Minister Oduber ta sigui reuni cu gremionan riba e topico di All-inclusive. 

Diamars atardi Minister Otmar Oduber a reuni cu e hunta di supervision y directiva di Camara di Comercio. E mandatario conhuntamente cu tur e huristanan y expertonan cu a bin ta trahando riba e ley aki pa e  ultimo 3 añanan tabata presente pa asina contesta tur pregunta of incertidumbre cu por tin pa cu e ley cu dentro di poco lo keda trata den Parlamento di Aruba. Minister Oduber ta indica cu den e reunion aki mescos cu e ultimo reunionnan di entre otro ATIA y tambe cu e Asociacion di RealEstate di Aruba, ta splica cu ta trata aki di un cambio di ley cu den un forma hopi obhetivo tin un trayecto basta largo caba. E ta un preocupacion hopi grandi unda Camara di Comercio un biaha mas a demostra nan sosten pa cu esaki.

"Mi ta sinti si cu hopi di e informacion di e ley cu ta na Parlamento na e momentonan aki, no tabata cerca nan. Hopi di e informacion tabata transmiti incorectamente y bruha." Sr. Oduber ta comenta.

Durante e reunion Minister Oduber a comparti tur e documentonan, rapportnan y te hasta e conseho di Raad van Advies. "Aki atrobe por a nota percepcion robes di e informacion. Sr. Croes cu ta di Directie Wetgeving hunto cu e abogadonan a mustra henter e hunta di KVK, cu mas di 80% di tur e sugerencianan trece dilanti den e conseho di Raad van Advies, a wordo incorpora den e cambio di ley."

Minister Oduber ta sigur cu tur e reunionnan aki ta dialoga y ta ricibi puntonan cu por sigui haci e ley uno mas miho posibel. Na momento di trata e ley den Parlamento e mandatario ta indica di trece tur esakinan riba mesa pa percura pa bienestar general di Pais Aruba.

"Ora a splica con e ley ta funciona y ta hinca den otro, discusionnan cu tin riba e cantidad di aña di e permiso di e hotelnan of si e minister ta haya poder riba e forma con ta haci negoshi, a pasa pa pasado."

KvK a demostra un comprension hopi amplio pa e ley aki. Minister Otmar Oduber ta termina bisando: "Ta importante pa e interes general di comunidad di Aruba, cu ta depende asina tanto di e sector turistico, ta esun cu lo sali beneficia di e ley aki."

Expresionnan haci den e articulo aki no necesariamente ta refleha opinion di ArenaPoliti.co