Minister Otmar Oduber a contesta preguntanan den Parlamento 

Ya caba pa algun tempo ta trahando riba e concepto di ley riba regulacion di all inclusive na Aruba. Durante un reunion yama pa e Comisionnan Fiho di Turismo y Economia di Parlamento Minister Otmar Oduber a contesta tur e preguntanan cu a bin di e miembronan di Parlamento presente. Un di e preguntanan ta riba e tardansa pa bin cu un regulacion pa e tipo di hotelnan aki. Riba esaki e mandatario a enfatisa di no kier comete e mesun erornan di pasado. E ta referi na e hecho unda ex Minister President di Aruba Sr. Nel Oduber a expresa di no tin interes  pa sa kico e organisacion di AHATA ta pensa ya cu Riu ta un producto di un calidad halto y lo tin bon beneficio pa Aruba. El a te hasta gaba e tempo ey di conoce e doñonan di e cadena hotelero Riu y cu un adkisicion di Riu ta significa atraccion di avionnan y hopi cosnan positivo. Minister Oduber a sigui menciona: “Awe nos ta scucha mesun skina politico ta critica Riu, y no ta di acuerdo cu Riu mas aki na Aruba. Nos kier evita e tipo di expresionnan ey!”

Desde 2013 na momento cu tabata conoci e intencion di Riu pa cumpra Westin a inicia un proceso di consulta,  unda a conduci varios estudio y awor nos ta na e punto cu tin e concepto di leynan, unda cu por a presenta esakinan na Parlamento durante e reunion. A demostra tambe cu no ta solamente un cambio di ley kier yega na dije pero tambe ta pensando riba un structura nobo di un impuesto special pa e all inclusive hotelnan na Aruba, pa di e forma aki nan por paga e parti cu nan merece di paga e comunidad di Aruba pa operacionnan di un hotel di e tipo aki. E leynan mester ta di tal forma hinca den otro, cu tin un espacio di un temporada di transitorio, pa tur esnan cu ta operando na e momentonan aki bou di un capa di all inclusive. Un otro cambio tambe ta encera cu antes un Minister di Salubridad so tabata duna permiso awor ta añadi aprobacion di un Minister di Turismo. Ta condicionnan nobo mara na interes general di Pais Aruba.

Den e proceso e mandatario ta comenta cu a comunica esaki directamente cu tur e partidonan envolvi cu e compra di Radisson. Sr. Oduber ta menciona cu e ta spera cu esaki lo wordo tuma den bon consideracion.

Ta warda riba desicion di corte e siman aki y di parti Gobierno a segura cu e pensamento riba e maneho ta bon conoci pa tur hende, a haci apelacionan tambe riba hopi di esnan cu ta forma parti di e negociacionnan tumando lugar na e momentonan aki, y ta spera cu prome cu e sentencia por haya un bon noticia.

Minister Oduber a termina bisando cu e ta kere cu Aruba tin un bon mix actualmente, pero mester controle. Si no controle nos ta bay den direccion di Caribe cu na e momentonan aki tin casi 70 porciento di su operacionnan all inclusive. Aruba awor ta den un 30 porciento y tabata asina caba pa basta tempo.  Esaki incluyendo hotelnan cu ta opera di e forma aki tambe manera un Hyatt, Marriott y tur e resortnan cu ta opera un 10 pa 15 porciento como all inclusive, mas e unico hotelnan cu ta carga sosten di gobierno cu ta un Zoetry y tambe un Bahia Principe. Esaki lo traduci den un mix di 40 porciento all inclusive y 60 porciento E.P. cu ta un mix cu e mandatario ta di opinion cu si nos por logra mantene esey, compara cu lo cual tin den Caribe y e tendencia di crecemento cu tin den Caribe, Aruba lo ta bon sirbi den e añanan nos dilanti pa por sigui haya turismo di calidad y esnan cu ta bin ta sali pafor. “Mester percura cu esnan cu ta bin pa all inclusive ripara tambe cu no ta cualkier all inclusive compara cu tur otro parti di mundo, unda nan ta keda cera den e hotel. Nan mester realisa cu nan por sali cana liber tin seguridad, y nan ta haci uso tambe di tur e otro facilidadnan cu tin economia pafor di e resort.”

Expresionnan haci den e articulo aki no necesariamente ta refleha opinion di ArenaPoliti.co