Den cuadro di articulo 10 di e ley di “Instelling Ministeries” di 19 di december 2013, unda cu gobierno y su ministernan, basa riba ley, mester percura pa e.o. maneho y toma di decision drechi y transparente, y cumpli cu e procedura cu ta regarda transparencia den gobernacion, Union Patriotico Progresista – UPP kier pa minister di Economia y Comunicacion por duna claridad riba e nombracion recien na Tele-Aruba.
Tambe UPP ta spera cu tanto Director di SETAR y Raad van Bestuur di SETAR, como compania cu ta di nos tur, duna e aclaracion necesario pa e nombracion di Andre Schouten como e proximo director di Tele Aruba entrante 1 di juli proximo.

Te awe no a bin ningun comunicado oficial, sino un simpel noticia, unda ta referi na Schouten como un hende cu no ta desconoci den mundo di media, pero a maneha diferente negoshinan, manera Oranjestad Printing, Pro-Graphics y La Terraza, mientras den e page di NoticiaCla ta poni cu Schouten a wordo "ACERCA" pa e funcion.

Den cuadro di transparencia UPP ta urgi minister Mike de M. y na SETAR pa:
1. Publica e requisitonan pa por bin na remarca pa por fungi como director di un planta di television.
2. Dicon e persona a wordo acerca y ofreci e funcion, y dor di ken el a wordo acerca y ofreci e funcion?
3. Banda di Andre Schouten a acerca otro candidatonan?
4. Dicon no tabata tin un solicitud habri pa duna oportunidad na otronan pa tambe aplica?
5. Ya na april 2015 tabata conoci cerca 24ora cu un persona di inicial AS a wordo menciona como hefe. Di ki tempo
e persona aki a wordo acerca?
6. Den caso cu ta tuma un hende, ta tuma na cuenta su credencialnan den comercio, mirando cu hustamente e
companianan cu ta wordo menciona den e articulo, ta compania cu a bay malo y hasta tin di nan a sera.
7. Sr. Schouten lo a wordo acerca bou di un "onderonsje" di Utilities NV, ya cu segun informacion sr. Schouten
tambe ta den Raad van Bestuur di Utilities?
8. Kizas esaki por wordo mira como un recompensa pa e loyalidad como miembro di Raad van Bestuur na Gobierno
y particularmente na Minister Mike de M., den henter e asunto di hedging y tambe liña di biogas di compania
EcoTech y WEB NV, y alabes percura pa financia e locura Green di Mike E.?

UPP ta lamenta cu keto bay ta sigui hunga patronahe politico cu propiedad di Pueblo. Ya caba den pasado nos a laga nos voz resona, riba nombracion di varios directornan cu a haya un recompensa politico, pa nan contribucion na loke tabata e triunfo di AVP den eleccion.
Y awor parce cu ni Gobierno ni Raad van Bestuur di SETAR (unda cu e mesun amigonan manera Tom Pietersz y Frank Hoevertsz ta sinta tambe den Raad van Bestuur di Utilities NV) no ta practica transparencia, ni cumpli cu e derecho riba oportunidadnan igual.
Cu tur respet pa e director nobo di Tele Aruba, su historial di negoshi parce di no ta di impactante ey.
E hecho cu e por a print Chuchubi y The News (cu no ta existi mas), no ta nifica cu e tin afinidad cu loke ta un planta di television. Sigur lo tin otro personanan cu a traha y ta trahando den e mundo di media y cu tin preparacion mediatico.
Nos por menciona personanan manera Tito Lacle, Lelicia Tromp, Ruben Trappenberg y un Rafael Croes, cu banda ta den mundo di media, ta tambe un ehecutivo exitoso.
UPP ta spera di por haya un reaccion di minister of di SETAR den e caso aki, ya cu nos ta condena si ta trata aki di un nombracion basa riba faboritismo politico.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juni 18, 2015

Expresionnan haci den e articulo aki no necesariamente ta refleha opinion di ArenaPoliti.co