Den un articulo anterior, ArenaPoliti.co a haci e pregunta si e refineria na Aruba mester wordo desmantela. Den e articulo aki nos ta publica opinion di diferente partido politico riba e asunto aki.

AVP
E partido na mando ta indica di a haci hopi esfuerso pa bende e refineria. Gabinete Mike Eman I a logra habri e refineria bek pa un tempo limita. Durante e ultimo añanan, cada tanto luna por a lesa cu minister presidente Mike Eman y minister de Meza a laga sa cu tin negociacionnan prometedor andando pa bende e refineria. Awo minister de Meza ta mustra di ta fabora un desmantelacion.

E ausencia di un refineria lo contribui na e plannan di gabinete Mike Eman II pa haci San Nicolas e segundo capital turistico di nos pais. Segun AVP, despues di negociacionnan cu varios compania rond mundo, a resulta cu probablemente no tin cumprado pa e refineria. Y den e caso cu no tin cumprado, AVP ta considera un desmantelacion e miho opcion.

PDR
Parlamentario Andin Bikker (PDR) ta mira posibilidadnan pa un reapertura di e refineria. E ta di opinion cu gabinete Mike Eman ta “mucho lief” cu Valero. Sr. Bikker ta sospecha cu Valero no kier bende e refineria, e.o. pa e no bin den man di un competido. Lo tin varios interesado cu gobierno y Valero no a duna su debido atencion. Segun sr. Bikker, kisas gobierno no tin e corahe pa para duro y bisa Valero cu interes general di Aruba mester bay prome cu tur cos.

MEP
Partido MEP ta comparti e pensamento di sr. Bikker, cu gabinete Mike Eman no ta haciendo lo maximo pa bende e refineria. Segun parlamentario Glenbert Croes ministernan di gabinete Mike Eman ta defende interesnan di Valero enbes di bringa pa habri e refineria bek. E ta expresa cu MEP ta convenci cu e refineria tin un futuro, y cu e ta di vital importancia pa Aruba su economia. Segun sr. Croes tin diferente companianan seriamente interesa den cumpra e refineria. Parlamentario Dangui Oduber a bisa cu historia ta ripiti, referiendo na 1989 ora gabinete Oduber I a para e desmantelacion inicia bou di gabinete Henny Eman I, y a logra bende e refineria.

UPP
Lider di UPP, sr. Booshi Wever, ta di opinion cu Aruba mester cuminsa pensa riba un Aruba sin refineria. Pero si logra bende e refineria, gobierno mester exigi cu e refineria wordo modernisa, “pa evita cu aki 5 aña nos ta den e mesun discusion”, sr. Wever a bisa. Y si e refineria wordo desmantela, UPP ta na fabor di un plan total pa desaroya San Nicolas, cu envolvimento di gremionan, tur partido politico, y un autoridad cu mester funciona basa riba reglanan di good governance. “Esaki pa elimina politekeria”, sr. Wever ta añadi. Pa detayes di un plan pa p’ariba di brug, e ta referi na e programa di UPP.

RED
Partido RED no ta kere cu e refineria mester wordo desmantela. Segun lider di e partido, Rudy Lampe, tin un (1) motibo valido pa tene e refineria funcional na un forma limita, y esey ta door di crea un training school internacional pa tur loke tin di haber cu refineria. Sr. lampe: “Studiantenan di tur parti di mundo lo bin pa siña kiko ta come y bebe den un refineria. Na mesun momento e curriculum lo ta habri tambe pa energia alternativa”. E ta menciona cu e edificio di International School lo por wordo usa pa duna les, y henter e refineria por ta disponibel pa duna ‘training on the job’. Segun sr. Lampe no lo mester refina pa cumpli cu clientenan grandi riba mercado internacional, sino loke ta necesario pa e ta operacional y por duna e training.

Na momento di publicacion, ArenaPoliti.co no a ricibi reaccion di PPA riba e asunto aki.

Expresionnan haci den e articulo aki no necesariamente ta refleha opinion di ArenaPoliti.co