Cu cua placa, y na unda?
Pa realisa un proyecto di e magnitud aki, PPA ta kere den un Public Private Partnership (“PPP”). Pues un colaboracion entre Gobierno y sector priva. Algo cu por tuma luga den diferente forma. Gabinete Mike Eman II actualmente ta haci uso di PPP’s pa e.o. Green Corridor y Watty Vos Boulevard.

Segun e lider di PPA, construccion lo mester tuma luga “na un sitio ‘strategico’ for di unda e bishitantenan na e Trade Center aki por observa diariamente e dinamismo di nos pais. E caretera mas ‘druk’ di Aruba, e bay bin di nos cruiseships, y e avionnan cu ta baha na nos aeropuerto internacional di Aruba.” Y cu e mudamento di waf pa Barcadera, sr. Nisbet ta considera cu e terenonan di y band’i waf di Oranjestad cu lo bira disponibel, ta un sitio adecua pa un AWTC.

Competencia den region
Nos no mester busca leu pa haya un World Trade Center existente den nos region. World Trade Center Curaçao (WTCC) ta miembro di World Trade Centers Association, e red global di mas cu 300 World Trade Centers den mas cu 100 pais. WTCC ta describi como “the most complete complex for the development of your business or event in the Caribbean and it can fulfill your needs from the highest standard to the most single task, all in one location. The center is composed of 7 principal parts: Auditorium, Trade Mart, Exhibition Hall, Business Center, Executive Congress Center, International Building and the Clarion Hotel & Suites.”


Apesar di e ‘competencia’, sr. Nisbet ta di opinion cu “Aruba tin su propio ‘caracter’ y imagen den ofrece y ejecuta ‘servicionan’ y cu e formula debido y cu un marketing eficiente e Aruba World Trade Center lo crea cupo di trabao di ‘calidad’ y lo eleva e nivel di servicio cu Aruba conoce te na e momento aki.”

Inclui vision di otro partido
Sr. Nisbet a expresa cu PPA ta spera di por “habri e mentenan pensativo y visionario den nos sociedad y pone nan pensa, analisa, critica y kisas sostene nos vision.”

Sosten for di pueblo pa e idea ta necesario pa haci’e un realidad. Y considerando e situacion politico actual, sosten di otro partido(nan) politico tambe lo ta necesario. 
Pa haya sosten di otro partido, ta interesante pa wak si un AWTC por inclui diferente vision di otro partido. Por ehempel, lo mester evalua si por inclui aspectonan di e vision ‘green’ di AVP (‘Green Gateway’ na Eagle), e vision di un ‘hub’ internacional, y tambe turismo di calidad. MEP ta kere den stimula un sector di servicionan financiero (financiële diensten sector), y tambe den un Instituto di Arbitrahe Arubano (servicionan legal internacional), hunto cu “ful un support mechanism” necesario (huridico, economico, administrativo). PDR ta kere den servicionan dirigi riba e mercado internacional cu uso di internet (ecommerce, etrade, apps, intellectual property). UPP ta kere den stimula ecommerce na Aruba, stimula servicionan pa exterior, y desaroya Aruba den un ‘hub’ comercial.

Un cos ta sigur, cu e mudamento di waf (containerhaven) pa Barcadera, Aruba por haya un oportunidad unico pa desaroya e area cu lo bin disponibel na Oranjestad. Un ‘prime location’, cu ta bale la pena pa pensa hopi bon riba ki desaroyo exactamente Aruba lo kier wak bira un realidad pa e area aki, y ki tipo di diversificacion economico nos kier desaroya. 

Kico abo ta pensa di e idea di un Aruba World Trade Center?