Perspectiva Independiente without background 001

Entrevista cu parlamentario René Herde [part 2]

Continuacion di Entrevista cu René Herde [part 1]
Den e prome parti di e entrevista, sr. Herdé a elabora riba e plannan di Gabinete Mike Eman pa stimula economia y hisa poder di compra. Tambe a papia tocante diferente medida. E combersacion ta conitua.

Coriente
Mientrastanto tarifa di coriente tambe a subi. Sr. Herdé ta bisa cu gobierno no ta determina prijs di awa y coriente. Segun sr. Herdé esey lo ta mescos cu si gobierno determina e tarifanan di Setar. Mescos cu Setar, WEB y Elmar ta companianan di gobierno cu mester opera manera companianan priva, sin metemento di gobierno, sr. Herdé ta splica.
Un rato prome si sr. Herdé a bisa cu gobierno di AVP a logra baha e tarifanan di awa y coriente, door di no tuma dividendo di WEB y Elmar. ArenaPoliti.co (AP): “Gobierno por influencia e maneho di e gastonan (di WEB y Elmar)”. Sr. Herdé ta di acuerdo, pero ta insisti cu gobierno no por preveni e aumento di tarifa di coriente actual. E culpabel principal: Valero y su handling fee.

AP a puntra di e supuesto cantidad di hende cu gobierno di AVP lo a duna trabou den WEB, cu salarionan halto. Esey lo tin como consecuencia un aumento di gasto innecesario, contribuendo na e aumento di tarifa. Sr. Herdé ta contesta cu un pregunta: “Nombra’mi un (1) persona cu gobierno a duna trabou den WEB”. “Gobierno no por”. Sr. Herdé ta bolbe remarca cu WEB y Elmar ta entidadnan privatisa, y cu nan ta opera como companianan priva.
E placa cu WEB, Elmar y Utilities NV ta duna como sponsor di eventonan green y Europe Meets the Americas, no ta e causa di e aumento tampoco, segur sr. Herdé. Ademas, e ta bisa cu fraccion di AVP a calcula cuanto placa extra e aumento di tarifa di coriente lo costa ciudadanonan. Segun nan calculacion, usando cuenta di hende cu ta cay den e grupo di usuario mas abou, e lo sali mas o menos Afl.15,- extra pa luna. “Nan (pueblo) por pag’e” sr. Herdé ta bisa. E ta añadi cu “WEB y ELMAR ta sigui mehora eficiencia y inverti den renobacion pa tene prijsnan stabiel manera a sosode e ultimo dos aña”.

Gelijkbedrag y ‘Bashi-premie’
E combersacion tambe a toca e tema di gelijkbedrag y ‘bashi-premie’. Pa casualidad tawata e mesun dia cu sra. Hyacinta Thijsen lo bay entrega un manifiesto na minister Mike Eman. Y algun dia prome Organisacion di Pensionado Publico Arubano (OPPA) a laga sa di ta dispuesto pa bay te corte pa bringa e decision di gobierno pa no paga e gelijkbedrag y ‘bashi-premie’.
Segun sr. Herdé, e decision di gobierno pa no paga gelijkbedrag y ‘bashi-premie’ tin di haber cu cortamento di gasto. E decision a wordo tuma bou encargo di ex-minister di finansas Yrausquin. Pero ainda ta posibel pa cambia e decision. Segun sr. Herdé, probablemente gobierno lo paga pensionadonan e gelijkbedrag y ‘bashi-premie’ e aña aki. [Dos dia despues di e entrevista, minister Mike Eman a priminti sra. Thijsen cu gobierno lo paga e gelijkbedrag y ‘bashi-premie’]

Presion
Nos ta un pais autonomo, no independiente” sr. Herde ta bisa. Y por si acaso un hende a lubida esey, Hulanda a recorda nos di esey cu cinco letter: ‘KB’ y ‘CFT’. Dos hecho cu AVP no ta di acuerdo cu nan. “Absolutamente cu no!” sr. Herde ta añadi.
Pero mientras cu nan no ta di acuerdo cu CFT, AP ta remarca cu un protocol firma, acuerdonan sera y corespondencia entre minister di Aruba y di Hulanda, ta duna e impresion cu gobierno di Aruba mes a bay di acuerdo pa CFT investiga presupuesto 2014. Sr. Herdé no ta di acuerdo cu esaki. Segun sr. Herdé, Aruba y Hulanda a palabra cu un organo cu representacion di Aruba y Hulanda lo ta encarga cu investigacion di e presupuesto.
Pero e acuerdo di 3 di juli 2014 entre prome minister Eman, prome minister Rutte y minister Plasterk, no ta haci mencion di representacion di Aruba den e team di expertonan cu mester investiga e presupuesto. E acuerdo ta mustra di ta un “green light” pa CFT bin Aruba. Sr. Herdé ta keda insisti cu esey no ta e caso, y cu Hulanda a interpreta e acuerdo ey, en particularmente punto 3, diferente cu gobierno di Aruba.

AP ta remarca cu ta straño si prome minister Mike Eman a laga espacio pa diferente interpretacion riba un punto asina importante, den un acuerdo cu por afecta nos autonomia. Especialmente considerando cu tawata conosi caba cu Hulanda kier tin mas control riba Aruba su presupuesto. Kisas ta facil pa duna critica constructivo mirando atras, pero ta di spera cu mandatarionan ta mas cauteloso ora ta trata autonomia di Aruba.

Continuando riba e tema di CFT, sr. Herdé ta splica cu Gabinete Mike Eman a premira e recomendacionnan di CFT. E ta bisa cu gobierno no tin problema cu e recomendacionnan, pasobra e maneho di baha gasto ya tawata bayendo den e mesun direccion ey caba. E ta sigui splica cu gobierno mes a dicidi di corta gasto, y introduci medida pa aumenta entrada. Tur esey ta parti di e ‘balanced budget akkoord’. “E bon cos ta cu nos mes a scohe pa trece balansa den finansa publico. No ta pasobra Hulanda kier. Ta pasobra nos mes kier finansa publico den balansa” sr. Herde ta remarca.

Pero kiko ta e gran diferencia di opinion entre Aruba y Hulanda anto? Segun sr. Herde, e diferencia di opinion ta con lihe gobierno mester ehecuta e plannan. Hulanda ta haya cu gabinete Mike Eman II ta tardando pa implementa tur e cortamento di gasto y medidanan. Di un banda, sr. Herdé ta bisa cu gobierno no ta obliga di sigui e recomendacionnan di CFT. Di otro banda sr. Herdé ta indica cu gobierno Hulandes a pone gobierno di Aruba bou di hopi presion. Sr. Herdé: “Ora nan pone’bo bou presion y nenga di coopera cu bo, bo ta haya’bo ta haci cos di un forma cu bo a prefera pa no haci'e. Cu e maneho cu gobierno di Aruba mes a scohe pa hiba, nos lo a yega na e mesun resultado, pero sin e consecuencianan negativo di e KB y e CFT”. E ta splica cu Hulanda mester firma pa Aruba por haci fiansa riba mercado internacional. Si Aruba no cumpli cu Hulanda su deseonan, nan por keda sin firma. Un manera simpel y efectivo pa pone presion.

Negocia
Asina nos por ripara cu no tin igualdad den Reino. Sr. Herde ta di acuerdo cu e igualdad no lo bin tampoco. Pero segun sr. Herdé, e impasse actual entre Aruba y Hulanda no ta trata di igualdad. Sr. Herdé: “Ta trata di cu un pais manera Aruba mester tin e posibilidad pa desaroya manera e mes ta kere ta miho. E espacio ey nos kier. Nos a mustra cu nos por.

Y e geschillenregeling, cu Hulanda ta tarda pa yuda haci un realidad, lo por contribui na e proceso di regula e forma cu instrumentonan cu nos statuto ta ofrece, ta wordo usa. Pero e geschillenregeling lo trata solamente asuntonan legal y di interpretacion di statuto. E no lo trata decisionnan politico di Hulanda. Loke Aruba mester haci segun sr. Herde, ta sigui negocia cu Hulanda. Y na final di e entrevista, sr. Herdé a sigui pa un otro reunion den edificio di Tweede Kamer.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.