ORANJESTAD - Siman pasa directiva di Camara di Comercio (KvK) a reuni cu Minister di Finanzas, Angel Bermudez pa asina nan tambe comparti e inquietudnan y na mes momento conoce mas tocante e maneho di e mandatario.

E reforma di impuesto sigur tabata un topico cu a pone riba mesa debi tambe na e cantidad di pregunta y discusionnan entre comerciantenan cu a surgi den e ultimo tempo. Ademas e representantenan di Camara di Comercio a haya un sesion di informacion riba e plannan actual di Gobierno y kico tur por spera den e proximo lunanan.

Minister di Finanzas a tuma su tempo pa splica den placa chikito e reformanan cu ta forma parti di su maneho manera e reforma social y tambe e reforma fiscal. Na mes momento e la informa tocante e ultimo desaroyonan di su bishita na Washington, pues pa e aña aki ainda lo tin un seminario di IMF basa riba Conseho Fiscal y sigur ta spera cu e directiva di Camara di Comercio tambe por participa.

E mandatario a expresa cu ta esencial pa e directiva di Camara di Comercio reuni cu e comision di Profesor Vermeend kende ta encarga cu e rapport riba e situacion actual di e sistema di impuesto y recomendacionnan riba modernisacion y simplificacion di nos leynan.  Di e manera aki e directiva tambe por aporta cu informacion valioso na e comision y pinta e scenario actual y dificultadnan cu nan ta enfrenta den e sector comercial.

E representantenan di KvK a manifesta e necesidad pa un reforma di impuesto y ta compronde e vision pa modernisa y simplifica esaki, pues e mandatario ta agradecido cu e por conta cu e apoyo di parti Camara di Comercio pa mehora e sistema di impuesto.

Na mes momento e legalisacion di diferente procedemento di Gobierno ta uno cu ta conta cu hopi atraso. E mandatario di finanzas a informa e directiva cu e ta al tanto di mayoria aspecto cu a wordo palabra caba mediante dialogo pero cu ainda no a wordo legalisa, pues e formalisacion di e acuerdonan aki tambe ta prioridad pa Minister Bermudez pa e aña aki.

Expresionnan haci den e articulo aki no necesariamente ta refleha opinion di ArenaPoliti.co