu bo auto, por duna bo un boet y/of pone wielklem igual cu tow esaki.
Nota: sigiente Landscourant di Aruba ta wordo publica 18 di September 2015 segun informacion ricibi di Directie Wetgeving en Juridische Zaken.

CONCLUSION
CristianSotoGarcia 01E ley aki y e manera con ful e proyecto ta wordo ehecuta ta impugna (contra di) e transparencia cu un Gobierno ta supose di duna su Pueblo. Den mi opinion personal, lo tabata miho pa crea un departamento bou di cuerpo policial pa ehecuta e ley aki. Lo por a tuma e cantidad di hende necesario pa ehecuta e proyecto for di e overtollingheidspoel, cual no lo a costa nada extra den salario ya cu hopi den e grupo aki ta na cas cobrando 100%.

Lo por a dividi e placa cu ta wordo genera entre Arubus "parkeermeters" y Cuerpo Policial "boet". E extra placa di e boetnan aki por a bay pa cumpra entre otro miho ekipo di trabou pa asina nos cuerpo policial por bira mas eficiente. Un efecto positivo lo a bin di su mes pa Arubus; un miho fluho di trafico nifica un miho servicio y mas clientela ya asina yudando nan financieramente. Tur esaki lo a minimalisa e espacio pa corupcion no solamente pa e Gobierno actual pero pa tur cu sinta despues. Nos lo ta trahando preventivo y asina evita mas desaster financiero di locual nos tin caba.

Aunke nan a bende pueblo un 6 pa un 9 den dia cla, mi lo kier keda positivo cu e pensamento cu ainda no ta laat. E ley aki ta recien, ainda tin espacio na e momento aki pa coregi locual no ta bon regla y haci di un mal cuminsamento un bon final.

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.