Prome Minister Mike Eman ta habri curso na Univerdad

ORANJESTAD – E meta pa nos pais bira un potencial den energia alternativo y hunto cu ne haci di e conocemento di nos hendenan un sector economico, no ta promesanan bashi. Awe mainta Prome Minister Mike Eman ta bay dirigi su mes na un grupo di studiantenan di Arizona State University cu a bin pa studia e avancenan cu nos isla a logra riba tereno di sostenibilidad. E curso cu e studiantenan ta tumando ta djis un stap mas den e direccion pa crea e Green Faculty na Universidad di Aruba.

Ta trata di un programa di Summer School pa 15 studiante di e Ira A. Fulton School of Engineering di Arizona State University. E cooperacion entre e institucion Mericano y Universidad di Aruba ta danki na intermediacion di TNO, cu ta estableci na Aruba. E programa titula ‘Sustainable Island Solutions’  tin un duracion di dos siman durante cual e studiantenan ta bay siña di e proyectonan di sostenibilidad cu nos pais a implementa y ta ehecutando pa yega na e meta fiha di 100% di independencia di combustibel na 2020.

Como lider di e vision pa energia alternativo y e conversion total di Aruba pa energia renobabel, Prome Minister Mike Eman a wordo invita pa hiba palabra durante apertura di e curso dialuna mainta na aula di Universidad di Aruba. E mandatario ta contento di mira con e entidad educativo di mas halto riba nos isla ta riba e bon caminda pa institui un facultad di sostenibilidad.

Minister President Eman ta bay comparti cu e hobennan aki e experiencianan cu a hiba nos isla na e luga cu nos ta actualmente y e vision su tras. A cambio, e studiantenan y nan profesornan ta intercambia conocemento y yuda nos yega na e obhetivonan stipula cu un perspectiva nobo y diferente.

Expresionnan haci den e articulo aki no necesariamente ta refleha opinion di ArenaPoliti.co