Perspectiva Independiente without background 001

Mike de Meza: Flip-Flopper?

MdM02
Flip-flop: a sudden real or apparent change of policy or opinion by a public official, sometimes while trying to claim that both positions are consistent with each other.

Recientemente a sali na cla cu hedging agreements sera pa un termino largo, cubriendo riba 90% di e necesidad di WEB pa fuel oil, a resulta di a crea un desventaha di hopi miyones di Florin pa pueblo y comercio na Aruba. Hopi declaracion a wordo haci tocante e decision aki. E minister encarga cu utilities, sr. Mike de Meza, a haci declaracionnan e aña aki cu na prome instante ta zona comosifuera cu nan no ta cuadra cu su propio declaracion na aña 2012. E tempo ey (2012), sr. de Meza a splica cuanto y pa con largo WEB a hedge, mientras cu e aña aki ela bisa di no sa tocante di e hedging di 2014.

NoticiaCla.com a confronta sr. de Meza cu su declaracionnan, y e minister a duna un splicacion indicando cu e no a gaña. Segun NoticiaCla: “E splicacion cu de Meza a duna ta cu tur dos e ta na altura di dje. Sinembargo e prome grabacion e tabata enberdad na altura cu tabatin hedging, pasobra e la wordo bisa despues cu e la tuma lugar. E di dos grabacion haci, de Meza ta bisa di tabata referi na e hecho cu na october/november 2014 e no tabata na altura cu a bolbe haci hedging. Pues berdad e ta nenga cu e sa di e hedging, pero e ora e ta referi specificamente na e hedging di 2014 y no 2012.

E confrontacion y declaracion ta trata e pregunta si sr. de Meza tawata tin conocemento di e diferente hedging agreements (2012 y 2014), y bo lo por conclui cu tecnicamente sr. de Meza no a gaña riba e pregunta ey. Loke no a wordo trata ta su declaracionnan tocante maneho di hedging.

Hopi bon
Na augustus 2012 sr. de Meza a bisa: "...hopi biaha bo ta haya un hedging pa tres luna, seis luna, WEB por a haya un hedging pa un aña y mey cu ta hopi bon, vooral den un mercado cu ta fluctua asina hopi.
Por lesa cu sr. de Meza a considera hedge pa 18 luna “hopi bon”, pero na 2015 ela bisa cu "..ora bo tin un mercado cu ta asina volatile, ta cambia constant, ta dificil pa haci un prognostico riba termino mediano, corda riba termino largo... hasta riba termino cortico. Dus bo mester ta hopi cauteloso cu bo no por leg bo mes vast cu un termino largo caminda bo no realmente sa...".
Sr. de Meza eventuelmente lo por defende su mes door di bisa cu na 2012 e mercado di fuel oil no tawata 'volatile', y cu na 2014 si, y cu e mes no lo a considera hedge 100% pa 18 luna "hopi bon" na 2014. Pero e argumento eventual aki no ta uno fuerte, considerando cu historicamente durante 18 luna semper tin un risico suficiente grandi, cu no ta hustifica pa hedge (casi) 100% ora ta trata di prijs di coriente pa ful un isla, cu e pueblo y comercio tin cu paga. Ademas, e mes ta papia di "un mercado cu ta fluctua asina hopi" na aña 2012.

All eggs in one basket
Na 2012 sr. de Meza a sigui bisa: “Dus WEB a ehecuta e ora esaki, dos tercera parti [2/3], ohala si nos por haya un otro un tercera parti [1/3], e ultimo, pa hedge...". Kinan e minister ta sugeri cu lo ta bon pa hedge 100%.
Pero na 2015 ela bisa: "..y ora bo ta hedge tambe bo mester sa bon tambe con bo ta bay hedge, bo no por pone tur... manera nan ta bisa den ingles 'put all your eggs in one basket'... pone tur... e webonan den un canasta. Bo tin cu wak e risico, bo tin cu spread e..."

Sr. de Meza ta bay di “hopi bon” pa “hopi cauteloso”, y di 'ohala hedge 100%' pa ‘you can’t put all your eggs in one basket, bo tin cu spread e risico’.

Durante un conferencia di prensa na februari 2015 e minister tambe a bisa cu "porta no t'e decisionnan cu ami lo a tuma", referiendo na e decisionnan di hedge, cu e ta considera decisionnan di WEB.
Ademas por lesa e siguiente declarion di sr. de Meza riba 24ora.com (8 maart 2015) : “[sr. de Meza] a splica cu e mes no tabata sa di e contract di hedging pa 2015, ni di esun pa 2016 y tampoco cu e tabata encera un porcentage asina halto. El a agrega cu semper el a compronde, basa riba e hedging contract tempo a cuminsa na 2003, cu ta 1/3 parti di e consumo di zeta lo ta wordo gehedge.

Responsabilidad
Un motibo pa hedge ta pa tene e prijs di coriente stabiel. Den pasado a resulta cu ora prijs di coriente subi, prijs di hopi producto na Aruba ta subi, pero ora e prijs di coriente baha, otro prijsnan no ta baha, creando inflacion. Pues por tin bon intencion tras di hedging. Pero semper tin un riesgo, e por resulta di ta positivo, pero tambe negativo. P'esey den pasado WEB no tawata hedge pa terminonan largo, y no pa un parti mayoria di e necesidad di fuel oil.
For di e rapport 'Hedging Activities of Water- en Energiebedrijf Aruba N.V.' di PwC por conclui cu e motibo principal cu WEB ta hedge, ta paso Gobierno kier. "The main reason for hedging is the wish of the Government of Aruba to maintain long-term stable prices for electricity and water in Aruba". Pues ta deseo di Gobierno, den e caso aki representa pa minister di economia y utilidad, y e mesun minister na 2012 publicamente a apoya e idea pa hedge 100% pa 18 luna. Den e caso actual a hedge mas cu 90% pa termino largo (2015, 2016), cu te ainda tin un resultado hopi negativo, y e minister ta nenga responsabilidad.

Despues cu e pregunta a surgi si e minister, politicamente responsabel pa WEB, tin cu tene honor na su mes y entrega su retiro, sr. de Meza a defende su mes bisando cu, “pa bo ta responsabel, bo mester tin e autoridad pa tuma accion. Bo no por wanta un hende responsabel of accountable si e no tin autorisacion adecuado pa preveni of tuma accion corectivo”. Pero e mes, minister di utilidad, publicamente a apoya un maneho di hedge di 100%, y pa un termino di 18 luna, mientras cu e maneho di Gobierno ta e motibo principal cu WEB ta hedge. Asina mes, te ainda no por a ripara algo di 'politieke verantwoordelijkheid'.
E por ta hopi malo pa su carera como minister (y politico) pa a apoya un maneho cu a resulta di crea un desventaha di tanto miyones di Florin, cu ta toca henter pueblo. Pero esey no ta hustifica cu e mandatario no ta acepta responsabilidad, y basicamente ta culpa WEB pa tur cos. We need a better explanation. E splicacion ey ainda falta.



Declaracionnan di sr. de Meza

Augustus 2012:
"...hopi biaha bo ta haya un hedging pa tres luna, seis luna, WEB por a haya un hedging pa un aña y mey cu ta hopi bon, vooral den un mercado cu ta fluctua asina hopi. Dus WEB a ehecuta e ora esaki, dos tercera parti [2/3], ohala si nos por haya un otro un tercera parti [1/3], e ultimo, pa hedge..."


Januari 2015
"..y ora bo ta hedge tambe bo mester sa bon tambe con bo ta bay hedge bo no por pone tur.. manera nan ta bisa den ingles 'put all your eggs in one basket'... pone tur... e webonan den un canasta. Bo tin cu wak e risico, bo tin cu spread e..."
"..ora bo tin un mercado cu ta asina volatile, ta cambia constant, ta dificil pa haci un prognostico riba termino mediano, corda riba termino largo... hasta riba termino cortico. Dus bo mester ta hopi cauteloso cu bo no por leg bo mes vast cu un termino largo caminda bo no realmente sa..."


Maart 2015
24ora.com: “Ningun colega di Gabinete Mike Eman II, ni di Gabinete Mike Eman I tabata involucra, ni tabatin detayenan di negociacionnan y kico ta e datonan, decisionnan, argumentacionnan ora tabata negocia pa hedging. No tin ningun di mi coleganan cu sa di e informacion detaya aki,” De Meza a remarca.

"E mandatario a bisa cu ta pa medio di e raport cu el a ricibi awo e detayenan di e contract y proceso di decision a bira conoci. El a splica cu e mes no tabata sa di e contract di hedging pa 2015, ni di esun pa 2016 y tampoco cu e tabata encera un porcentage asina halto. El a agrega cu semper el a compronde, basa riba e hedging contract tempo a cuminsa na 2003, cu ta 1/3 parti di e consumo di zeta lo ta wordo gehedge." (link)


*ArenaPoliti.co no a haya declaracionnan cu ta indica cu sr. de Meza a ‘cambia su tono’ tocate hedging prome cu e hedging agreement di 2014. Si nos haya un of mas declaracion al caso, of un reaccion di sr. de Meza, ArenaPoliti.co lo publica esey tambe.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.